ଔରଙ୍ଗାବାଦ, ୧୧।୬: ମହାରାଷ୍ଟ୍ର ବୁଲଧାନା ଜିଲାରେ ଥିବା ଲୋନାର ହ୍ରଦର ପାଣିର ରଙ୍ଗ ରାତାରାତି ଗୋଲାପି ରଙ୍ଗ ପାଲଟି ଯାଇଛି। ଏହାକୁ ନେଇ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଆତଙ୍କ ଦେଖାଦେଇଛି। ଏହା କିପରି ହେଲା ସେ ନାନା କଳ୍ପାନ ଜଳ୍ପନା ପ୍ରକାଶ ପାଇଛି। ବିଶେଷଜ୍ଞଙ୍କ ଅନୁସାରେ ହ୍ରଦ ପାଣିରେ ଲବଣ ମାତ୍ରା ବଢ଼ିବା ସହିତ ଶୈବାଳ ଯୋଗୁ ଏଭଳି ହୋଇଛି। ଏଭଳି ବହୁଥର ହ୍ରଦ ପାଣିର ରଙ୍ଗ ପରିବର୍ତ୍ତନ ହୋଇଛି। ତେବେ ଚଳିତଥର ଏହା ଗାଢ଼ ଗୋଲାପି ରଙ୍ଗ ହୋଇଯାଇଛି। ମୁମ୍ବାଇଠାରୁ ୫୦୦ କିମି ଦୂରରେ ଥିବା ଏହି ହ୍ରଦର ପାଣିର ପିଏଚ୍ ସ୍ତର ୧୦.୫ ରହିଛି। ଏନେଇ ହ୍ରଦ ସଂରକ୍ଷଣ ଟିମ୍ ସଦସ୍ୟ ଗଜାନନ ଖରାତ୍ ସୂଚନା ଦେଇଛନ୍ତି। ହ୍ରଦ ପାଣିର ଲବଣସ୍ତର ରଙ୍ଗ ପରିବର୍ତ୍ତନ ପାଇଁ ଦାୟୀ ବୋଲି ସେ କହିଛନ୍ତି। ହ୍ରଦର ଜଳସ୍ତରର ଏକ ମିଟର ତଳେ ଅମ୍ଳଜାନ ନ ଥିବାରୁ ଶୈବାଳର ରଙ୍ଗ ମଧ୍ୟ ପରିବର୍ତ୍ତନ ହୋଇ ଯାଇଥିବା ସେ କହିଛନ୍ତି। ଏଠାରେ ବର୍ଷା ପରିମାଣ କମ ରହିଥାଏ ତେଣୁ ହ୍ରଦ ପାଣି ପରିଷ୍କାର ହେବାର ସମ୍ଭାବନା ମଧ୍ୟ ନ ଥାଏ। ତେଣୁ ଦୀର୍ଘ ଦିନ ଧରି ଗୋଟିଏ ସ୍ଥାନରେ ପାଣି ଜମି ରହୁଥିବାରୁ ଏଭଳି ହେଉଥିବା ବାବା ସାହେବ ଆମ୍ବେଡ଼କର ମରାଠାଓ୍ବାଡ଼ା ବିଶ୍ୱବିଦ୍ୟାଳୟର ଜିଓଗ୍ରାଫି ବିଭାଗ ପ୍ରଫେସର ମଦନ ସୂର୍ଯ୍ୟବଂଶୀ ସୂଚନା ଦେଇଛନ୍ତି। ସୂଚନାଯୋଗ୍ୟ, ୫୦ ହଜାର ବର୍ଷ ତଳେ ବଡ଼ ଉଲ୍କା ଖଣ୍ଡ ଏଠାରେ ପଡ଼ିଥିଲା। ଫଳରେ ୧.୨ କିଲୋମିଟର ବ୍ୟାସ ବିଶିଷ୍ଟ ଏକ ଗର୍ତ୍ତ ଏଠାରେ ସୃଷ୍ଟି ହୋଇଥିଲା। କାଳକ୍ରମେ ଏହା ହ୍ରଦରେ ପରିଣତ ହୋଇଥିବା କୁହାଯାଉଛି।
