ବାମରା, ୧୮।୪ (ଡି.ଏନ.ଏ)- ସୁନ୍ଦରଗଡରେ ୨ଜଣ କରୋନା ପୋଜିଟିଭ ଚିହ୍ନଟ ହେବା ପରଠାରୁ ସୁନ୍ଦରଗଡ ଜିଲାକୁ ସଂଯୋଗ କରୁଥିବା ସମସ୍ତ ରାସ୍ତାକୁ ସିଲ୍ କରାଯାଇଛି । ମାତ୍ର କେତେକ ସିଲ୍ ଥିବା ସ୍ଥାନରେ କୌଣସି ଜଗୁଆଳି ନ ଥିବା କାରଣରୁ ଅତ୍ୟାବଶ୍ୟକ ସାମଗ୍ରୀ ପରିବହନ କରୁଥିବା ଗାଡିମୋଟର ଓ ଆମ୍ବୁଲାନ୍ସ ଯିବା ଆସିବା କରି ପାରୁନାହିଁ। ସମ୍ବଲପୁର ଜିଲା ବାମରା ବ୍ଲକ କୁଟାରୀମାଲ ପଞ୍ଚାୟତ ଲଲବିରା ଗାଁକୁ ଶୁକ୍ରବାର ଜଣେ ଆହତ ବୃଦ୍ଧାଙ୍କୁ ନେବା ପାଇଁ ବଡଗାଁରୁ ଆସୁଥିବା ୧୦୮ ଆମ୍ବୁଲାନ୍ସଟି ରାସ୍ତା ଅବରୋଧ କାରଣରୁ ଫେରି ଯିବାକୁ ବାଧ୍ୟ ହୋଇଛି।
ଲଲବିରା ଗ୍ରାମର ତେଲେଙ୍ଗା ମୁଣ୍ଡାଙ୍କ ସ୍ତ୍ରୀ ବସନ୍ତି ମୁଣ୍ଡା (୬୨) ଶୁକ୍ରବାର ଦିନ ବେଳେ ପାଖ ନଈକୁ ଗାଧୋଇବା ପାଇଁ ଯାଇଥିଲେ। ମାତ୍ର ତାଙ୍କ ଗୋଡ ଖସିଯିବାରୁ ଆଣ୍ଠୁରେ ଗୁରୁତର ଆଘାତ ହୋଇ ସେ ଅଚେତ ହୋଇ ପଡିଥିଲେ । ତାଙ୍କ ପରିବାର ଲୋକ ୧୦୮ ଆମ୍ବୁଲାନ୍ସକୁ ଫୋନ କରି ସହାୟତା ଲୋଡିଥିଲେ । ସୀମାବର୍ତ୍ତୀ ସୁନ୍ଦରଗଡ ଜିଲା ବଡଗାଁଠାରୁ ଲଲବିରା ଗ୍ରାମ ପାଖରେ ଥିବା ଯୋଗୁଁ ବଡଗାଁ ଡାକ୍ତରଖାନାରୁ ୧୦୮ ଆମ୍ବୁଲାନ୍ସକୁ ଲଲବିରା ଯାଇ ରୋଗୀଙ୍କ ସହାୟତା ପାଇଁ ନିର୍ଦ୍ଦେଶ ହୋଇଥିଲା। ବଡଗାଁରୁ ଆମ୍ବୁଲାନ୍ସଟି କୁରେବଗା ଘୁଙ୍ଗୁଡୁମାଲ ଦେଇ ଲଲବିରାକୁ ବାହାରିଥିଲା। ହେଲେ ରାସ୍ତା ଅବରୋଧ କାରଣରୁ ଆମ୍ବୁଲାନ୍ସ ଫେରି ଯାଇଥିଲା। ଆମ୍ବୁଲାନ୍ସଟି ଫେରି ଯିବା କାରଣରୁ ଗୁରୁତର ଥିବା ବୃଦ୍ଧା ମଧ୍ୟ ଡାକ୍ତରଖାନା ଯିବାରୁ ବଞ୍ଚତ୍ତ ହୋଇଥିଲେ । ଶେଷରେ ପୁଣି ବାମରା ଡାକ୍ତରଖାନାରୁ ପ୍ରାୟ ୧ ଘଣ୍ଟା ବିଳମ୍ବରେ ଆମ୍ବୁଲାନ୍ସଟି ବୃଦ୍ଧାଙ୍କୁ ନେଇ ଗୋବିନ୍ଦପୁର ଡାକ୍ତରଖାନାରେ ପହଞ୍ଚାଇଥିଲା। ପ୍ରାଥମିକ ଚିକିତ୍ସା ପରେ ତାଙ୍କୁ ଛାଡି ଦିଆଯାଇଥିଲା । ହେଲେ ଫେରିବା ପାଇଁ କୌଣସି ସାଧନ ନ ମିଳିବାରୁ ବୃଦ୍ଧାଙ୍କୁ ବହୁ କଷ୍ଟରେ ବାଇକରେ ତାଙ୍କ ଘରକୁ ନିଆଯାଇଥିଲା । ଏ ନେଇ ବଡଗାଁ ୧୦୮ ଆମ୍ବୁଲାନ୍ସର ଡ୍ରାଇଭରଙ୍କୁ ପଚାରି ବୁଝିବାରୁ ରାସ୍ତା ବନ୍ଦ କାରଣରୁ ସେ ଯାଇ ନ ପାରି ଫେରିଗଲେ। ଆଖପାଖରେ ପଚାରିବାରୁ ବାମରା ତହସିଲଦାର ସେହି ସ୍ଥାନରେ ରାସ୍ତା ଅବରୋଧ କରାଇଥିବା ତାଙ୍କୁ ଲୋକେ କହିଥିଲେ। ହେଲେ ରାସ୍ତା ଅବରୋଧ ସ୍ଥଳରେ ଜରୁରୀକାଳୀନ ଯାନ ବାହାନ ଚଳାଚଳକୁ ସୂଚାରୁ କରିବା ପାଇଁ କର୍ମଚାରୀ ମୁତୟନ କରିବା ନିମନ୍ତେ ଲଲବିରା ଗ୍ରାମବାସୀ ଅନୁରୋଧ କରିଛନ୍ତି। ଏ ନେଇ ବାମରା ତହସିଲଦାର ଅନୀଲ କୁଲୁଙ୍କୁ ଫୋନ କରିବାରୁ ତାଙ୍କ ଫୋନ ସ୍ବିଚ୍ ଅଫ୍ ରହିଥିଲା।
