ନିଶ୍ଚିନ୍ତକୋଇଲି,୩୦ା୫: ସମ୍ପ୍ରତି ବିଶ୍ୱରେ କରୋନା ମହାମାରୀ ଭୟାନକ ରୂପ ଧାରଣ କରିଛି। ସରକାର ଏନେଇ ଲକ୍ଡଉନ ଜାରି କରିଛନ୍ତି। ଫଳରେ ବହୁ ଲୋକ ଜୀବନ ଜୀବିକା ପାଇଁ ସଂଗ୍ରାମ କରୁଛନ୍ତି। ତେବେ ବିଭିନ୍ନ ବିଦ୍ୟାଳୟରେ ପାଚିକା ଭାବେ କାର୍ଯ୍ୟ କରୁଥିବା ମହିଳାମାନେ ଏବେ ଦୁର୍ଦ୍ଦଶାରେ ଗତି କରୁଛନ୍ତି। ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ସ୍କୁଲ ବନ୍ଦ ହେବା ଫଳରେ ପାଚିକାମାନେ କିପରି ଚଳିବେ ସେନେଇ ପ୍ରମାଦ ଗଣୁଛନ୍ତି। ଏ ଅବସରରେ ଓଡ଼ିଶା ମିଳିତ ବିଦ୍ୟାଳୟ ପାଚିକା ସହାୟିକା ସଂଘ ନିଶ୍ଚିନ୍ତକୋଇଲି ବ୍ଲକ କମିଟି ପକ୍ଷରୁ ଏକ ସ୍ମାରକପତ୍ର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ବ୍ଲକ ଶିକ୍ଷାଧିକାରୀଙ୍କୁ ପ୍ରଦାନ କରାଯାଇଛି। ଶନିବାର ପୂର୍ବାହ୍ନରେ ସଂଘର ଆବାହକ ପ୍ରେମାନନ୍ଦ ସେଠୀଙ୍କ ନେତୃତ୍ୱରେ ମହିଳାମାନେ ସାମାଜିକ ଦୂରତ୍ୱ ରକ୍ଷା କରି ଏକ ଶୋଭାଯାତ୍ରାରେ ଆସି ବିଇଓଙ୍କ କାର୍ଯ୍ୟାଳୟରେ ପହଞ୍ଚିଛନ୍ତି। ସେଠାରେ ବିଭିନ୍ନ ଦଫା ସମ୍ବଳିତ ଏକ ଦାବିପତ୍ର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏବିଇଓ ଲକ୍ଷ୍ମଣ କୁମାର ଲେଙ୍କାଙ୍କୁ ପ୍ରଦାନ କରିଛନ୍ତି। ସେ ଏହି ଦାବିପତ୍ରରେ ଦର୍ଶାଇଛନ୍ତି ଯେ, ୨୮ମାସର ବର୍ଦ୍ଧିତ ବକେୟା ପାରଶ୍ରମିକ ଅବିଳମ୍ବେ ପ୍ରଦାନ, ସ୍କୁଲ ବନ୍ଦ ମିଶ୍ରଣ ଓ ୬୦ ବର୍ଷ ପାଇଁ ବାଦ୍ ପଡ଼ିଥିବା ସମସ୍ତ ପାଚିକାଙ୍କୁ ୨୮ ମାସର ବର୍ଦ୍ଧିତ ପାରିଶ୍ରମିକ ପ୍ରଦାନ ସୁନିଶ୍ଚିତ କରିବା, ଲକ୍ଡାଉନ ସମୟରେ ପାଚିକାଙ୍କୁ ପାରିଶ୍ରମିକ ସହ ୫ ହଜାର ଟଙ୍କା ସହାୟତା ପ୍ରଦାନ, ପାଚିକାଙ୍କୁ ୨୦୧୮ ଏପ୍ରିଲରୁ ମାସିକ ୨ ହଜାର ଟଙ୍କା ପ୍ରଦାନ, ୧୨ ଘଣ୍ଟିଆ ଦୈନିକ କାର୍ଯ୍ୟ ସମୟ ବାତିଲ ଆଦି ସମ୍ବଳିତ ଏକ ଦାବିପତ୍ର ପ୍ରଦାନ କରାଯାଇଛି। ଏହି ଦାବିପତ୍ର ପ୍ରଦାନ ସମୟରେ ଏଆଇୟୁଟିୟୁସି ସଙ୍ଗଠନର ସଭାପତି ପରମାନନ୍ଦ ସେଠୀ, ସମ୍ପାଦକ ଅନ୍ନପୂର୍ଣ୍ଣା ପତି, ପ୍ରସାନ୍ତ ଦାସ, ସଙ୍ଗୀତା ରାଉତ,ଗୌରୀ ସ୍ବାଇଁ, ଜସ୍ମିନ ମହପାତ୍ର, ସୁରୋକ୍ଷା ମିଶ୍ର, ଟୁକୁନି ପୃଷ୍ଟି, ସୁମିତ୍ରା ସିଂ ପ୍ରମୁଖ ଉପସ୍ଥିତ ଥିଲେ।
