ହିଞ୍ଜିଳିକାଟୁ,୭ା୭(ଡ଼ି.ଏନ୍.ଏ.) -ହିଞ୍ଜିଳିକାଟୁ ବ୍ଲକ ଗଣ୍ଡଳା ପଞ୍ଚାୟତ ପଳାସି ଗ୍ରାମର ଏକ ରାସ୍ତା କାମ ଓ ଆଦର୍ଶ ପୋଖରୀ ଖୋଳାରେ ବ୍ୟାପକ ଅନିୟମିତତା ଅଭିଯୋଗ ହୋଇଛି। ଗ୍ରାମରେ ୬ଲକ୍ଷ ଟଙ୍କାରେ ରାସ୍ତା କାମ ଓ ୧୫ଲକ୍ଷ ଟଙ୍କାର ଆଦର୍ଶ ପୋଖରୀ ଖନନ କରାଯାଉଛି। ବ୍ଲକର ପୂର୍ବତନ କଂଗ୍ରେସ ସଭାପତି ପଦ୍ମ ଚରଣ ସାହୁ ଏହି ୨ଟି କାମରେ ବ୍ୟାପକ ଅନିୟମିତତା ଅଭିଯୋଗ ଆଣି ବିଡିଓ, ଛତ୍ରପୁର ଉପ ଜିଲାପାଳ ଓ ଜିଲାପାଳଙ୍କ ହସ୍ତକ୍ଷେପ ଲୋଡ଼ିଛନ୍ତି। ଏନେଇ ସେ ଅଭିଯୋଗ କରିବାରୁ ଧମକ ଦିଆଯାଉଥିବା ମଧ୍ୟ କହିଛନ୍ତି।
ପ୍ରକାଶ ଯେ, ପଳାସି ଗ୍ରାମର ଶୁଣ୍ଢିସାହି ଠାରୁ ପୂର୍ତ୍ତ ବିଭାଗ ପର୍ଯ୍ୟନ୍ତ କଂକ୍ରିଟ ରାସ୍ତା ୬ଲକ୍ଷ ଅଟକଳ ମୂଲ୍ୟରେ ଗତ ମାର୍ଚ୍ଚରେ କାର୍ଯ୍ୟ ଶେଷ ହୋଇଥିଲା। ନିର୍ମାଣର ୩ ମାସ ମଧ୍ୟରେ ରାସ୍ତାର ବହୁଅଂଶ ଖରାପ ହୋଇଗଲାଣି। ସିମେଣ୍ଟ ଛାଡି ଗୋଡି ଦେଖା ଯାଉଥିବାବେଳେ ବର୍ଷାପାଣି ଜମୁଛି। ବ୍ଲକର ଜଣେ କନିଷ୍ଠ ଯନ୍ତ୍ରୀଙ୍କ ନାମରେ କାର୍ଯ୍ୟାଦେଶ ଥାଇ ଅନିୟମିତତା ହୋଇଥିବା ସାହୁ ଅଭିଯୋଗ କରିଛନ୍ତି। ଅନ୍ୟ ପକ୍ଷରେ ପଳାସୀ ଗ୍ରାମର ପାଣିଗ୍ରାହୀ ପୋଖରୀକୁ ୮ମାସ ତଳେ ଆଦର୍ଶ ପୋଖରୀ ଯୋଜନାରେ ୫ଲକ୍ଷ ଟଙ୍କା ମଞ୍ଜୁର କରାଯାଇ କାମ ହୋଇଛି। କାମ ନ’ସରୁଣୁ ସେହି ପୋଖରୀକୁ ଏମଜିଏନ୍ଆରଇଜିଏସ ଯୋଜନାରେ ୧୦ଲକ୍ଷ ଟଙ୍କା ପ୍ରଦାନ କରାଯାଇ ହରିଲୁଟ ପାଇଁ ଯୋଜନା କରାଯାଇଛି ବୋଲି ସାହୁ ଅଭିଯୋଗ କରିଛନ୍ତି। ପୋଖରୀ କାମ ହେତୁ ଦୀର୍ଘ ୮ମାସ ଧରି ଗ୍ରାମର ଲୋକେ ପାଣି ନ’ ପାଇ ଅସୁବିଧାର ସମ୍ମୁଖୀନ ହେଉଛନ୍ତି। ଏନେଇ ବ୍ଲକ ସହକାରୀ ଯନ୍ତ୍ରୀ ହେମନ୍ତ କୁମାର ହୋତାଙ୍କ ସହ ଯୋଗାଯୋଗ ପରେ ଶୁଣ୍ଢିସାହି ଠାରୁ ପୂର୍ତ୍ତ ବିଭାଗ ରୋଡ଼ ପର୍ଯ୍ୟନ୍ତ ସିମେଣ୍ଟ କଂକ୍ରିଟ ରାସ୍ତାକୁ ଗ୍ରାମରେ ପଲ୍ଲୀସଭା କରାଯାଇ ଜଣେ ବ୍ୟକ୍ତିଙ୍କୁ ପ୍ରଦାନ କରାଯାଇଛି। ଅଭିଯୋଗ ପରେ ତଦନ୍ତ କରାଯାଇଛି। ଉକ୍ତ ଗ୍ରାମ୍ୟ ରାସ୍ତା ଦେଇ ହାଇୱାରେ ବାଲି ଓ ପଥର ଯାଉଥିବାରୁ ରାସ୍ତାର କିଛି ଅଂଶ ଖରାପ ହୋଇଛି। କାମ କରିଥିବା ବ୍ୟକ୍ତିଙ୍କୁ ମରାମତି ପାଇଁ ନିର୍ଦ୍ଦେଶ ଦିଆଯାଇଛି ବୋଲି ଯନ୍ତ୍ରୀ ହୋତା କହିଛନ୍ତି।
