ବ୍ରହ୍ମପୁର ଅଫିସ,୨୯ା୨: ମୋଟରଯାନ ଆଇନ କୋହଳ ସମୟସୀମାର ଶନିବାର ଶେଷ ଦିନ। ମାର୍ଚ୍ଚ ୧ ତାରିଖ ଅର୍ଥାତ୍ ରବିବାରଠାରୁ ଏହି ନିୟମ କଡ଼ାକଡି କରାଯିବ। ଗଞ୍ଜାମ ଜିଲାରେ ମଧ୍ୟ ନିୟମକୁ କଡ଼ାକଡ଼ି କରାଯିବାକୁ ଥିବା ବେଳେ ଯେଉଁମାନେ ଏଯାବତ୍ ଗାଡିର ଆବଶ୍ୟକ କାଗଜପତ୍ର ଠିକ୍ କରିନାହନ୍ତି, ସେମାନଙ୍କ ମଧ୍ୟରେ ଭୟ ଦେଖାଯାଇଛି। ଲୋକଙ୍କୁ ଯଥେଷ୍ଟ ସମୟ ଦିଆଯାଇଥିଲା ବେଳେ ଦୁଇଦିନ ପୂର୍ବରୁ ବ୍ରହ୍ମପୁର ଉନ୍ନୟନ କର୍ତ୍ତୃପକ୍ଷ (ବିଡିଏ) ଅଫିସରେ ଅସ୍ଥାୟୀ ଭାବେ ଆଞ୍ଚଳିକ ପରିବହନ ବିଭାଗ ପକ୍ଷରୁ ଗାଡ଼ି ଚାଳକଙ୍କ ଆବଶ୍ୟକ କାଗଜପତ୍ର କରିବା ସକାଶେ ଏକ ଅସ୍ଥାୟୀ କ୍ୟାମ୍ପ ଖୋଲା ଯାଇଥିଲା। ଏବେ ସୁଦ୍ଧା ଲର୍ନିଂ ଲାଇସେନ୍ସ ଓ ଲାଇସେନ୍ସ ପାଇବା ପାଇଁ ପରିବହନ କାର୍ଯ୍ୟାଳୟରେ ଲୋକଙ୍କ ଭିଡ଼ ଲାଗି ରହିଥିବା ଦେଖିବାକୁ ମିଳିଛି ।
