ରେନତ୍ ଅଗ୍ଜାମୋଭ୍ ଦିନେ ଥିଲେ ଜଣେ ବକ୍ସିଂ ଚାମ୍ପିୟନ। ହେଲେ ଏବେ ସେ ପରିଚିତ ସେଲିବ୍ରିଟି କେକ୍ ମେକର୍ ଭାବେ। ତାଙ୍କର ପ୍ରତ୍ୟେକ କେକ୍ ଗୋଟିଏ ଗୋଟିଏ ମାଷ୍ଟରପିସ୍। ଆଉ ସେଗୁଡିକ ବିକ୍ରି ହୁଏ ହଜାର ହଜାର ଡଲାରରେ। ସୁନ୍ଦର ରାଜପ୍ରାସାଦରେ ନୃତ୍ୟ କରୁଥିବା ପ୍ରେମୀ ଯୁଗଳଠୁ ଆରମ୍ଭକରି ଓ୍ବାଟର ଫାଉଣ୍ଟେନ୍, ବିରାଟକାୟ ଡ୍ରାଗନ୍, ବରଫ ପାହାଡଭଳି ଅନେକ ଡିଜାଇନ୍ର କେକ୍ ସେ ତିଆରି କରିଛନ୍ତି। ରେନତ୍ ଏହି ବିରାଟକାୟ ଓ ଆକର୍ଷକ କେକ୍ ସବୁକୁ ଏତେ ନିଖୁଣଭାବେ କରିଥାଆନ୍ତି ଯେ, ଲାଗେ ବାସ୍ତବ ପରି। ସେଥିପାଇଁ ତ ତାଙ୍କ କେକ୍ର ବହୁତ ଚାହିଦା ରହିଛି। ଖାସ୍କରି ତାଙ୍କର ଅନେକ ହାଇ ପ୍ରୋଫାଇଲ୍ ଗ୍ରାହକ ଅଛନ୍ତି। ମାତ୍ର ୭ ବର୍ଷ ବୟସରୁ କେକ୍ ତିଆରି କରିବା ଆରମ୍ଭ କରିଥିଲେ ରେନତ୍। ସେବେଠାରୁ ଆଜିପର୍ଯ୍ୟନ୍ତ ସେ ୨୭୦୦ରୁ ଊର୍ଦ୍ଧ୍ୱ କେକ୍ ତିଆରି କରିସାରିଲେଣି। ତାଙ୍କର ୩୦ ବର୍ଷର ଅଭିଜ୍ଞତା ରହିଛି। ଆଉ ଅନେକ ପୁରସ୍କାର ବି ପାଇଛନ୍ତି। ତେବେ ଇନ୍ଷ୍ଟ୍ରାଗ୍ରାମ୍ ଯୋଗୁ ସେ ଅନ୍ତର୍ଜାତୀୟ ସ୍ତରରେ ପରିଚିତ ହୋଇପାରିଛନ୍ତି। ବର୍ତ୍ତମାନ ତାଙ୍କର ୨ ମିଲିୟନ ଫ୍ୟାନ୍ ଅଛନ୍ତି। ଗତବର୍ଷ ସେ ୧୩ ଫୁଟ୍ ଉଚ୍ଚତାର ଫେରିଟେଲ୍ କ୍ୟାସେଲ୍ ପରି ଏକ ଓ୍ବେଡିଂ କେକ୍ ତିଆରି କରିଥିଲେ, ଯାହାର ମୂଲ୍ୟ ୧,୭୯,୦୦୦ଡଲାର ଥିଲା। ୧୫୦୦ କି.ଗ୍ରା. ଓଜନର ଏହି କେକ୍ ଥିଲା ବେଶ୍ ଆକର୍ଷକ। ଅନେକ ମହଲାବିଶିଷ୍ଟ ଏହି କ୍ୟାସେଲ୍ରେ ବାଲକୋନି ଥିବା ସହ ସୁନ୍ଦର ବାହ୍ୟ ଓ ଆଭ୍ୟନ୍ତରୀଣ ସାଜସଜ୍ଜା ହୋଇଥିଲା। ତା’ର ଦ୍ୱାର ଖୋଲିବା ସହ କ୍ୟାସେଲ୍ ମଧ୍ୟରୁ ପୁଅଝିଅ ନୃତ୍ୟ କରି ବାହାରକୁ ଆସୁଥିଲେ, ଯାହାକି ସମସ୍ତଙ୍କୁ ଚକିତ କରୁଥିଲା।
