ନୂଆଦିଲ୍ଲୀ,୩୧-୮: ମାନ୍ଦାବସ୍ଥା କାରଣରୁ ଦେଶର ଆର୍ଥିକ ଅଭିବୃଦ୍ଧି ବଢ଼ିବା ପରିବର୍ତ୍ତେ କମିଛି। ଦେଶର ବିକାଶ ହାର ଜୁନ୍ ତ୍ରୈମାସ(ଏପ୍ରିଲ-ଜୁନ୍)ରେ ୫%କୁ ହ୍ରାସ ପାଇଛି, ଯାହା କି ମୋଦି ସରକାରଙ୍କ ପାଇଁ ଜୋର୍ଦାର ଝଟକା କୁହାଯାଇପାରେ। ପୂର୍ବ ତ୍ରୈମାସରେ ଏହା ୫.୮% ରହିଥିଲା। ବାର୍ଷିକ ଆଧାରରେ ହିସାବ କଲେ ପ୍ରାୟ ୩% ହ୍ରାସ ପାଇଛି। ବର୍ଷକ ପୂର୍ବରୁ ଏହି ସମୟରେ ଜିଡିପି ଅଭିବୃଦ୍ଧି ହାର ୮% ରହିଥିଲା। ଗତ ତ୍ରୈମାସରେ ମାନୁଫାକ୍ଚରିଂ ସେକ୍ଟରରେ ଗତିବିଧି ହ୍ରାସ ପାଇଥିବା ବେଳେ କୃଷି ଉତ୍ପାଦନ କମିବା କାରଣରୁ ବିକାଶ ଅଭିବୃଦ୍ଧି ପ୍ରଭାବିତ ହୋଇଛି।
ଅର୍ଥ ମନ୍ତ୍ରଣାଳୟ ଅଧୀନ କେନ୍ଦ୍ରୀୟ ପରିସଂଖ୍ୟାନ କାର୍ଯ୍ୟାଳୟ ପକ୍ଷରୁ ଶୁକ୍ରବାର ପ୍ରକାଶିତ ତଥ୍ୟ ଅନୁଯାୟୀ, ଜୁନ୍ର ଜିଡିପି ଅଭିବୃଦ୍ଧି ହାର ୬ ବର୍ଷରେ ସର୍ବନିମ୍ନ ରହିଛି। ପ୍ରାୟ ୬ ବର୍ଷ ପୂର୍ବେ ଉପା ସରକାରରେ କୌଣସି ଏକ ତ୍ରୈମାସରେ ଜିଡିପି ଅଭିବୃଦ୍ଧି ହାର ଏହି ସ୍ତରଠାରୁ କମ୍ ଥିଲା। ଆର୍ଥିକ ବର୍ଷ ୨୦୧-୧୩ର ପ୍ରଥମ ତ୍ରୈମାସରେ ଜିଡିପି ଅଭିବୃଦ୍ଧି ହାର ୪.୯% ରହିଥିଲା। ସୂଚନାଥାଉ କି, ରିଜର୍ଭ ବ୍ୟାଙ୍କ ଚଳିତ ଆର୍ଥିକ ବର୍ଷ ଲାଗି ଦେଶର ଜିଡିପି ଅଭିବୃଦ୍ଧି ହାର ଅନୁମାନକୁ ୬.୯% କରିଥିଲା। ପୂର୍ବରୁ ଏହା ୭% ରହିବ ବୋଲି ନିଜ ଅନୁମାନରେ ଦର୍ଶାଇଥିଲା। ମାନୁଫାକ୍ଚରିଂ ସେକ୍ଟରରେ ୧୨.୧% ବଦଳରେ ୦.୬% ଅଭିବୃଦ୍ଧି ଦେଖାଯାଇଛି। କୃଷି କ୍ଷେତ୍ରରେ ବିକାଶ ହାର ୫.୧%ରୁ ହ୍ରାସ ପାଇ ୨% ରହିଛି। ସେହିପରି ଖଣି ଖନନ କ୍ଷେତ୍ରରେ ଅଭିବୃଦ୍ଧି ହାର ୦.୪% ଦେଖିବାକୁ ମିଳିଥିଲା, ଯାହା ଏବେ ବୃଦ୍ଧି ପାଇ ୨.୭% ହୋଇଛି। ନିର୍ମାଣ ସେକ୍ଟରରେ ଗତବର୍ଷ ପ୍ରଥମ ତ୍ରୈମାସରେ ଅଭିବୃଦ୍ଧି ହାର ୯.୬% ରହିଥିଲା, ଯାହା ଏବେ ହ୍ରାସ ପାଇ ୫.୭% ରହିଛି। ହୋଟେଲ, ପରିବହନ ଓ ଟ୍ରେଡ୍ ସେକ୍ଟରରେ ଅଭିବୃଦ୍ଧି ହାର ୭.୮ରୁ ୭.୧%କୁ କମିଛି। ସେହିପରି ବିତ୍ତୀୟ, ରିଏଲ ଇଷ୍ଟେଟ ସେକ୍ଟରରେ ବିକାଶ ହାର ୬.୫ରୁ ୫.୯%କୁ ହ୍ରାସ ପାଇଛି। ଚଳିତ ଆର୍ଥିକ ବର୍ଷର ପ୍ରଥମ ତ୍ରୈମାସରେ ଜିଡିପି ଅଭିବୃଦ୍ଧି ହାର ହ୍ରାସ ପାଇଥିଲେ ମଧ୍ୟ ସରକାରଙ୍କ ନୀତିକୁ ସମର୍ଥନ ଜଣାଇଛନ୍ତି ମୁଖ୍ୟ ଅର୍ଥନୈତିକ ପରାମର୍ଶଦାତା(ସିଇଏ) କୃଷ୍ଣମୂର୍ତ୍ତି ସୁବ୍ରମଣ୍ୟନ। ସେ କହିଛନ୍ତି ଯେ, କେନ୍ଦ୍ର ସରକାର ଅର୍ଥନୀତିକୁ ଗତିଶୀଳ କରିବା ଲାଗି ଅନେକ ପ୍ରକାର ବ୍ୟବସ୍ଥା ଘୋଷଣା କରିଛନ୍ତି, ଯାହା କି ଅର୍ଥମନ୍ତ୍ରୀ ନିର୍ମଳା ସୀତାରାମନ୍ଙ୍କ ନିକଟରେ କରିଥିବା କେତେକ ଘୋଷଣାରୁ ସ୍ପଷ୍ଟ ହୋଇଛି। ସରକାର ୫ ଲକ୍ଷ କୋଟି ଡଲାର ଅର୍ଥନୀତି ଆଡକୁ ଅଗ୍ରସର ହେଉଛନ୍ତି। ଏଥିଲାଗି ପଦକ୍ଷେପ ନିଆଯାଉଛି ଓ ଆଗକୁ ଅଧିକ ପଦକ୍ଷେପ ନିଆଯିବ। ସେଥିପାଇଁ ସରକାର ସଜାଗ।
କ୍ରମାଗତ କମୁଛି ଅର୍ଥନୀତି
ଭାରତର ଜିଡିପି ଅଭିବୃଦ୍ଧି ହାର ଗତ କିଛି ତ୍ରୈମାସ ହେବ ହ୍ରାସ ପାଇଚାଲିଛି। ୨୦୧୭-୧୮ର ଶେଷ ତ୍ରୈମାସରେ ଦେଶର ବିକାଶ ହାର ୮.୧% ରହିଥିଲା। କିନ୍ତୁ ଚଳିତ ଆର୍ଥିକ ବର୍ଷର ପ୍ରଥମ ତ୍ରୈମାସରେ ଏହା ୫%କୁ ହ୍ରାସ ପାଇଛି। ଗତ ଆର୍ଥିକ ବର୍ଷ ଅର୍ଥାତ୍ ୨୦୧୮-୧୯ର ପ୍ରଥମ ତ୍ରୈମାସରେ ଜିଡିପି ଅଭିବୃଦ୍ଧି ହାର ୮% ରହିଥିଲା। ଦ୍ୱିତୀୟରେ ଏହା ୭%, ତୃତୀୟରେ ୬.୬% ଓ ଚତୁର୍ଥରେ ୫.୮% ରହିଥିଲା।
