ତିହିଡ଼ି,୪ା୨(ଡି.ଏନ୍.ଏ.)- ଭଦ୍ରକ ଜିଲା ତିହିଡ଼ି କାଳୀପଡ଼ିଆରେ ଶ୍ୟାମା କ୍ଲବ ପକ୍ଷରୁ ୫ଦିନ ଧରି ଚାଲିଥିବା ୩ୟ ତିହିଡ଼ି ମହୋତ୍ସବ ସୋମବାର ଉଦ୍ଯାପିତ ହୋଇଯାଇଛି । ମହୋତ୍ସବର ଫାଟକ ପାର୍ଶ୍ୱରେ ଶ୍ରବଣ କୁମାର ଓ ମହାତ୍ମାଗାନ୍ଧୀ ଏବଂ ଜବାହରଲାଲ ନେହେରୁଙ୍କ ଜୀବନ୍ତ ମୂର୍ତ୍ତି ଦର୍ଶକମାନଙ୍କ ମନ ମୋହିଥିଲା। ଏହି ଜୀବନ୍ତ ମୂର୍ତ୍ତି ପାଖରେ ଦୀର୍ଘ ୫ଘଣ୍ଟା ଧରି ବେଶ୍ ଗହଳି ଲାଗିଥିବା ପରିଲକ୍ଷିତ ହୋଇଥିଲା। ଏହି ମୂର୍ତ୍ତି ଷ୍ଟାଚ୍ୟୁ ପରି ମନେ ହେଉଥିଲେ ମଧ୍ୟ ଏହା ଯେ ଜୀବନ୍ତ ଥିଲା ତାହା ଲୋକମାନେ ବିଶ୍ୱାସ କରିପାରୁ ନ ଥିଲେ। ଉଦ୍ଯାପନୀ ସନ୍ଧ୍ୟାରେ ମୁଖ୍ୟଅତିଥି ଭାବେ ବିରୋଧୀଦଳ ଉପନେତା ବିଷ୍ଣୁ ସେଠୀ ଯୋଗ ଦେଇ ଓଡ଼ିଆ ସାହିତ୍ୟକୁ ତିହିଡ଼ି ମାଟିର ଯଥେଷ୍ଟ ଅବଦାନ ଥିବା ମତବ୍ୟକ୍ତ କରିଥିଲେ । ଅନ୍ୟତମ ଅତିଥି ଭାବେ ଏମ୍ସର ଡା. ସୁଜିତ୍ କୁମାର ତ୍ରିପାଠୀ ଯୋଗ ଦେଇଥିଲେ। ମହୋତ୍ସବ କମିଟିର ସଭାପତି ଶିକ୍ଷାବିତ୍ ସୋମନାଥ ପାଢ଼ୀ ଅତିଥିଦ୍ୱୟଙ୍କୁ ସମ୍ବର୍ଦ୍ଧିତ କରିଥିଲେ। ଏହାଛଡ଼ା ତିହିଡ଼ି ଅଞ୍ଚଳରୁ ନିକଟରେ ଆଇଏଏସ୍ ପ୍ରାପ୍ତ ଶୁଭଙ୍କର ମହାପାତ୍ର, ବିଶିଷ୍ଟ ନାଟ୍ୟକାର ଓ କବି ସୁଧାଂଶୁ ଶେଖର ବେହେରାଙ୍କ ସମେତ ବିଭିନ୍ନ ସାମାଜିକ ସଂଗଠନକୁ ସମ୍ବର୍ଦ୍ଧିତ କରାଯାଇଥିଲା। କମାରିଆ ସ୍ଥିତ ଆନନ୍ଦ ପ୍ରସାଦ ସିନ୍ଦୋଳ ପଞ୍ଚାୟତ ସହଯୋଗ ହାଇସ୍କୁଲର ଛାତ୍ରୀଛାତ୍ରଙ୍କ ଦ୍ୱାରା ବୁଢ଼ା ଶଙ୍ଖାରୀ ନାଟକ ଓ ତିହିଡ଼ି ଚନ୍ଦ୍ରଶେଖର ରତ୍ନାକର ହାଇସ୍କୁଲର ଛାତ୍ରୀଛାତ୍ରଙ୍କ ଦ୍ୱାରା ପରିବେଷିତ ଆଇନା ନାଟକ ଦର୍ଶକମାନଙ୍କ ମଧ୍ୟରେ ବେଶ୍ ପ୍ରଶଂସିତ ହୋଇଥିଲା। ମୟୂରଭଞ୍ଜ ଚିନୁଆପଦା ଛଉନୃତ୍ୟ ପ୍ରତିଷ୍ଠାନର କଳାକାରଙ୍କ ଦ୍ୱାରା ପରିବେଷିତ ଛଉ ନୃତ୍ୟ ମନମୁଗ୍ଧକର ହୋଇଥିଲା । ଓଡ଼ିଆ ଚଳଚ୍ଚିିତ୍ର ଜଗତର ସ୍ବନାମଧନ୍ୟ ତାରକା ମିହିର ଦାସ ଏଥିରେ ଯୋଗ ଦେଇ ସଂଳାପ ମାଧ୍ୟମରେ ଦର୍ଶକାମାନଙ୍କର ମନୋରଞ୍ଜନ କରିଥିଲେ। ମହୋତ୍ସବ କମିଟି ସମ୍ପାଦକ ଚନ୍ଦ୍ରକାନ୍ତ ମହାନ୍ତି, ଡ. ଲକ୍ଷ୍ମୀଧର ତ୍ରିପାଠୀ ସମଗ୍ର କାର୍ଯ୍ୟକ୍ରମର ସଂଯୋଜନା କରିଥିଲେ । ସାମାଜିକ କର୍ମୀ ଧୀରେନ୍ଦ୍ର ସାହୁ, ଅମର ଜେନା, ମନୋଜ ସେନାପତି, ନରେନ୍ଦ୍ର ବାରିକ, କୈଳାସ ବେହେରା, ଜ୍ୟୋତିର୍ମୟ ପାଣ୍ଡବ, ମନୋଜ ପାଣିଗ୍ରାହୀ, ରାଜୀବ କୁମାର ନାୟକ, ଅମୂଲ୍ୟ ସେନାପତି, ପ୍ରିୟବ୍ରତ ପାଢ଼ୀ, ଗିରିଜାରମଣ ଜେନା, ପ୍ରଭାତ ଜେନା, ନୀଳମାଧବ ସେନାପତି ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।
