ଲାହୋର,୪।୯(ଏଏଫ୍ପି): ପାକିସ୍ତାନ ବୁଧବାର ପୂର୍ବତନ ଅଧିନାୟକ ମିସ୍ବା ଉଲ ହକ୍ଙ୍କୁ ମୁଖ୍ୟ କୋଚ୍ ଓ ମୁଖ୍ୟ ଚୟନକର୍ତ୍ତା ପଦରେ ନିଯୁକ୍ତ କରିଛି। କ୍ରିକେଟ ପାଗଳ ଦେଶ ପାକିସ୍ତାନ ୨୦୧୯ ଆଇସିସି ବିଶ୍ୱକପ୍ର ସେମିଫାଇନାଲରେ ପ୍ରବେଶ କରିପାରି ନ ଥିଲା। ଏଥିଯୋଗୁ କୋଚ୍ ମିକି ଆର୍ଥରଙ୍କ କାର୍ଯ୍ୟକାଳ ବୃଦ୍ଧି କରିବାକୁ ପିସିବି ମନା କରି ଦେଇଥିଲା। ବୋଲିଂ କୋଚ୍ ଆଝାର ମେହମ୍ମୁଦ ଓ ବ୍ୟାଟିଂ କୋଚ୍ ଗ୍ରାଣ୍ଟ ଫ୍ଲାଓ୍ବରଙ୍କୁ ମଧ୍ୟ ବିଦା କରାଯାଇଥିଲା। ମିସ୍ବାଙ୍କୁ ଆଗାମୀ ତିନି ବର୍ଷ ପାଇଁ ସମସ୍ତ ଫର୍ମାଟର ଦାୟିତ୍ୱ ଦିଆଯାଇଛି। ଦଳୀୟ ଖେଳାଳିଙ୍କ ଚୟନରେ ପାରଦର୍ଶିତ ଓ ସ୍ପଷ୍ଟତା ଲାଗି ମିସ୍ବାଙ୍କୁ ଚୟନ କମିଟିର ଅଧ୍ୟକ୍ଷ ପଦରେ ନିଯୁକ୍ତ କରାଯାଇଛି। ତାଙ୍କ ବ୍ୟତୀତ ଚୟନ କମିଟିରେ ୬ ପ୍ରଥମ ଶ୍ରେଣୀ ଦଳର ମୁଖ୍ୟ କୋଚ୍ ରହିବେ ବୋଲି ପିସିବି ପକ୍ଷରୁ କୁହାଯାଇଛି। ବର୍ତ୍ତମାନ ମିସ୍ବା ଦେଶର ୩୦ତମ ମୁଖ୍ୟ କୋଚ୍। ହେଲେ ପୂର୍ବରୁ ମୁଖ୍ୟ କୋଚ୍ଙ୍କୁ କଦାପି ଚୟନ କମିଟି ଅଧ୍ୟକ୍ଷ ଭାବେ ନିଯୁକ୍ତ କରାଯାଇ ନାହିଁ। ତେବେ ନ୍ୟୁଜିଲାଣ୍ଡରେ ଏହି ସିଷ୍ଟମ ପ୍ରଚଳିତ। ଆଉ ଜଣେ ପୂର୍ବତନ ଅଧିନାୟକ ତଥା କିମ୍ବଦନ୍ତୀ ପେସର ଓ୍ବାକର ୟୁନିସଙ୍କୁ ସମାନ ଅବଧି ପାଇଁ ପାକିସ୍ତାନ ବୋଲିଂ କୋଚ୍ ପଦ ଦିଆଯାଇଛି। ସେ ପୂର୍ବରୁ ଦୁଇ ଥର ଜାତୀୟ ଦଳର ମୁଖ୍ୟ କୋଚ୍ ଦାୟିତ୍ୱ ସମ୍ଭାଳି ସାରିଛନ୍ତି। ୫ ଜଣିଆ କମିଟି ଅନ୍ତିମ ନିଷ୍ପତ୍ତି ନେବା ପୂର୍ବରୁ ପୂର୍ବତନ ଅଷ୍ଟ୍ରେଲିଆନ ବ୍ୟାଟ୍ସମ୍ୟାନ ଡିନ ଜୋନ୍ସ ଓ ପୂର୍ବତନ ପାକିସ୍ତାନ କୋଚ୍ ମୋହସିନ ଖାନଙ୍କ ସାକ୍ଷାତ୍କାର ନେଇଥିଲା। ମିସ୍ବା ଓ ୟୁନିସ ଆଗାମୀ ଶ୍ରୀଲଙ୍କା ବିପକ୍ଷ ୩ ମ୍ୟାଚ୍ ବିଶିଷ୍ଟ ଟି୨୦ ଓ ଦିନିକିଆ ସିରିଜ୍ରୁ ଅଭିଯାନ ଆରମ୍ଭ କରିବେ। ଏହାପରେ ପାକିସ୍ତାନ ଦୁଇ ଟେଷ୍ଟ ପାଇଁ ଅଷ୍ଟ୍ରେଲିଆ ଗସ୍ତ କରିବ। ମିସ୍ବା ଦେଶର ସବୁଠୁ ସଫଳତମ ଟେଷ୍ଟ ଅଧିନାୟକ। ତାଙ୍କ ନେତୃତ୍ୱରେ ଦଳ ୫୬ ଟେଷ୍ଟ ଖେଳି ୨୬ ବିଜୟ ସହ ୧୧ ମ୍ୟାଚ୍ ଡ୍ର’ ରଖିଥିଲା। ସେ ୭୫ ଟେଷ୍ଟ, ୧୬୨ ଦିନିକିଆ ଓ ୩୯ ଟି୨୦ ଖେଳିଛନ୍ତି। ୨୦୧୭ରେ ଅନ୍ତର୍ଜାତୀୟ କ୍ରିକେଟରୁ ସେ ଅବସର ଘୋଷଣା କରିଥିଲେ।
