ନୂଆଦିଲ୍ଲୀ,୪। ୫: ଭାରତକୁ ଏକ ମାନ୍ୟୁଫାକଚରିଂ ହବ୍ରେ ରୂପାନ୍ତରିତ କରିବା ଲାଗି ବାଣିଜ୍ୟ ଏବଂ ଉଦ୍ୟୋଗ ମନ୍ତ୍ରଣାଳୟ ଏବେ ଯୋଜନା ହାତକୁ ନେଇଛି। ସମ୍ଭାବନା ଥିବା କ୍ଷେତ୍ରଗୁଡିକୁ ବିକଶିତ କରାଇବା ନେଇ ବିଭିନ୍ନ କାର୍ଯ୍ୟପନ୍ଥା ସରକାର ଗ୍ରହଣ କରିବେ ବୋଲି ଜଣାପଡିଛି। ଏହା ଅଧୀନରେ କ୍ୟାପିଟାଲ ଗୁଡ୍ସ, ଚମଡା ଏବଂ କେମିକାଲ ଭଳି ପ୍ରମୁଖ କ୍ଷେତ୍ରକୁ ଏବେ ଫୋକସରେ ରଖାଯାଇଥିବା ପ୍ରକ୍ରିୟା ସହ ଜଡିତ ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି। କ୍ଷେତ୍ରଗୁଡିକୁ ଚୟନ କରିବା ଲାଗି ସରକାର ଶିଳ୍ପ ସଂଘ ଏବଂ ବିଭିନ୍ନ ଅଂଶୀଦାରଙ୍କ ସହ ଆଲୋଚନା କରୁଥିବା ଅଧିକାରୀ କହିଛନ୍ତି। ପ୍ରାଥମିକ ଭାବେ ୧୨ ଚାମ୍ପିୟନ କ୍ଷେତ୍ରକୁ ଚୟନ କରାଯାଇଛି। ଏହା ମଧ୍ୟରେ ମଡ୍ୟୁଲାର ଫର୍ନିଚର, ଖେଳନା, ଖାଦ୍ୟ ପ୍ରକ୍ରିୟାକରଣ, ରେଡି ଟୁ ଇଟ୍ ଫୁଡ, ଆଗ୍ରୋ କେମିକାଲ୍ସ, ଟେକ୍ସଟାଇଲ, ଏୟାର କଣ୍ଡିସନର, କ୍ୟାପିଟାଲ ଗୁଡସ, ଫାର୍ମା ଏବଂ ଅଟୋ କମ୍ପୋନେଣ୍ଟ ଭଳି କ୍ଷେତ୍ର ସାମିଲ ରହିଛି।
ସରକାର ଏ ନେଇ ବିଭିନ୍ନ ଗ୍ରୁପ ଏବଂ ସବ୍ଗ୍ରୁପ ଗଠନ କରିଛନ୍ତି। ଏହି ଗ୍ରୁପଗୁଡିକ ଶିଳ୍ପ ସଂଘ ସିଆଇଆଇ ଏବଂ ଆସୋଚାମ ସହ ଆଲୋଚନାରେ ସାମିଲ ହୋଇଛନ୍ତି। ଏ ନେଇ ଗଠନ କରାଯାଇଥିବା କୋର୍ ଗ୍ରୁପ ବିଭିନ୍ନ ନୀତି, ଟେକ୍ନିକାଲ ଦକ୍ଷତା, ନିଯୁକ୍ତି କ୍ଷମତା, ବିଶ୍ୱ ସ୍ତରୀୟ ଏବଂ ଘରୋଇ ଚାହିଦା ଉପରେ ବିଚାର କରିବ ବୋଲି ସୂଚନା ରହିଛି। କୋଭିଡ-୧୯ ପରେ ବିଶ୍ୱ ସ୍ତରୀୟ ଯୋଗାଣ ଚେନ୍ରେ ବିରାଟ ପରିବର୍ତ୍ତନ ଆସିବା ନେଇ ଆକଳନ କରାଯାଇଛି। ଏଭଳି ସ୍ଥିତିରେ ଭାରତୀୟ ଶିଳ୍ପ ଜଗତ ଏକ ପ୍ରମୁଖ ଭୂମିକା ଗ୍ରହଣ କରିବାର ସମ୍ଭାବନା ରହିଛି। ମାନ୍ୟୁଫାକଚରିଂକୁ ପ୍ରୋତ୍ସାହନ ଏବଂ ରପ୍ତାନି ବିକାଶ ଦିଗରେ ସରକାର ପଦକ୍ଷେପ ନେଉଛନ୍ତି ବୋଲି ବାଣିଜ୍ୟ ଏବଂ ଉଦ୍ୟୋଗ ମନ୍ତ୍ରୀ ପୀୟୂଷ ଗୋୟଲ କହିଛନ୍ତି। ଦେଶର ଅର୍ଥ ବ୍ୟବସ୍ଥାକୁ ମାନ୍ୟୁଫାକଚରିଂ କ୍ଷେତ୍ର ବର୍ତ୍ତମାନ ୧୫% ଯୋଗଦାନ ରଖୁଛି। ଏଥିରେ ବୃଦ୍ଧି ନେଇ ଲକ୍ଷ୍ୟ ରଖାଯାଇଛି। କୋଭିଡ ଯୋଗୁ ମାର୍ଚ୍ଚରେ ଦେଶର ପ୍ରମୁଖ ଶିଳ୍ପ କ୍ଷେତ୍ର ଅଭିବୃଦ୍ଧି ୬.୫% ଖସିଛି। ଅଶୋଧିତ ତୈଳ, ପ୍ରାକୃତିକ ବାଷ୍ପ, ସାର, ଇସ୍ପାତ, ସିମେଣ୍ଟ ଏବଂ ଇଲେକ୍ଟ୍ରିସିଟି ଉତ୍ପାଦନ କ୍ଷତିଗ୍ରସ୍ତ ହେବା ଯୋଗୁ ଏଭଳି ଚିତ୍ର ସାମ୍ନାକୁ ଆସିଛି। ସେହିଭଳି ମାର୍ଚ୍ଚରେ ରପ୍ତାନି ୩୪.୪% ଖସିଥିବା ନଜରକୁ ଆସିଛି।
