ନୂଆଦିଲ୍ଲୀ,୧୪।୪: କରୋନା ସଂକ୍ରମଣ ଯୋଗୁ ଭାରତରେ ସୃଷ୍ଟି ହୋଇଥିବା ପରିସ୍ଥିତିର ମୁକାବିଲା ପାଇଁ ପ୍ରଧାନମନ୍ତ୍ରୀ ଲକ୍ଡାଉନ୍ ସମୟ ସୀମାକୁ ମେ ୩ ପର୍ଯ୍ୟନ୍ତ ବୃଦ୍ଧି କରିଛନ୍ତି। ଏହି ଅବସରରେ ସେ ସପ୍ତପଦୀ ସମ୍ପର୍କରେ ସୂଚନା ଦେବା ସହିତ କରୋନା ସହିତ ସଫଳ ଲଢ଼େଇ ଲାଗି ସାତମନ୍ତ୍ର ବତାଇଛନ୍ତି। ବରିଷ୍ଠ ବ୍ୟକ୍ତି ବିଶେଷଙ୍କ ଯତ୍ନ ନେବା ସହିତ ସେମାନଙ୍କ ପ୍ରତି ଅଧିକ ଧ୍ୟାନ ରଖିବାକୁ ସେ ପରାମର୍ଶ ଦେଇଛନ୍ତି। ସେହିପରି ସାମାଜିକ ଦୂରତା ଏବଂ ମାସ୍କ୍ ପିନ୍ଧିବା ଉପରେ ସେ ଗୁରୁତ୍ୱ ପ୍ରଦାନ କରିଛନ୍ତି। ଆୟୁଷ ମନ୍ତ୍ରଣାଳୟ ପକ୍ଷରୁ ଉଷୁମ ପାଣି, ହର୍ବାଲ ଚା କାଢ଼ା ପିଇବା ପାଇଁ ପରାମର୍ଶ ଦିଆଯାଇଥିବାବେଳେ ପ୍ରଧାନମନ୍ତ୍ରୀ ଏଭଳି କରିବାକୁ ଦେଶବାସୀଙ୍କୁ ପରାମର୍ଶ ଦେଇଛନ୍ତି। ଆରୋଗ୍ୟ ସେତୁ ଆପ୍ ଡାଉନ୍ ଲୋଡ୍ କରି ଅନ୍ୟମାନଙ୍କ ପାଖକୁ ପଠାଇବାକୁ ସେ କହିଛନ୍ତି। ଗରିବ ପରିବାରଙ୍କୁ ନିଜର ସାଧ୍ୟ ମୁତାବକ ସହାୟତା କରିବାକୁ ମୋଦି କହିଛନ୍ତି। ଘରୋଇ ଉଦ୍ୟୋଗରେ କାମ କରୁଥିବା କର୍ମଚାରୀଙ୍କୁ ଛଟେଇ ନ କରିବା ଉପରେ ସେ ଗୁରୁତ୍ୱାରୋପ କରିଛନ୍ତି। ସେହିପରି ଡାକ୍ତର, ନର୍ସ, ପୋଲିସ ଏବଂ ସଫେଇ କର୍ମଚାରୀ ଆଦି କରୋନା ଯୋଦ୍ଧାକୁ ସମ୍ମାନ କରିବାକୁ ପ୍ରଧାନମନ୍ତ୍ରୀ ପରାମର୍ଶ ଦେଇଛନ୍ତି।
