ନୂଆଦିଲ୍ଲୀ,୪-୭: ଆୟକର ବିଭାଗ ୫୦ ଲକ୍ଷ ଟଙ୍କା ପର୍ଯ୍ୟନ୍ତ କାରବାର କରୁଥିବା ସେବା ପ୍ରଦାନକାରୀ କମ୍ପାନୀଙ୍କୁ ଜିଏସ୍ଟି କମ୍ପୋଜିଶନ ସ୍କିମ୍ ବାଛିବା ଲାଗି ଆହୁରି ଏକ ମାସ ସମୟ ଦେଇଛି। ଏଣିକି ଚଳିତ ମାସ ୩୧ ପର୍ଯ୍ୟନ୍ତ ସେମାନଙ୍କୁ ଚୟନ ସୁଯୋଗ ମିଳିବ। କମ୍ପୋଜିଶନ ସ୍କିମ୍ ବାଛୁଥିବା ସେବା ପ୍ରଦାନକାରୀ କମ୍ପାନୀଙ୍କୁ ୬% ଜିଏସ୍ଟି ଦେବାକୁ ହେବ। ଚଳିତବର୍ଷ ଏପ୍ରିଲ ପହିଲାରେ ଅନୁଷ୍ଠିତ ଜିଏସ୍ଟି କାଉନସିଲ୍ ବୈଠକରେ ଏ ସମ୍ପର୍କରେ ନିଷ୍ପତ୍ତି ନିଆଯାଇଥିଲା। ଜିଏସ୍ଟି ଅଧୀନରେ ଅଧିକାଂଶ ସେବା ଉପରେ ୧୨ରୁ ୧୮ ପ୍ରତିଶତ ପର୍ଯ୍ୟନ୍ତ ଜିଏସ୍ଟି ଆଦାୟ କରାଯାଉଛି। କେନ୍ଦ୍ରୀୟ ପରୋକ୍ଷ ଟିକସ ଏବଂ ସୀମା ଶୁଳ୍କ ବୋର୍ଡ(ସିବିଆଇସି) ପକ୍ଷରୁ ଏକ ସର୍କୁଲାର ଜାରି କରି କୁହାଯାଇଛି ଯେ, କମ୍ପୋଜିଶନ ସ୍କିମ୍ ଚୟନ କରୁଥିବା ସେବା ପ୍ରଦାନକାରୀ କମ୍ପାନୀଙ୍କୁ ଜିଏସ୍ଟି ସିଏମ୍ପି-୨ ଫର୍ମ ପୂରଣ କରିବାକୁ ହେବ। ଏଥିଲାଗି କମ୍ପୋଜିଶନ ସ୍କିମ୍ ପାଇବା ଲାଗି ଯୋଗ୍ୟ ଅନ୍ୟ ପ୍ରଦାନକାରୀଙ୍କୁ ବାଛିବାକୁ ହେବ। ସେମାନଙ୍କୁ ଜୁଲାଇ ୩୧ ତାରିଖ ସୁଦ୍ଧା ଏହି ଫର୍ମ ପୂରଣ କରିବାକୁ ହେବ। ଏଥିପୂର୍ବରୁ କମ୍ପୋଜିଶନ ସ୍କିମ୍ ବାଛିବାର ସମୟସୀମା ଏପ୍ରିଲ ୩୦ ତାରିଖ ଧାର୍ଯ୍ୟ ହୋଇଥିଲା।
