ମଥୁରା,୧୭।୫: ସର୍କସରେ ଖେଳ ଦେଖାଉଥିବା ହାତୀ ସ୍ବାଧୀନତା ଦିବସ ପାଳନ କରିବା ଶୁଣିଲେ ଯେ କେହି ଆଶ୍ଚର୍ଯ୍ୟ ହେବା ସ୍ବାଭାବିକ। ତେବେ ମଥୁରାର ହାତୀ ସଂରକ୍ଷଣ କେନ୍ଦ୍ରରେ ଥିବା ୪ ହାତୀ ଏଭଳି କରିଛନ୍ତି। ସଂରକ୍ଷଣ କେନ୍ଦ୍ରରେ ସେମାନେ ୨୦୧୫ଠାରୁ ଗତ ୫ ବର୍ଷ ଧରି ରହିଛନ୍ତି। ହାତୀମାନଙ୍କୁ ବନ୍ୟପ୍ରାଣୀ ସଂଗଠନ ପକ୍ଷରୁ ଉଦ୍ଧାର କରାଯାଇଥିଲା। ସର୍କସରୁ ମୁକ୍ତି ପାଇବାର ପଞ୍ଚମ ବାର୍ଷିକୀରେ ସଂରକ୍ଷଣ କେନ୍ଦ୍ର କର୍ମଚାରୀ ସେମାନଙ୍କ ପାଇଁ ବିଭିନ୍ନ ପନିପରିବା ଏବଂ ଫଳରେ କେକ୍ ପ୍ରସ୍ତୁତ କରିଥିଲେ। ଏସବୁ ହାତୀଙ୍କ ନାମ ମେକ୍ ଡେମିଆ(ମେକ୍), ଓ୍ବାଲନଟ୍(ଓ୍ବଲି), କୋକୋନଟ୍(କୋକୋ) ଏବଂ ପିନଟ୍ ବୋଲି ସଂରକ୍ଷଣ କେନ୍ଦ୍ର ପକ୍ଷରୁ କୁହାଯାଇଛି। ମେକ୍ର ବୟସ ୨୭ ବର୍ଷ ହୋଇଥିବାବେଳେ ଓ୍ବଲିର ବୟସ ୨୩, କୋକୋର ବୟସ ୧୭ ଏବଂ ପିନଟ୍ର ବୟସ ୧୧ ବର୍ଷ ବୋଲି ବନ୍ୟପ୍ରାଣୀ ସଂଗଠନର ପ୍ରାଣୀ ଚିକିତ୍ସକ ଡ. ୟଦୁରାଜ ଖଡ଼ପେକର ସୂଚନା ଦେଇଛନ୍ତି। କୋକୋ ଏବଂ ପିନଟ୍ ଅଧିକ ଚଳଚଞ୍ଚଳ ରହୁଥିବାବେଳେ ଅନ୍ୟ ଦୁଇ ହାତୀ ପ୍ରାୟତଃ ସ୍ଥିର ରହୁଥିବା ସେ କହିଛନ୍ତି।
