ପୁରୁଣା ଭୁବନେଶ୍ୱର, ୨।୪ (ଡି.ଏନ୍.ଏ.): ମହାପ୍ରଭୁ ଶ୍ରୀଲିଙ୍ଗରାଜଙ୍କ ବର୍ଷ ବର୍ଷ ଧରି ପାଳିତ ହେଉଥିବା ବହୁ ପରମ୍ପରାରେ ପୂର୍ଣ୍ଣଚ୍ଛେଦ ପଡ଼ିବାରେ ଲାଗିଛି। ପୂର୍ବରୁ ୯ଶହ ବର୍ଷର ହାଣ୍ଡିଭଙ୍ଗା ଯାତ୍ରା ବନ୍ଦ ହୋଇଯାଇଥିବାବେଳେ ଚଳିତବର୍ଷ ରୁକୁଣା ରଥଯାତ୍ରା ଲକ୍ଡାଉନ୍ ପାଇଁ ବୁଧବାର ହୋଇପାରିନି। ଏହାକୁ ନେଇ ସେବାୟତ ଓ ଶ୍ରଦ୍ଧାଳୁଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଅନ୍ୟପକ୍ଷରେ ଠାକୁରଙ୍କ ନୀତିକାନ୍ତି ମଧ୍ୟ ଲକ୍ଡାଉନ୍ ଶେଷ ପର୍ଯ୍ୟନ୍ତ ବନ୍ଦ କରିଦିଆଯାଇଛି। ସୂଚନାନୁସାରେ, ରଥଯାତ୍ରା ପାଇଁ ସେବାୟତମାନେ ପ୍ରୟାସ ଜାରି ରଖିଥିଲେ। ରଥ ନିର୍ମାଣ ମଧ୍ୟ ସରିଥିଲା। ମଙ୍ଗଳବାର ରାତି ୭ଟା ୪୫ରେ ସନ୍ଧ୍ୟା ଧୂପ, ନବପତ୍ରିକା ପୂଜା ହୋଇ ରଥ ପ୍ରତିଷ୍ଠା ପାଇଁ ଅନ୍ୟାନ୍ୟ ନୀତି ହେବାର ଥିଲା। ହେଲେ ସେବାୟତମାନେ ସରକାରଙ୍କ କରୋନା କଟକଣା ପାଇଁ ଜାରି ଗାଇଡ୍ଲାଇନ୍କୁ ସମ୍ମାନ ଦେଇ ଏହି ନିଷ୍ପତ୍ତି ନେଇଥିବା ସେବାୟତ କାଶୀନାଥ ପୂଜାପଣ୍ଡା କହିଛନ୍ତି। ସେ କହିଛନ୍ତି, ଠାକୁରଙ୍କ ନୀତିକାନ୍ତି ପାଇଁ ୩୬ ସେବାୟତଙ୍କ ସହ ୫ ଜଣ ପୋଲିସ ମୋଟ ୪୧ଜଣ ଆବଶ୍ୟକ। ତେଣୁ ଠାକୁରଙ୍କ ନୀତିକାନ୍ତି ସମ୍ଭବ ନୁହେଁ ବୋଲି ସେ କହିଛନ୍ତି।
