ଇସ୍ଲାମାବାଦ,୧୦।୧୧: କଂଗ୍ରେସ ନେତା ତଥା ପୂର୍ବତନ କ୍ରିକେଟର ନବଜୋତ ସିଂ ସିଦ୍ଧୁ ଶନିବାର କରତାରପୁର କରିଡର ଉଦ୍ଘାଟନ ଦିବସରେ ଯୋଗ ଦେଇଥିଲେ। ସେହି ସମୟର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଉକ୍ତ ଭିଡିଓରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାଁ ଏକ ବସ୍ରେ ଯାତ୍ରା ଆରମ୍ଭ କରିବାକୁ ଯାଉଥିବା ବେଳେ ପଚାରୁଛନ୍ତି, ‘କୁଆଡେ ଗଲେ ଆମ ସିଦ୍ଧୁ’। ଆଉ ଏତିକି ବେଳେ ତାଙ୍କ ନିକଟରେ ଥିବା ଲୋକଙ୍କ ମଧ୍ୟରୁ କେହି କହୁଛନ୍ତି ହେଇ ଆସିଗଲେ। ଏତିକି ବେଳେ ଇମ୍ରାନ ସରକାରଙ୍କ ଅନ୍ୟ ଜଣେ ମନ୍ତ୍ରୀ କହିଥିଲେ ଯଦି ଭାରତ ସିଦ୍ଧୁଙ୍କୁ କରତାରପୁର କରିଡର ଆସିବାକୁ ଅଟକାଇଥାଆନ୍ତା ତେବେ ଏହା ଗଣମାଧ୍ୟମର ମୁଖ୍ୟ ଖବର ହୋଇଥାଆନ୍ତା। ହେଲେ ଏବେ ଏହା କେବଳ ଏକ ଖବର ହୋଇଯାଇଛି। ଏତିକି ବେଳେ ଇମ୍ରାନ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କ ସମ୍ପର୍କରେ ମଧ୍ୟ ପଚାରି ବୁଝିଥିଲେ। ତେବେ ଇମ୍ରାସ ଓ ସିଦ୍ଧୁଙ୍କ ମଧ୍ୟରେ ଥିବା ଏହି ସମ୍ପର୍କକୁ ନେଇ ବହୁ ସମାଲୋଚନା ମଧ୍ୟ ହେଉଛି। କାରଣ ସିଦ୍ଧୁ କରତାରପୁର କରିଡର ଉଦ୍ଘାଟନ ଉତ୍ସବରେ ଇମ୍ରାନଙ୍କୁ ଯେଭଳି ପ୍ରଶଂସା କଲେ ଏହାପରେ କେତେଜଣ ସିଦ୍ଧୁଙ୍କୁ ପାକିସ୍ତାନ ଚାଲିଯିବାକୁ ମଧ୍ୟ ଉପଦେଶ ଦେଇଥିବା ଦେଖାଯାଇଛି।
