ବାଲେଶ୍ୱର ଅଫିସ, ୧।୬-ବାଲେଶ୍ୱରର ଲୋକପର୍ବ ଜଉକଣ୍ଡେଇ ବାହାଘର ଉତ୍ସବ କମିଟି ପକ୍ଷରୁ ସମ୍ପନ୍ନ ହୋଇଛି। କନ୍ୟା ଟୁସୁକୁ ଧରି ବର ଶଙ୍କର ଗାନ୍ଧୀ ସ୍ମୃତିଭବନସ୍ଥିତ ଘରେ ପହଞ୍ଚତ୍ଛନ୍ତି। ସେଠାରେ ସେମାନଙ୍କୁ ଏକ ମଞ୍ଚରେ ସୁନ୍ଦର ଭାବେ ସଜାଯାଇ ବସା ଯାଇଛି। ବରଘରେ କନ୍ୟାକୁ ଦେଖିବା ପାଇଁ ଲୋକଙ୍କ ଭିଡ଼ ଜମୁଛି। ଏହି ଅବସରରେ ପ୍ରତି ସନ୍ଧ୍ୟାରେ ବିଭିନ୍ନ ପ୍ରକାର ସାଂସ୍କୃତିକ କାର୍ଯ୍ୟକ୍ରମ ଓ ପ୍ରତିଯୋଗିତା ଆୟୋଜନ କରାଯାଇଛି। ଅତିଥିମାନେ ଉତ୍ସବରେ ଯୋଗଦେଇ ଜଉକଣ୍ଢେଇ ପରମ୍ପରା ଏବଂ ଲୋକପର୍ବ ସମ୍ପର୍କରେ ନୂଆ ତଥ୍ୟ ପ୍ରଦାନ କରୁଛନ୍ତି। ଲଗ୍ନଧରା କାର୍ଯ୍ୟକ୍ରମରେ ବରଘର ତରଫରୁ କନ୍ୟାଘରକୁ ‘ବିଜ୍ଞାନକୁ ଆଦରନ୍ତୁ ଓ ଅନ୍ଧବିଶ୍ୱାସକୁ ଦୂରାନ୍ତୁ’ ଏବଂ କନ୍ୟାଘର ପକ୍ଷରୁ ବରଘରକୁ ‘ରକ୍ତ ଦେବି ଜୀବନ ବଞ୍ଚାଇବି’ ଦାବି କରାଯାଇଥିଲା। ଏହି ଅବସରରେ ଶନିବାର ପୂର୍ବାହ୍ନରେ ଗାନ୍ଧୀ ସ୍ମୃତିଭବନ ପରିସରରେ ବରଘର ପକ୍ଷରୁ ଏକ ରକ୍ତଦାନ ଶିବିର ଆୟୋଜିତ ହୋଇଥିଲା। ଏଥିରେ ୩୦ ୟୁନିଟ୍ ରକ୍ତ ସଂଗୃହ କରାଯାଇଥିଲା। ରକ୍ତଦାନ ଶିବିରକୁ ଚଳିତବର୍ଷର ବରପିତା ନାଟ୍ୟ ନିର୍ଦ୍ଦେଶକ ସୁରଞ୍ଜନ ଦାସ ମହାପାତ୍ର ଆନୁଷ୍ଠାନିକ ଭାବେ ଉଦ୍ଘାଟନ କରିଥିଲେ। କମିଟି ସଦସ୍ୟ ରାଜେଶ ଗିରି, ଆଇନଜୀବୀ ରଘୁନାଥ ଲେଙ୍କା, ବ୍ରହ୍ମ ରଥ, ଜୟଶ୍ରୀ ସାହୁ, ଇଂ. ହୃଷିକେଶ ସାହୁ, ଶିଳ୍ପୀ କେଶୁ ଦାସଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ସମସ୍ତ କାର୍ଯ୍ୟ ପରିଚାଳିତ ହୋଇଥିଲା।
ଶୁକ୍ରବାର ସନ୍ଧ୍ୟାରେ ଆୟୋଜିତ ସଭାକୁ ଫକୀରମୋହନ ବିଶ୍ୱବିଦ୍ୟାଳୟର କୁଳପତି ମଧୁମିତା ଦାସ ମୁଖ୍ୟଅତିଥି ଭାବେ ଉଦ୍ଘାଟନ କରିଥିଲେ। ଅନ୍ୟତମ ଅତିଥି ଭାବରେ ରେମୁଣା ବିଧାୟକ ସୁଧାଂଶୁ ପରିଡ଼ା, ଅତିରିକ୍ତ ଜିଲାପାଳ ସମ୍ବିତ ନାୟକ, ଡ଼ିଏଫ୍ଓ ବିଶ୍ୱରାଜ ପଣ୍ଡା, ପୂର୍ବତନ ନଗରପାଳ ଆଲୋକ କୁମାର ସାହୁ, ମୁଖ୍ୟବକ୍ତା ଭାବରେ କଲିକତା ସରକାରୀ କଳା ମହାବିଦ୍ୟାଳୟର ଭାସ୍କର୍ଯ୍ୟ ବିଭାଗର ମୁଖ୍ୟ ଅଖିଳ ଚନ୍ଦ୍ର ଦାସ, ପୂର୍ବବର୍ଷମାନଙ୍କର ବରପିତା ଇଂ. ଅଶୋକ ମହାପାତ୍ର, ରବିନାରାୟଣ ଦାଶ, ମଧୁସୂଦନ ଦାସ ଓ ବିମଳ ଜେନା, ଚଳିତବର୍ଷର କନ୍ୟା ପିତା ରାଜକିଶୋର ରଣା ଯୋଗଦେଇ ଜଉକଳାର ପ୍ରଚାର ପ୍ରସାର ପାଇଁ ହେଉଥିବା ଏ ପ୍ରକାର କାର୍ଯ୍ୟକ୍ରମର ପ୍ରଶଂସା କରିଥିଲେ। ପ୍ରାରମ୍ଭିକ କଥା ସୁଶାନ୍ତ କୁମାର ବେହେରା ରଖିଥିବା ବେଳେ ଶେଷ କଥା ରଖିଥିଲେ ମନସ୍ବନୀ ଦେବୀ। ଏହି ଅବସରରେ ବାରିପଦାରୁ ଆସିଥିବା ଛଉ ନୃତ୍ୟ ଦଳ ନୃତ୍ୟ ପରିବେଷଣ କରିଥିଲେ। ଅପରାହ୍ନରେ ରଙ୍ଗୋଲି ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଏଥିରେ ୧୫ରୁ ଊର୍ଦ୍ଧ୍ୱ ପ୍ରତିଯୋଗୀ ଅଂଶଗ୍ରହଣ କରିଥିଲେ।
