ଭୋପାଳ,୭ା୩(ପି.ଟି.): ମଧ୍ୟପ୍ରଦେଶରେ କଂଗ୍ରେସ ସରକାରରେ ଅସ୍ଥିରତା ସୃଷ୍ଟି ପାଇଁ ଘୋଡ଼ାବେପାର ଉଦ୍ୟମ ଅଭିଯୋଗ ହେଉଥିବାବେଳେ ସଙ୍କଟର ଖିଅ ଦଳ ଭିତରେ ବୋଲି ସୂଚନା ମିଳିଛି। ଦଳର ବରିଷ୍ଠ ନେତା ଜ୍ୟୋତିରାଦିତ୍ୟ ସିନ୍ଧିଆଙ୍କୁ ଅଣଦେଖା ଓ ଅସମ୍ମାନିତ କଲେ ମୁଖ୍ୟମନ୍ତ୍ରୀ କମଲନାଥଙ୍କ ନେତୃତ୍ୱାଧୀନ ସରକାର ସଙ୍କଟରେ ପଡିବେ ବୋଲି ଶୁକ୍ରବାର ରାଜ୍ୟର ଜଣେ ମନ୍ତ୍ରୀ କହିଛନ୍ତି। ସିନ୍ଧିଆଙ୍କ ସମର୍ଥକ ଭାବେ ଜଣାଶୁଣା ଶ୍ରମମନ୍ତ୍ରୀ ମହେନ୍ଦ୍ର ସିଂ ସିସୋଡିୟା କହିଛନ୍ତି, ଭାଜପା ରାଜନୈତିକ ଚାପ ପକାଉଛି। ତେବେ ସିନ୍ଧିଆଙ୍କୁ ଅଣଦେଖା କଲେ ସରକାର ନିଶ୍ଚୟ ଅଡୁଆରେ ପଡିବେ। ଲୋକ ସଭା ନିର୍ବାଚନରେ ସିନ୍ଧିଆ ହାରିଯିବା ପରେ ତାଙ୍କୁ ରାଜ୍ୟ କଂଗ୍ରେସ ସଭାପତି କରିବା ଲାଗି ସମର୍ଥକମାନେ ଦାବି କରିଆସୁଛନ୍ତି। ଏମ୍ପିରୁ ରାଜ୍ୟ ସଭାରେ ୩ ଆସନ ଖାଲିପଡିବାକୁ ଯାଉଥିବାବେଳେ ସିନ୍ଧିଆଙ୍କୁ ପଠାଇବା ପାଇଁ ଦାବି ହେଉଛି। ଗତ ମାସରେ ସିନ୍ଧିଆ ଶିକ୍ଷକମାନଙ୍କ ଦାବି ନେଇ ସରକାରଙ୍କ ବିରୋଧରେ ରାସ୍ତାକୁ ଓହ୍ଲାଇବେ ବୋଲି କହିଥିଲେ।
କଂଗ୍ରେସରେ ମିଶିବେ ସଞ୍ଜୟ ପାଠକ
ରାଜ୍ୟ ସଭା ନିର୍ବାଚନ ପୂର୍ବରୁ ବିଧାୟକମାନଙ୍କୁ ନିଜ ପକ୍ଷକୁ ନେବା ଲାଗି ଉଭୟ ଶାସକ କଂଗ୍ରେସ ଓ ବିରୋଧୀ ଦଳ ଭାଜପା ପକ୍ଷରୁ ମୂଲଚାଲ ଚାଲିଥିବା ଅଭିଯୋଗ ହେଉଛି। ଭାଜପା ବିଧାୟକ ସଞ୍ଜୟ ପାଠକ କଂଗ୍ରେସରେ ଯୋଗଦେଇପାରନ୍ତି ବୋଲି ଜଣାପଡିଛି। ସଞ୍ଜୟଙ୍କ ବାପା ସତ୍ୟେନ୍ଦ୍ର ପାଠକ କଂଗ୍ରେସ ଜିଲା ସଭାପତି ଏବଂ ଦିଗ୍ବିଜୟ ସିଂ ସରକାରରେ ମନ୍ତ୍ରୀ ଥିଲେ। ଭାଜପାର ଘୋଡାବେପାର ଉଦ୍ୟମର ଜବାବ ଦେବାକୁ ବରିଷ୍ଠ କଂଗ୍ରେସ ନେତା ଦିଗ୍ବିଜୟ ସିଂ ଓ ମୁଖ୍ୟମନ୍ତ୍ରୀ କମଳନାଥ ‘ଯେସାକୁ ତେସା’ ନୀତି ଆପଣାଇଥିବା କୁହାଯାଉଛି।
