ଭୁବନେଶ୍ୱର, ୨୪।୩ (ବ୍ୟୁରୋ):ରାଜଧାନୀ ଭୁବନେଶ୍ବରରେ ପରିମଳ ନିୟମକୁ ଭୁବନେଶ୍ବର ମହାନଗର ନିଗମ (ବିଏମସି) ପକ୍ଷରୁ କଡ଼ାକଡ଼ି କରାଯାଇଛି। ପରିମଳ ନିୟମ ଅବମାନନା କ୍ଷେତ୍ରରେ ସଫେଇ ସଂସ୍ଥାରୁ ଆରମ୍ଭ କରି ସ୍ଥାନୀୟ ନାଗରିକ ଓ ଅନୁଷ୍ଠାନଠାରୁ ମୋଟା ଅଙ୍କର ଜରିମାନା ଆଦାୟ ହେଉଛି। ଏପରିସ୍ଥିତିରେ ପରିମଳ ନିୟମ ଖିଲାପ କରିବା ଘରୋଇ ଠିକା ସଫେଇ ସଂସ୍ଥା ‘ଜାଗୃତି’କୁ ଭାରି ପଡିଛି। ସକାଳ ୯ଟା ପରେ ଅଳିଆ ଉଠାଯାଇ ନ ଥିବାରୁ ଏଥିପାଇଁ ୧ଲକ୍ଷ ଟଙ୍କାର ଜରିମାନା କରାଯାଇଥିବା ବିଏମ୍ସି ଅତିରିକ୍ତ କମିଶନର-୨ ଶୁଭେନ୍ଦୁ ସାହୁ ସୂଚନା ଦେଇଛନ୍ତି। ଗୁରୁବାର ନଗର ଉନ୍ନୟନ ସଚିବ ଜି. ମାଥିଭାଥନନ୍ ୱାର୍ଡ ନଂ.୬୩ ଅନ୍ତର୍ଗତ ଜାଗମରା ଅଞ୍ଚଳରେ କ୍ଷେତ୍ର ପରିଦର୍ଶନ କରୁଥିଲେ। ସକାଳ ୯ଟା ପରେ ସମ୍ପୃକ୍ତ ଅଞ୍ଚଳରୁ ଅଳିଆ ଉଠି ନ ଥିବା ଦେଖ ସେ ବିରକ୍ତି ପ୍ରକାଶ କରିବା ସହ ସମ୍ପୃକ୍ତ ସଂସ୍ଥା ବିରୋଧରେ କାର୍ଯ୍ୟାନୁଷ୍ଠାନ ପାଇଁ ବିଏମ୍ସି ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ। ଏହାପରେ ବିଏମ୍ସି ପରିମଳ ଟିମ ଦ୍ବାରା ଘଟଣାର ଯାଞ୍ଚ କରାଯାଇ ଘରୋଇ ସଂସ୍ଥାକୁ ଲକ୍ଷେ ଟଙ୍କା ଜରିମାନା କରାଯାଇଛି। ଏଥିସହ ଉକ୍ତ ଘରୋଇ ସଂସ୍ଥା ସମେତ ୱାର୍ଡ ପରିଚାଳନା ଦାୟିତ୍ୱରେ ଥିବା ଜୋନାଲ ଡେପୁଟି କମିଶନର ରବି ନାରାୟଣ ଜେଠୀ, ୱାର୍ଡ ଅଫିସର ଓ ସାନିଟାରୀ ଇନ୍ସପେକ୍ଟରଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି। କାହିଁକି ଏତେ ସମୟ ଧରି ସେଠାରେ ଅଳିଆ ପଡି ରହିଥିଲା ଏବଂ ଅଧିକାରୀ କାହିଁକି ଏନେଇ ନଜର ଦେଇ ନ ଥିଲେ ତାହାର ଉତ୍ତର ରଖିବାକୁ ନିର୍ଦ୍ଦେଶ ଦିଆଯାଇଛି। ଏପରିକି ସେମାନଙ୍କ ପ୍ରତି କାହିଁକି କାର୍ଯ୍ୟାନୁଷ୍ଠାନ ନିଆଯିବ ନାହିଁ ସେନେଇ ଉତ୍ତର ରଖିବାକୁ କୁହାଯାଇଛି। ବିଏମ୍ସି ଦ୍ବାରା ସହରର ସଫେଇ ଦାୟିତ୍ୱ ବିଭିନ୍ନ ଘରୋଇ ସଂସ୍ଥାକୁ ପ୍ରଦାନ କରାଯାଇଛି। ଠିକା ସଂସ୍ଥା ‘ଜାଗୃତି’କୁ ମୋଟ ୨୮ ୱାର୍ଡର ସଫେଇ ଦାୟିତ୍ୱ ମିଳିଛି। ମାତ୍ର ଅଧିକାଂଶ ସମୟରେ ବିଭିନ୍ନ ଠିକା ସଂସ୍ଥା ନିଜ କାର୍ଯ୍ୟରେ ଅବହେଳା ପ୍ରଦର୍ଶନ କରୁଥିବା ନଜରକୁ ଆସୁଛି।
