ଢେଙ୍କାନାଳ ଅଫିସ, ୨।୭-ଢେଙ୍କାନାଳ ଜିଲାରେ କରୋନା ସଂକ୍ରମଣ ଏଡ଼ାଇବାକୁ ସପ୍ତାହନ୍ତ ଶଟ୍ଡାଉନ୍ ଘୋଷଣା କରାଯାଇଛି। ଅତ୍ୟାବଶ୍ୟକ ସେବାକୁ ବାଦ୍ ଦେଲେ ଏଣିକି ଶନି ଏବଂ ରବି ଦୁଇଦିନ ସମ୍ପୂର୍ଣ୍ଣ ବନ୍ଦ ରହିବ। ଜୁଲାଇ ୩୧ ଯାଏ ଏହି କଟକଣା ବଳବତ୍ତର ରହିବ। ଜୁଲାଇରେ କରୋନା ସଂକ୍ରମଣ ଶୀର୍ଷକୁ ଛୁଇଁବ ବୋଲି ଆଶଙ୍କା କରାଯାଉଛି। ଏହାକୁ ନଜରରେ ରଖି ପ୍ରଶାସନ ପକ୍ଷରୁ ଏପରି କଠୋର ପଦକ୍ଷେପ ନିଆଯାଇଥିବା ଜିଲାପାଳ ଭୂମେଶ ଚନ୍ଦ୍ର ବେହେରା ସୂଚନା ଦେଇଛନ୍ତି।
ସଂକ୍ରମଣ ବଢୁଥିବାରୁ ଢେଙ୍କାନାଳ ସୀମାନ୍ତ ଜିଲାଗୁଡ଼ିକୁ ହଟ୍ସ୍ପଟ୍ ଘୋଷଣା କରାଯାଇଛି। ଶନିବାର ଏବଂ ରବିବାର ଶଟ୍ଡାଉନ୍ ହେଉଥିବାରୁ ସମ୍ପୃକ୍ତ ଜିଲାରେ ରହି କାମ କରୁଥିବା ଅନେକ କର୍ମଜୀବୀ ଢେଙ୍କାନାଳ ପଳାଇ ଆସୁଛନ୍ତି। ଏହା ଗୋଷ୍ଠୀ ସଂକ୍ରମଣକୁ ନିମନ୍ତ୍ରଣ କରୁଛି। ଜିଲାରେ କରୋନା ଆକ୍ରାନ୍ତଙ୍କ ସଂଖ୍ୟା ୮୦ରେ ପହଞ୍ଚତ୍ଲାଣି। ସଂକ୍ରମଣ ବଢୁଥିବାରୁ ଏପରି ନିଷ୍ପତ୍ତି ନିଆଯାଇଥିବା ପ୍ରଶାସନ ପକ୍ଷରୁ ସୂଚନା ଦିଆଯାଇଛି। ଶଟ୍ଡାଉନ ସମୟରେ ସ୍ବାସ୍ଥ୍ୟସେବା ଅନୁଷ୍ଠାନ, ଔଷଧ ଦୋକାନ ଭଳି ଅତ୍ୟାବଶ୍ୟକ ସେବା ବଳବତ୍ତର ରହିବ। ଜିଲା କାର୍ଯ୍ୟାଳୟ, ପୌରସଂସ୍ଥା କାର୍ଯ୍ୟାଳୟ, ଜିଲା ପୋଲିସ କାର୍ଯ୍ୟାଳୟ, ଅଗ୍ନିଶମ ବାହିନୀ ଏବଂ ହୋମ୍ ଡେଲିଭେରି ସେବା ପୂର୍ବଭଳି ଜାରି ରହିବ। ଟେଲିକମ୍ୟୁନିକେଶନ, ପେଟ୍ରୋଲ ପମ୍ପ, ଜଳ ଯୋଗାଣ, ପରିମଳ ଓ ଷ୍ଟୋରେଜ, ବିଦ୍ୟୁତ୍ ଯୋଗାଣ, ପରିବହନ, କୃଷି, ନିର୍ମାଣ କାର୍ଯ୍ୟ, ଶିଳ୍ପସଂସ୍ଥାକୁ କଟକଣାରୁ ବାଦ୍ ଦିଆଯାଇଛି। ଖବରକାଗଜ ବିକ୍ରେତା ସକାଳ ୫ରୁ ୮ଟା ଯାଏ ବିତରଣ କରିପାରିବେ। ବିବାହ ଏବଂ ଅନ୍ତ୍ୟେଷ୍ଟିକ୍ରିୟା କରିବା ଲାଗି ପ୍ରଶାସନର ଅନୁମତି ନେବା ବାଧ୍ୟତାମୂଳକ କରାଯାଇଛି। ଏହି ନିୟମକୁ ଉଲ୍ଲଂଘନ କଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲାପାଳ କହିଛନ୍ତି।
