ରସୁଲପୁର,୧୬ା୬(ଡି.ଏନ୍.ଏ.)- ରସୁଲପୁର ବ୍ଲକ ଅନ୍ତର୍ଗତ କୁଆଖିଆ ବଜାରଠାରେ ୩ ଦିନ ଧରି ଚାଲିଥିବା ରାଜ୍ୟସ୍ତରୀୟ କବାଡ଼ି ପ୍ରତିଯୋଗିତା ଶୁକ୍ରବାର ରାତିରେ ଉଦ୍ଯାପିତ ହୋଇଛି। ଏଠାରେ ଅନୁଷ୍ଠିତ ଉଭୟ ପୁରୁଷ ଓ ମହିଳା ବିଭାଗର ଫାଇନାଲ ମ୍ୟାଚ୍ ଅତ୍ୟନ୍ତ ଚିତାକର୍ଷକ ହୋଇଥିଲା। ପୁରୁଷ ବିଭାଗର ଫାଇନାଲରେ ପ୍ରତିଷ୍ଠିତ କଟକ କବାଡି ଦଳ ଦୃଢ ପ୍ରତିପକ୍ଷ ଗୁଗୁଲ ସ୍ପୋର୍ଟିଂକୁ ପରାସ୍ତ କରି ଚାମ୍ପିୟନ ହୋଇଥିବାବେଳେ ମହିଳା ବିଭାଗରେ ଗୁଗୁଲ ସ୍ପୋର୍ଟିଂ ଭୁବନେଶ୍ୱର ଦଳ ଆୟୋଜକ କୁଆଖିଆ ସ୍ପୋର୍ଟିଂକୁ ପରାସ୍ତ କରି ଚଳିତବର୍ଷ ପାଇଁ ଟ୍ରଫି ହାସଲ କରିଛନ୍ତି।
ପ୍ରଥମେ ଅନୁଷ୍ଠିତ ମହିଳା ବିଭାଗର ଫାଇନାଲ ମ୍ୟାଚ୍ରେ ଗୁଗୁଲ ସ୍ପୋର୍ଟିଂ ଓ କୁଆଖିଆ ମଧ୍ୟରେ ଖେଳା ଯାଇଥିଲା। ଖେଳ ଆରମ୍ଭରୁ ଖୁବ୍ ଚିତାକର୍ଷକ ହୋଇଥିଲା। ସମ୍ପୂର୍ଣ୍ଣ ମ୍ୟାଚଟି ସଂଘର୍ଷପୂର୍ଣ୍ଣ ରହିଥିଲା। ମାତ୍ର ମ୍ୟାଚ ଶେଷ ବେଳକୁ ଗୁଗୁଲ ସ୍ପୋର୍ଟିଂକୁ ୨୪ ପଏଣ୍ଟ ମିଳିଥିବାବେଳେ କୁଆଖିଆ ସ୍ପୋର୍ଟିଂ ୨୨ ପଏଣ୍ଟ ହାସଲ କରିଥିଲା। ଆୟୋଜକ ଦଳ ମାତ୍ର ୨ ପଏଣ୍ଟ ପଛରେ ରହି ଚାମ୍ପିୟନ ହେବାରୁ ବଞ୍ଚତ୍ତ ହୋଇଥିଲା। ସେହିଭଳି ପୁରୁଷ ଫାଇନାଲ ମ୍ୟାଚ କଟକ ଓ ଗୁଗୁଲ ସ୍ପୋର୍ଟିଂ ମଧ୍ୟରେ ଅନୁଷ୍ଠିତ ହୋଇଥିଲା। ମ୍ୟାଚ୍ ଶେଷ ସୁଦ୍ଧା କଟକ ଦଳ ୩୦ ପଏଣ୍ଟ ହାସଲ କରିଥିବାବେଳେ ଗୁଗୁଲ ଟିମ୍କୁ ୧୪ ପଏଣ୍ଟ ହାସଲ କରି ପରାଜୟ ବରଣ କରିଥିଲା ା ଟ୍ରଫି ପ୍ରଦାନ ଉତ୍ସବରେ କୋରେଇ ବିଧାୟକ ଅଶୋକ କୁମାର ବଳ ମୁଖ୍ୟ ଅତିଥି ଭାବରେ ଯୋଗଦେଇ ଉଭୟ ମହିଳା ଓ ପୁରୁଷ ଦଳକୁ ଟ୍ରଫି ପ୍ରଦାନ କରିଥିଲେ। କୁଆଖିଆ ସ୍ପୋର୍ଟିଂ କ୍ଲବର ସଭାପତି ପୂର୍ଣ୍ଣଚନ୍ଦ୍ର ସେଠୀଙ୍କ ଅଧ୍ୟକ୍ଷତାରେ ଉଦ୍ଯାପନୀ ସଭା ଅନୁଷ୍ଠିତ ହୋଇଥିଲା। ଏଥିରେ ମୁଗୁପାଳ ସରପଞ୍ଚ ଭାବାନୀ ଶଙ୍କର ପଣ୍ଡା, ବାହାଦଲାପୁର ସମିତି ସଭ୍ୟ ବିଜୟ ଦାସ, ପୂର୍ବତନ ସରପଞ୍ଚ ଶିଶିର କୁମାର ମହାନ୍ତି, ଶ୍ରୀଧର ବିଶ୍ୱାଳ ପ୍ରମୁଖ ସମ୍ମାନିତ ଅତିଥି ଭାବରେ ଯୋଗଦେଇ ଥିଲେ। କ୍ଲବର ସମ୍ପାଦକ ଚନ୍ଦ୍ର ଶେଖର ସ୍ବାଇଁ ସ୍ବାଗତ ଭାଷଣ ଓ ଅତିଥି ପରିଚୟ ପ୍ରଦାନ କରିଥିବାବେଳେ ଯୁବନେତା ପ୍ରଶାନ୍ତ କୁମାର ପଣ୍ଡା ଧନ୍ୟବାଦ ଅର୍ପଣ କରିଥିଲେ।
