ନୂଆଦିଲ୍ଲୀ,୧୦ା୧୧(ପି.ଟି.): ଅଯୋଧ୍ୟା ରାୟକୁ ନେଇ ଅଲ୍ ଇଣ୍ଡିଆ ମୁସ୍ଲିମ୍ ପର୍ସନାଲ ଲ ବୋର୍ଡ (ଏଆଇଏମ୍ପିଏଲ୍ବି) ଅସନ୍ତୋଷ ବ୍ୟକ୍ତ କରିଛି। ଏହା ଉପରେ ରିଭ୍ୟୁ ପିଟିଶନ ଦାଏର ଲାଗି ଏହା ବିଚାର କରିବ ବୋଲି କହିଛି। ତେବେ ଉକ୍ତ ସଂଗଠନର କେତେଜଣ ନେତା ଓ କେତେକ ମୁସଲମାନ ସଂଗଠନ ମାମଲାକୁ ଅଧିକ ନ ବଢ଼ାଇବା ଲାଗି ମତ ଦେଇଛନ୍ତି। ଅଧିକାଂଶ ମୁସଲମାନ ସଂଗଠନ ଓ ମୌଲବୀମାନେ ଜନସାଧାରଣଙ୍କୁ ଶାନ୍ତ ରହିବା ଲାଗି ଆହ୍ବାନ ଦେଇଛନ୍ତି। ଏକ ଖବରଦାତା ସମ୍ମିଳନୀରେ ଏଆଇଏମ୍ପିଏଲ୍ବିର ସମ୍ପାଦକ ଜଫରୟାବ ଜିଲାନି କହିଛନ୍ତି, ସୁପ୍ରିମକୋର୍ଟଙ୍କ କେତେକ ଉକ୍ତିରେ ଆମେ ସନ୍ତୁଷ୍ଟ ନୋହୁଁ। ଆମେ ସର୍ବୋଚ୍ଚ ଅଦାଲତଙ୍କୁ ସମ୍ମାନ କରିବା ସହ ଏହାର କେତେକ ଆଭିମୁଖ୍ୟରେ ସହମତ ନ ଥିବା ଜଣାଉଛୁ। ରାୟକୁ ପଢ଼ିବା ପରେ ଏହାର ସମୀକ୍ଷା ପାଇଁ ଆବେଦନ କରିବା ନେଇ ବିଚାର କରିବୁ ବୋଲି ସେ କହିଛନ୍ତି। ତେବେ ଜମାଏତ ଉଲେମା-ଇ-ହିନ୍ଦ୍ ରିଭ୍ୟୁ ପିଟିଶନକୁ ବିରୋଧ କରିଛି। ମାମଲାର ଅନ୍ୟତମ ପକ୍ଷ ଉତ୍ତରପ୍ରଦେଶର ସୁନ୍ନୀ ଓ୍ବାକଫ୍ ବୋର୍ଡ ସୁପ୍ରିମକୋର୍ଟଙ୍କ ରାୟକୁ ସ୍ବାଗତ ଜଣାଇଛି। ରାୟକୁ ଚ୍ୟାଲେଞ୍ଜ କରିବା ଯୋଜନା ନାହିଁ ବୋଲି ବୋର୍ଡର ଅଧ୍ୟକ୍ଷ ଜଫର ଅହମଦ ଫାରୁକି କହିଛନ୍ତି।
