ବାଲେଶ୍ୱର ଅଫିସ, ୨୫।୮-ବାଲେଶ୍ୱର ସହରର ଉତ୍ତର-ପୂର୍ବ ଦିଗ ଓଟିରୋଡ୍ରେ ଥିବା ସରକାରୀ ଆଇଟିଆଇ କଲେଜ ପରିସରରେ ଦେଇ ଯାଇଥିବା ପକ୍କା ରାସ୍ତାକୁ ବନ୍ଦ କରିବା ଲାଗି ଆଇଟିଆଇ କର୍ତ୍ତୃପକ୍ଷ ପୋଲିସ ସହାୟତାରେ ଉଦ୍ୟମ କରୁଥିବା ବେଳେ ସ୍ଥାନୀୟ ଲୋକେ ଏହାକୁ ବିରୋଧ କରିଛନ୍ତି। ଏହାକୁ ନେଇ ଉକ୍ତ ଅଞ୍ଚଳରେ କିଛି ସମୟ ପାଇଁ ଉତ୍ତେଜନା ଦେଖାଦେଇଥିଲା। ପୋଲିସ ଉତ୍ତ୍ୟକ୍ତ ଲୋକଙ୍କ ସହ ଆଲୋଚନା କରି ରାସ୍ତା ବନ୍ଦ କରାଯିବ ନାହିଁ ବୋଲି ପ୍ରତିଶ୍ରୁତି ଦେବା ପରେ ପରିସ୍ଥିତି ସ୍ବାଭାବିକ ହୋଇଛି।
ଏହି ରାସ୍ତା କରଞ୍ଜିଆ ଗ୍ରାମକୁ ସଂଲଗ୍ନ କରିଛି। ଜନସ୍ବାସ୍ଥ୍ୟ ବିଭାଗ ପମ୍ପହାଉସ୍ର କେତେକ କର୍ମଚାରୀ ସରକାରୀ ଆଇଟିଆଇ ପଛପଟେ ଥିବା ସରକାରୀ ଜମିରେ ଦୀର୍ଘଦିନ ଧରି ରହି ଆସୁଛନ୍ତି। ସେମାନଙ୍କ ପରିବାର ଲୋକମାନେ ଯା’ଆସ ପାଇଁ ନିର୍ମିତ ରାସ୍ତାରେ ସ୍ଥାନୀୟ ଲୋକମାନେ ବ୍ୟବହାର କରୁଛନ୍ତି। କିଛିଦିନ ପୂର୍ବରୁ ଜନସ୍ବାସ୍ଥ୍ୟ ବିଭାଗର କ୍ୱାର୍ଟର୍ସ ଏବଂ ପୂର୍ତ୍ତବିଭାଗ ଜମି ଆଇଟିଆଇ କଲେଜର ସମ୍ପ୍ରସାରଣ ପାଇଁ ଉକ୍ତ ଜମିକୁ ବିଧିବଦ୍ଧ ଭାବେ ଗ୍ରହଣ ଲାଗି ସରକାରଙ୍କଠାରେ ଆବେଦନ କରାଯାଇଥିଲା। ଜିଲା ପ୍ରଶାସନର ସହାୟତାରେ ଶନିବାର କାର୍ଯ୍ୟାନୁଷ୍ଠାନ ଆରମ୍ଭ ହୋଇଥିଲା। ସ୍ଥାନୀୟ ଲୋକମାନେ ଏହାକୁ ବିରୋଧ କରିଥିଲେ। ଜମିରେ ରାସ୍ତା ହୋଇଥିବା କାରଣରୁ କର୍ମଚାରୀ ଏବଂ ଛାତ୍ରୀଛାତ୍ରମାନେ ନାହଁି ନ ଥିବା ଅସୁବିଧାରେ ସମ୍ମୁଖୀନ ହେଉଥିବାବେଳେ ଉକ୍ତ ରାସ୍ତାରେ ବିଭିନ୍ନ ସମୟରେ ଦୁର୍ବୃତ୍ତମାନେ ଚଳପ୍ରଚଳ କରି ବିଭିନ୍ନ ପ୍ରକାର ବେଆଇନ କାର୍ଯ୍ୟ ଘଟାଇଥାନ୍ତି। ଫଳରେ ଉକ୍ତ ରାସ୍ତାକୁ ବନ୍ଦ କରିବା ପାଇଁ ପ୍ରଶାସନକୁ ଜଣାଇଥିବାର ଆଇଟିଆଇ ଅଧ୍ୟକ୍ଷ କୃଷ୍ଣ ଚନ୍ଦ୍ର ରାଉତ କହିଛନ୍ତି। ଗ୍ରାମବାସୀଙ୍କ ପାଇଁ ଅନ୍ୟ ଏକ ରାସ୍ତା ମଧ୍ୟ ରହିଛି। ଉକ୍ତ ରାସ୍ତା ଗ୍ରାମବାସୀଙ୍କୁ ଯା’ଆସରେ ସହଜ ହେଉ ନ ଥିବାରୁ ସ୍ଥାନୀୟ ବାସିନ୍ଦା ଏହାକୁ ବିରୋଧ କରିଛନ୍ତି। ସ୍ଥାନୀୟ ବାସିନ୍ଦା ଦିବାକର ଜେନାଙ୍କ କହିବାନୁସାରେ ଉକ୍ତ ଜମି ପୂର୍ତ୍ତବିଭାଗର ନୁହେଁ, ଜଣେ ବ୍ୟକ୍ତିଙ୍କର ଜମି ଅଟେ। ବନ୍ଦୋବସ୍ତରେ ଭୁଲ୍ବଶତଃ ପୂର୍ତ୍ତବିଭାଗ ନାମରେ ନାମିତ ହୋଇଯାଇଛି। ଦୀର୍ଘଦିନ ଧରି ରାସ୍ତାଟି ନକ୍ସାରେ ରହିଛି। ବେଆଇନ ଭାବେ ଆଇଟିଆଇ ଅଧ୍ୟକ୍ଷ ଏହାକୁ ଉଚ୍ଛେଦ କରିବା ପାଇଁ ଚେଷ୍ଟା କରୁଥିବା ଅଭିଯୋଗ କରିଛନ୍ତି। ରମେଶ ଚନ୍ଦ୍ର ପତି, ଭାନୁମତୀ ନାୟକ, ରଜନୀ ମହାଳିକ, ସବିତା ଜେନା, ରଘୁନାଥ ନାୟକ, ବିଶ୍ୱନାଥ ନାୟକ, ଅନୁରାଗ ମହାନ୍ତି, ମିନତୀ ନାୟକ, ଅନୁସୟା ରଣା, ମମତା ମଜୁମଦାର ପ୍ରମୁଖ ଏହାକୁ ବିରୋଧ କରିବା ସହ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀ ଏବଂ ସଦର ବିଧାୟକ ମଦନମୋହନ ଦତ୍ତଙ୍କୁ ସମସ୍ୟାର ସମାଧାନ ନିମନ୍ତେ ଲିଖିତ ଭାବେ ଜଣାଇଛନ୍ତି। ଏସ୍ଡ଼ିପିଓ ପ୍ରଭାସ ଚନ୍ଦ୍ର ପାଲ, ଶିଳ୍ପାଞ୍ଚଳ ଥାନାଧିକାରୀ ଜୟନ୍ତ ବେହେରା, ସଦର ତହସିଲଦାର ପଞ୍ଚାନନ ପାତ୍ର ଘଟଣାସ୍ଥଳରେ ପହଞ୍ଚତ୍ ଲୋକଙ୍କ ସହ ଆଲୋଚନା କରି ଜମିର ପ୍ରକୃତ ସ୍ଥିତି ଜାଣିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେବା ପରେ ବିରୋଧ ହଟିଥିଲା।
