ଅତାବିରା, ୧।୬ (ଡି.ଏନ୍.ଏ): ବରଗଡ଼ ଜିଲା ଅତାବିରା ବ୍ଲକ କୁଲତାଟୁକୁରା ପଁଚେତ୍ ସଦର ଗଁ। ର ମୀନକେତନ ସିଂ(୪୫)। ସେ ଜନମ୍ବେଲେ ଠିକ୍ ଠାକ୍ ଥିଲେ ହେଲେ ପଛେ ରୋଗ୍ରେ ପଡ଼ି ଦୁଇଗୋଡ଼ ଅକାମି ହେଇଗଲା। ଗରିବ୍ ମା’ବାପ୍ ଅନେକ ଡାକ୍ତର ଦେଖେଇ ନିରାଶ ହେଲେ। ସେଦିନ୍ଠାନୁ ମୀନକେତନ ଭିନ୍ନକ୍ଷମ ଜୀବନ୍ ବିତେଇ ଆସୁଥିଲାବେଲେ ଅନେକ ପରକାର ସରକାରୀ ସୁବିଧାରୁ ବଁଚିତ୍ ରହିଛନ୍।
ସୂଚନା ଅନ୍ସାରେ କୁଲତାଟୁକୁରା ଗଁ। ର ସ୍ବର୍ଗତ ମୂରଲୀ ସିଂକଁର ପୁଓ ମୀନକେତନ ସିଂ। ସେ ଜନମ୍ବେଲେ ଠିକ୍ଠାକ୍ ଥିଲେ ହେଲେ ପଛେ ପୋଲିଓ ରୋଗ୍ରେ ଆକ୍ରଁାତ ହେଲେ। ଗରିବ୍ ମା’ବାପ୍ ଅନେକ ଜାଗାରେ ଚିକିସତ୍ା କରେଇ ନିରାଶ ହେଲେ। ଦିନୁଦିନ୍କେ ଦୁଇ ଗୋଡ଼୍ ସଁପୁର ହେଇଗଲା, ସେଦିନଠାନୁ ସେ ଭିନ୍ନକ୍ଷମ ଜୀବନ୍ ବିତେଇ ଆସୁଛନ୍। ମୀନକେତନର ବଏସ୍ ବଢ଼ବାର ସଂଗେ ମା’ବାପ୍ ତାକର ବିହାଚୁରା କରାଲେ। ବୁରୁଧ୍ ମା’ବାପ୍, ମାଏକିନା ଦେବକୀକେ ନେଇ ମୀନକେତନକଁର ପରିବାର ହଁସ ଖୁସିରେ ଚଲୁଥିଲା। ପଛେ ମୀନକେତନ ଆର ଦେବକୀର ଦୁଇଟା ପୁଓ ଝି’ ହେଲେ। ଇତାର କିଛି ଦିନ୍ ଉତାରୁ ବାପା ମୂରଲୀ ଆର ମାଏକିନା ଦେବକୀ ଆରପାରକେ ଚାଲିଗଲେ। ଏନ୍ତାଥି ପରିବାରର ସବୁ ବୋଝ୍ ଦିବ୍ୟାଙ୍ଗ ମୀନକେତନ ଉପରେ ପଡ଼ଲା। ଇଆଡ଼େ ପରିବାରଟା ନିହାତି ଗରିବ୍ ହେଇଥିଲାବେଲେ ଜମିବାଡ଼ି, ଘରଡ଼ିହ ବଲି କିଛି ନାଇଁ। ଉପେ ଶୂଇନ୍ ହେଇ ମୀନକେତନ ଟୁକୁରା ଛକ୍ରେ ଗୁଟେ ସାଇକେଲ ଦୁକାନେ ଦିନକ ୬୦ ଟଁକା ମଜୁରିରେ କାମ୍ କଲେ। ଇଥ୍ରେ ଘରର ଚୁଲି ଜଲବାର ସଂଗେ ସେ ପୁଓ ରାଜା ଆର ଝି’ ରାଜଶ୍ରୀକେ ପାଠ୍ ପଢ଼ଉଛନ୍। ଇଆଡ଼େ ବୁରୁଧ୍ ବିଧବା ମା’ ଚାନ୍ଦକଁର ବୋଝ୍। ମୀନକେତନ ସରକାରୀ ଯୋଜନାରେ ମାସିକ ୩ଶହ ଟଁକା ଭତା ଆର ରାଶନ କାର୍ଡରେ ୨୫କେ.ଜି. ଟଁକାକିଆ ଚାଉଲ ପାଉଛନ୍। ହେଲେ ଘର ନାଇଁଥିବାର ଲାଗି କୁଟୁମବସିଆ ପରହର ଘରେ ଆଶ୍ରେ ନେଇଛନ୍। ଇଆଡ଼େ ନିଜର ରୟତି ଜମି ନାଇଁଥିବାର ଲାଗି ସେ ଆବାସ ଯୋଜନାରୁ ବଁଚିତ ହେଇଛନ୍। ସରକାରକଁର ଯୋଜନା ଅନ୍ସାରେ ୪ ଡିସିମିଲ ଘର ଡ଼ିହ ସଂଗେ ଗୁଟେ ଆବାସ ଘର ଯୁଗେଇ ଦେବାକେ ମୀନକେତନ ଦାବି କରିଛନ୍। ଇ ବାବ୍ଦେ କୁଲତାଟୁକୁରା ସରପଁଚ୍ ଦେବକୀ ବାରିକକୁଁ ପଚରାଲାରୁ ମୀନକେତନକଁର ରୟତି ଜମି ନଁାଇଁନ, ସେଥିରଲାଗି ସେ ଆବାସ ଘର ପାଏବାରୁ ବଁଚିତ ହେଇଛନ୍ ବଲି ସେ କହିଥିଲେ। ସେନ୍ତା ଇ ବାବ୍ଦେ ଅତାବିରା ବିଡିଓ ପ୍ରଣବ କୁମାର ଚାନ୍ଦ ଆର ତହସିଲଦାର ହୃଦାନନ୍ଦ ଅଡ୍ଡିକୁଁ ପଚରାଲାରୁ ଘଟନାର ତଦଁତ୍ କରି ପଦକ୍ଷେପ ନିଆଯିବା ବଲି ଉଭଏ କହିଥିଲେ।
