ନୂଆଦିଲ୍ଲୀ,୨୯।୫: ନରେନ୍ଦ୍ର ମୋଦି ଔପଚାରିକତା ଭାବେ ଦ୍ୱିତୀୟ ଥର ପାଇଁ ଗୁରୁବାର ପ୍ରଧାନମନ୍ତ୍ରୀ ରୂପେ ଶପଥ ଗ୍ରହଣ କରିବେ। ମୋଦିଙ୍କ ଶପଥ ଗ୍ରହଣ ସମାରୋହ ଲାଗି ନୂଆଦିଲ୍ଲୀର ରାଇସିନା ହିଲ ସ୍ଥିତ ରାଷ୍ଟ୍ରପତି ଭବନ ପରିସରରେ ବ୍ୟାପକ ଆୟୋଜନ ଓ ପ୍ରସ୍ତୁତି କରାଯାଇଛି। ଏହି ଶପଥ ଗ୍ରହଣରେ ଦେଶ ବିଦେଶରୁ ପ୍ରାୟ ୬ହଜାର ୫ଶହ ହାଇପ୍ରୋଫାଇଲ ଅତିଥି ଯୋଗଦେବାର କାର୍ଯ୍ୟକ୍ରମ ରହିଛି। ଗୁରୁବାର ସନ୍ଧ୍ୟା ୭ଟାରେ ଆୟୋଜିତ ହେବାକୁ ଥିବା ଏହି ଶପଥ ଗ୍ରହଣ ଉତ୍ସବରେ ଯୋଗଦେଇଥିବା ଅତିଥିମାନଙ୍କ ପାଇଁ ରାତ୍ର ଭୋଜନର ସ୍ବତନ୍ତ୍ର ବ୍ୟବସ୍ଥା ହୋଇଛି। ରାଷ୍ଟ୍ରପତି ଭବନ ପକ୍ଷରୁ ଅତିଥିଙ୍କ ପାଇଁ ‘ଶାହୀ ଦାଓ୍ବତ’ର ବ୍ୟବସ୍ଥା କରାଯାଇଛି। ଏଥିରେ ରାଷ୍ଟ୍ରପତି ଭବନର ପ୍ରମୁଖ ରାନ୍ଧୁଣିଆମାନଙ୍କ ଦ୍ୱାରା ପ୍ରସ୍ତୁତ ଉଭୟ ଆମିଷ ଓ ନିରାମିଷର ଏକାଧିକ ବ୍ୟଞ୍ଜନ ରହିଛି। ଏହି ରାତ୍ର ଭୋଜନରେ ଖାସ୍ ବ୍ୟଞ୍ଜନ ରହିଛି ରାଷ୍ଟ୍ରପତି ଭବନର ‘ସିଗ୍ନେଚର୍ ଡିସ୍’ ରୂପେ ଖ୍ୟାତ ‘ଡାଲ ରାଇସିନା’। ଶପଥ ଗ୍ରହଣ ଉତ୍ସବ ଅନୁଷ୍ଠିତ ହେବା ପୂର୍ବରୁ ଆସିଥିବା ଅତିଥିଙ୍କ ପାଇଁ ‘ହାଇ-ଟି’ ପ୍ରଦାନ କରାଯିବ। ଏଥିରେ ଚା’, କଫି, ଲେମ୍ବୁ ସରବତ୍ଠାରୁ ଆରମ୍ଭ କରି ନିରାମିଷ ଓ ଆମିଷରେ ଅନେକ ପ୍ରକାରର ଜଳଖିଆ ରହିବ। ନିରାମିଷରେ ବିଭିନ୍ନ ପ୍ରକାରର ସିଙ୍ଗଡ଼ା ଓ ପକୋଡ଼ା ରହିଥିବା ବେଳେ ଆମିଷରେ ବିଭିନ୍ନ କିସମର କଟ୍ଲେଟ୍ ସହ ପକୋଡ଼ା ମଧ୍ୟ ରହିଛି। ଆଉ ମିଠାରେ ରହିଛି ରାଜଭୋଗ। ଏହି ବ୍ୟଞ୍ଜନଗୁଡ଼ିକ ତିଆରି ପାଇଁ ୪୮ଘଣ୍ଟାର ସମୟ ଲାଗୁଥିବାରୁ ରାଷ୍ଟ୍ରପତି ଭବନର ରାନ୍ଧୁଣିଆମାନେ ମଙ୍ଗଳବାରଠାରୁ ପ୍ରସ୍ତୁତି ଆରମ୍ଭ କରିସାରିଲେଣି। ଚଳିତ ବର୍ଷ ସମାରୋହର ପ୍ରସ୍ତୁତି ପ୍ରାୟ ୨୦୧୪ ଭଳି ବୋଲି ଚର୍ଚ୍ଚା ହେଉଛି।
