ଗୁଡ଼ଭେଲା,୨୩ା୯ (ଡି.ଏନ୍.ଏ.)- ରୂପେଲି ଠିକ୍ ହେଇଯିବା, ନିଜେ ନିଜର କାମ୍ବୁତା କରିପାରବା। ଉନିଆ ଛୁଆକର ସଂଗେ ମିଶି ଖେଲବା। ପରିବାର ଲୁକ୍କର ଇ ସବୁ ସପନ୍ ଏହେଦେ ସପନ୍ ହେଇ ରହିଯାଇଛେ। ଟଁକା ପଏସା ଅଭାବୁ ପରିବାର ଲୋକ୍ ରୂପେଲିର ଉଚ ଚିକିଛା କରେଇ ନାଇଁପାରବାର। ଇ ବାବ୍ଦେ ଭିନେ ଭିନେ ଗଣମାଧ୍ୟଥି ଖବର ବାହାରିଥିଲା। ଖବର ବାହାରଲା ଉତାରୁ ଥାନୀୟ ପରଶାସନ ଇ ଦିଗେ ଧିଆନ୍ ଦେଇଥିଲା ସତ୍। ହେଲେ ଏହେଦେ ସଭେ ଇ ଗରିବ୍ ଛୁଆର ଦୁଖ୍କେ ପାସ୍ରି ଦେଇଛନ୍। ଝି’ର ଚିକିଛା ସାହାଯ୍ ଲାଗି ପରିବାର ଲୋକ୍ ଥାନୀୟ ନେତା ମନ୍ତ୍ରୀକୁଁ ଗୁହାରି କରି ନିରାଶ ହେଇଥିବାର ରୂପେଲିର ମା’ କୁନିତା କହିଛନ୍। ମାସେ ଆଗ୍ରୁ ରୂପେଲିକେ ବଲାଙ୍ଗୀର ମୁଖିଆ ଡାକ୍ତରଖାନାରେ କେତେ ପରୀକ୍ଷା କରି ଘରକେ ପଠେଇ ଦିଆଯାଇଛେ। ହେଲେ ଉଚ ଚିକିଛା ଲାଗି କେହେନ୍ସି ପରକାର ଉଦିଅମ ନାଇଁ କରାଯାଇଥିବାର ପରିବାର ଲୋକ ଅଭିଯୋଗ କରିଛନ୍। ଏନ୍ତାଥି ମା’ବାପ୍ ଛୁଆର ଦୁଖ୍ ଦେଖି ଆଏଁଖ୍ଥୁ ଲହ ଗଡ଼ାଲାବେଲେ ରୂପେଲି ନିଜର ଭାଏଗ୍କେ ଆଦ୍ରି ପଡ଼ିରହିଛନ୍।
ପୂରବର ସୂଚନା ହିସାବେ ବଲାଙ୍ଗୀର ଜିଲା ଗୁଡ଼ଭେଲା ବ୍ଲକ ଡୁଙ୍ଗିବାହାଲ ଗଁାର ବାପ୍ ମେଘନାଦ ରଣା ଆର ମା’ କୁନିତାକଁର ଝି’ ହେଉଛନ୍ ରୂପେଲି ରଣା(୩)। ରୂପାଲି ଜନମ ହେବାର ଦୁଇମାସ ଉତାରୁ ଜନାଗଲା ଯେ, ସେ କେହେନ୍ସି ଗୁଟେ ଅଜନା ରୋଗ୍ରେ ଆକ୍ରଁାତ ଅଛନ୍। ଏନ୍ତାଥି ଗରିବ୍ ମା’ବାପ୍ ରୂପେଲିକେ ଗୁଡ଼ଭେଲା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରନୁ ମୂଲ କରି ବଲାଙ୍ଗୀର, ବରପାଲି, ବୁର୍ଲାରେ ଚିକିଛା କରେଇ ନିରାଶ ହେଇଛନ୍। ଇଆଡ଼େ ରୂପେଲିର ବଏସ୍ ଅନ୍ସାରେ ଦିହିପା ନାଇଁ ବଢ଼ବାର। ଦିନୁଦିନ୍କେ ତାକର ମୁଡ଼୍ଟା ବଢ଼ତେଲ ଗଲାବେଲେ ହାତ୍ଗୋଡ଼ ସବୁ ସପୁର ହେଇଯାଉଛେ। ସବୁବେଲେ ଯେ ହେଲେ ଝନେ ତାହାକୁ ପାଇ କରୁଛନ୍। ତାହାକୁ ପାଇକଲାବେଲେ ଟିକେ ଇଫାଲ ସେଫାଲ ହେଲେ ତାକର ହାତ୍ଗୋଡ଼ ଭାଂଗି ଯାଉଛେ, ଫେର ଦିନାକେତେ ଉତାରୁ ଜୁଡ଼ି ହେଇଯାଉଛେ। ଏହେଦେ ରୂପେଲିକେ ୩ ବଛର ଉପରେ ହେଇଥିଲେ ବି ସେ କଥା କହି ନାଇଁପାରବାର। ଇଆଡ଼େ ମୁଡ଼ର ଉଜନ୍ ବଢ଼ତେଲ ଗଲାବେଲେ ଏହେଦେ ସେ ମୁଡ଼ ବି ସିଧା ରଖି ନାଇଁପାରବାର। ସବୁଥିରୁ ବଡ଼ ଦୁଖର କଥା ଇ ଗରିବ୍ ପରିବାରକେ ଆଏଜ୍ତକ ବିଜୁ ସ୍ବାସ୍ଥ୍ୟ ବୀମା ଯୋଜନାରେ ସାମିଲ କରାଯାଇ ନାଇଁପାରି। ଇ ଦିଗେ ଜିଲା ପରଶାସନ, ସ୍ବାସ୍ଥ୍ୟ ବିଭାଗ ଦୁରୁଷ୍ଟି ଦେଇ ରୂପାଲିକେ ଉଚ ଚିକିଛା ସାହାଯ୍ ଯୁଗେଇ ଦେବାକେ ଅଂଚଲବାସୀ ଦାବି କରିଛନ୍।
