ଭୁବନେଶ୍ୱର,୧୯।୬(ବ୍ୟୁରୋ): ଗୋଟିଏ ପଟେ ରାଜ୍ୟ ସରକାର କୋଭିଡ ମୁକାବିଲାରେ ବ୍ୟସ୍ତ ଥିବା ବେଳେ ଏହି ସମୟରେ ବିଭିନ୍ନ ଦୁର୍ନୀତି ନେଇ ଅଭିଯୋଗ ଆସୁଛି। ଏହି କ୍ରମରେ ଶ୍ରମିକଙ୍କ ପାଇଁ କୋଭିଡ କିଟ୍ସ କିଣାରେ ପିସିସି କାର୍ଯ୍ୟକାରୀ ସଭାପତି ପ୍ରଦୀପ ମାଝୀ ବଡ଼ ଦୁର୍ନୀତି ଅଭିଯୋଗ ଆଣିଛନ୍ତି। ଶ୍ରମିକଙ୍କ ପାଇଁ କିଣାଯାଇଥିବା କିଟ୍ସରେ ୩୦୦ କୋଟିର ଦୁର୍ନୀତି ହୋଇଛି ବୋଲି ସେ ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ କହିଛନ୍ତି।
ପ୍ରଦୀପ କହିଛନ୍ତି, ୨୮ ଲକ୍ଷ ୨୨ହଜାର ଶ୍ରମିକଙ୍କ ଅର୍ଥ ହରିଲୁଟ ହୋଇଛି। ଚଷମା, ଜୋତା, ଗ୍ଲୋବ୍ସ, ହେଲମେଟ୍, ଜ୍ୟାକେଟ୍ କିଣାରେ ଦୁର୍ନୀତି ହୋଇଛି। ୧୨ଟଙ୍କା ଚଷମାକୁ ୬୦ଟଙ୍କାରେ, ୧୮୫ ଟଙ୍କା ଜୋତାକୁ ୪୧୩ ଟଙ୍କାରେ, ୧୦ ଟଙ୍କା ଗ୍ଲୋବ୍ସକୁ ୯୦ଟଙ୍କାରେ, ୪୫ ଟଙ୍କା ହେଲ୍ମେଟ୍କୁ ୧୧୦ ଟଙ୍କାରେ କିଣାଯାଇଛି। ବମିଖାଲର ଏକ ସଂସ୍ଥାରୁ ୨ ଟଙ୍କାର ମାସ୍କକୁ ୮୦ ଟଙ୍କାରେ କିଣା ଯାଇଛି। ଏହି ଅବସରରେ ମାଲକାନଗିରି, କଟକ, ଅନୁଗୋଳ ଜିଲାର ତଥ୍ୟ ପ୍ରଦାନ କରିଛନ୍ତି। ଏପରିକି ଏହି ଘଟଣାରେ ୩ ଜିଲାର ଜିଲାପାଳ ଓ ଶ୍ରମମନ୍ତ୍ରୀଙ୍କୁ ତଦନ୍ତ ଘେରକୁ ଆଣିବାକୁ ସେ ଦାବି କରିଛନ୍ତି। ଏଥିସହ ସେ ଶ୍ରମମନ୍ତ୍ରୀ ସୁଶାନ୍ତ ସିଂହଙ୍କ ଇସ୍ତଫା ମଧ୍ୟ ଦାବି କରିଛନ୍ତି।
