ପାରାଦୀପ,୧୨ା୧୧(ସ୍ବ.ପ୍ର.): ପାରାଦୀପ ମଡେଲ୍ ଥାନା ଅଧୀନ ଅଠରବାଙ୍କି ଲକ୍ଫଡ଼ାସ୍ଥିତ ଜଗନ୍ନାଥ ଟ୍ରକ ମାଲିକ ସଂଘ କାର୍ଯ୍ୟାଳୟରେ ମୋବାଇଲ ଫାଟିବାରୁ ଜଣେ ଶ୍ରମିକଙ୍କ ମୃତ୍ୟୁଘଟିଛି। ମୃତକ ହେଲେ ନୟାଗଡ଼ ଜିଲା ରଣପୁର ଅଞ୍ଚଳର ମୁନା ପ୍ରଧାନ(୩୫)। ସେ ସଂଘ କାର୍ଯ୍ୟାଳୟ ପରିସରରେ ଥିବା ଜଗନ୍ନାଥ ମନ୍ଦିରରେ ପ୍ରାୟ ଏକ ମାସ ହେବ କାର୍ଯ୍ୟ କରୁଥିଲେ। ରବିବାର ରାତିରେ ଶୋଇଥିବାବେଳେ ମୋବାଇଲ ଛାତିରେ ରଖି ଚାର୍ଜ କରୁଥିଲେ। ଏହି ସମୟରେ ମୋବାଇଲଟି ଫାଟି ଯିବାରୁ ତାଙ୍କ ମୁହଁ ସମେତ ଛାତି ପୋଡ଼ି ଯାଇଥିଲା। ଏହାର କିଛି ସମୟ ପରେ ତାଙ୍କର ମୃତ୍ୟୁ ଘଟିଥିଲା। ଖବର ପାଇ ସୋମବାର ପୋଲିସ ଓ ସାଇଣ୍ଟିଫିକ୍ ଟିମ୍ ପହଞ୍ଚତ୍ ଘଟଣାର ତଦନ୍ତ କରିଛନ୍ତି। ଏଥିସହିତ ସାଇଣ୍ଟିଫିକ୍ ଟିମ୍ ଓ ପୋଲିସ ସେଠାରେ ଥିବା ଅନ୍ୟ ଦୁଇ ଜଣଙ୍କୁ ପଚରାଉଚରା କରିଛନ୍ତି। ସେମାନେ କହିଛନ୍ତି, ରାତିରେ ସଂଘ କାର୍ଯ୍ୟାଳୟର ଉପର ଘରେ ୩ଜଣ ଅଲଗା ଭାବେ ଶୋଇଥିଲେ। ମୁନା ମୋବାଇଲରେ ଚାର୍ଜର ଲଗାଇ ବ୍ୟବହାର କରୁଥିଲେ। ସେହି ଭିତରେ ନୀଦ ଲାଗିବାରୁ ମୋବାଇଲକୁ ଛାତି ଉପରେ ରଖି ଶୋଇ ପଡ଼ିଥିଲେ। ପରେ ମୋବାଇଲ ଗରମ ହୋଇ ଫାଟିଥିଲା। ପ୍ରଚଣ୍ଡ ଶବ୍ଦ ଶୁଣି ଆମେ ଉଠି ପଡ଼ିଥିଲୁ।
