ନୂଆଦିଲ୍ଲୀ,୪।୬: ମୁଜାଫର୍ପୁର ସେଲ୍ଟର ହୋମ୍ ମାମଲାରେ ତଦନ୍ତ ଶେଷ କରିବା ଲାଗି ସୁପ୍ରିମକୋର୍ଟ ସୋମବାର ସିବିଆଇକୁ ୩ ମାସର ମହଲତ ଦେଇଛନ୍ତି। ସର୍ବୋଚ୍ଚ ଅଦାଲତର ଅବକାଶକାଳୀନ ଖଣ୍ଡପୀଠର ବିଚାରପତି ଇନ୍ଦୁ ମାଲ୍ହୋତ୍ରା ଓ ବିଚାରପତି ଏମ୍.ଆର୍. ଶାହ ସେଲ୍ଟର ହୋମ୍ରେ ଚାଲିଥିବା ଅପ୍ରାକୃତିକ ଯୌନ ନିର୍ଯାତନା ଓ ନାରୀ ନିର୍ଯାତନା ଅଭିଯୋଗର ପୁଙ୍ଖାନୁପୁଙ୍ଖ ତଦନ୍ତ କରିବା ଲାଗି ସିବିଆଇକୁ ନିର୍ଦ୍ଦେଶ ଦେଇଛନ୍ତି। ଏକ ଏନ୍ଜିଓ ଦ୍ୱାରା ପରିଚାଳିତ ଏହି ସେଲ୍ଟର ହୋମ୍ରେ ଅନେକ ଯୁବତୀଙ୍କୁ ଯୌନ ନିର୍ଯାତନା ଦିଆଯାଇଥିବା ଅଭିଯୋଗ ହୋଇଥିଲା। ଏଗୁଡ଼ିକର ଭିଡିଓ ରେକର୍ଡିଂର ତଦନ୍ତ କରିବା ଲାଗି ନିର୍ଦ୍ଦେଶ ଦିଆଯାଇଛି। ଅନ୍ତେବାସୀଙ୍କୁ ନିଶା ଦ୍ରବ୍ୟ ଯୋଗାଇବା ଓ ବିଭିନ୍ନ ଯୌନ କେଳେଙ୍କାରୀରେ ସମ୍ପୃକ୍ତ ଥିବା ବାହାର ଲୋକଙ୍କ ଭୂମିକାକୁ ତଦନ୍ତ ପରିସରଭୁକ୍ତ କରିବା ଲାଗି ଖଣ୍ଡପୀଠ ନିର୍ଦ୍ଦେଶ ଦେଇଛନ୍ତି। ମାମଲାର ତଦନ୍ତ ଶେଷ କରି ୩ ମାସ ମଧ୍ୟରେ ଏହାର ରିପୋର୍ଟ ଦାଖଲ କରିବାକୁ ସିବିଆଇକୁ ନିର୍ଦ୍ଦେଶ ନିଆଯାଇଛି। ପ୍ରକାଶ ଯେ, ପୂର୍ବରୁ ଜୁନ୍ ୩ ସୁଦ୍ଧା ତଦନ୍ତ ଶେଷ କରିବା ଲାଗି ସୁପ୍ରିମକୋର୍ଟ ନିର୍ଦ୍ଦେଶ ଦେଇଥିଲେ। ସେଲ୍ଟର ହୋମ୍ରେ ୧୧ ଯୁବତୀଙ୍କୁ ହତ୍ୟା କରାଯିବା ଘଟଣାର ଷ୍ଟାଟସ୍ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଥିଲା। ସତ୍ୟପାଠରେ ତଦନ୍ତକାରୀ ଦଳ ମୁଖ୍ୟ ଅଭିଯୁକ୍ତ ବ୍ରଜେଶ ଠାକୁର ଓ ସହଯୋଗୀଙ୍କ ନାମ ଦର୍ଶାଇବା ସହ କେତେକ ହାଡ଼ ଠାବ କରିଥିବା କହିଥିଲା। ପରେ ସିବିଆଇ ଏହି ମାମଲାରେ ମୁଖ୍ୟ ଅଭିଯୁକ୍ତ ବ୍ରଜେଶଙ୍କ ସହ ମୋଟ୍ ୨୧ ଅଭିଯୁକ୍ତଙ୍କ ବିରୋଧରେ ଚାର୍ଜଶିିଟ୍ ଦାଖଲ କରିଥିଲା। ତେବେ ଦୁଇ ସପ୍ତାହରେ ତଦନ୍ତ ଶେଷ କରିବା ସମ୍ଭବ ନୁହେଁ ବୋଲି ସିବିଆଇ ଦର୍ଶାଇବା ପରେ ସୁପ୍ରିମକୋର୍ଟ ଅଧିକ ସମୟ ପ୍ରଦାନ କରିଛନ୍ତି।
