କଟକ ରୋଡ : ଶାରଦୀୟ ଦୁର୍ଗାପୂଜା ପାଇଁ ଚଳଚଞ୍ଚଳ ହେଉଛି ରାଜଧାନୀ। ବିଭିନ୍ନ ପୂଜାମଣ୍ଡପରେ ଆରମ୍ଭ ହୋଇଛି ତୋରଣ। ମୃଣ୍ମୟୀ ମୂର୍ତ୍ତି ତିଆରିରେ ଲାଗିଛନ୍ତି ଶିଳ୍ପୀ ଓ କାରିଗର। ଏହି ଦୌଡରେ ସାମିଲ ହୋଇଛି ଭୁବନେଶ୍ୱର ପୁରୁଣାଷ୍ଟେଶନ ବଜାର ସାର୍ବଜନୀନ ଦୁର୍ଗାପୂଜା ସମିତି। ୧୯୫୫ ମସିହାରୁ ଆରମ୍ଭ ହୋଇଥିବା ପୂଜା ଚଳିତ ଥର ୬୪ ବର୍ଷରେ ପହଞ୍ଚିଛି। ପ୍ରତ୍ୟେକ ବର୍ଷ ନୂଆ ରୂପ ଓ ପରିକଳ୍ପନା ନେଇ ତୋରଣ ନିର୍ମାଣ ନେଇ ଚର୍ଚ୍ଚାରେ ରହୁଥିବା ପୂଜା ସମିତି ଏଥର ଔରଙ୍ଗାବାଦରେ ଥିବା ଅଜନ୍ତା-ଏଲୋରା ଗୁମ୍ଫାର ଅବିକଳ ନକଲ ଏଥର ସ୍ଥାନ ଦେବାକୁ ଯାଉଛି, ଯାହାକି ଏ ବର୍ଷର ମୁଖ୍ୟ ଆକର୍ଷଣ ହେବ ବୋଲି ସମିତି କର୍ମକର୍ତ୍ତା ଆଶା ରଖିଛନ୍ତି। ଅନ୍ୟପକ୍ଷରେ ଆଦିମ ଯୁଗରେ ମାନବଙ୍କ ଚଳଣି ଶୈଳୀ ଓ ଏବେକାର ସହରୀ ସଭ୍ୟତାକୁ ପୂଜାମଣ୍ଡପର ଆଭ୍ୟନ୍ତରୀଣ ସାଜଦଜ୍ଜା ଲୋକଙ୍କୁ ଆକୃଷ୍ଟ କରିବ ବୋଲି ପୂଜା ସମିତିର ସାଂସ୍କୃତିକ ସମ୍ପାଦକ ରଞ୍ଜନ ଖଟେଇ ଓ ଏହି ନିର୍ମାଣ ଦାୟିତ୍ୱରେ ଥିବା କଳା ନିର୍ଦ୍ଦେଶକ ସୁବାସ ଚନ୍ଦ୍ର ବେହେରା କହିଛନ୍ତି। ଏଥର ପୂଜା ବଜେଟ ୫୦ଲକ୍ଷ ଟଙ୍କା ଧାର୍ଯ୍ୟ ହୋଇଛି। ଅଷ୍ଟମୀ ତିଥିଠାରୁ ସପ୍ତମୀ ତିଥି ମଧ୍ୟରେ ଦେବୀଙ୍କ ନିକଟରେ ଚରୁ ଅନ୍ନ ଭୋଗ ସାଙ୍ଗକୁ ଦଶମୀରେ ଦହି ପଖାଳ ଲାଗି ହେବ; ଯାହାକି ଶ୍ରଦ୍ଧାଳୁଙ୍କୁ ବଣ୍ଟନ ବ୍ୟବସ୍ଥା ରହିଛି। ମଣ୍ଡପ ପରିସରରେ ହେବାକୁ ଥିବା ଭିଡକୁ ଲକ୍ଷ୍ୟ ରଖି ୩୦ସିସି କ୍ୟାମେରା ଖଞ୍ଜାଯିବ। ଟ୍ରାଫିକ ନିୟନ୍ତ୍ରଣ ଓ ଶାନ୍ତିଶୃଙ୍ଖଳା ରକ୍ଷା ପାଇଁ କମିଶନରେଟ ପୋଲିସ ସହ ପୂଜା ସମିତି ପକ୍ଷରୁ ୧୦୦ ସ୍ବେଚ୍ଛାସେବୀ ନିୟୋଜିତ ରହିବେ। ଷଷ୍ଠୀ ତିଥିଠାରୁ ଦଶମୀ ପର୍ଯ୍ୟନ୍ତ କଟକ ଓ ଭୁବନେଶ୍ୱରର ବିଭିନ୍ନ କଳାକାରଙ୍କୁ ନେଇ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ହେବ। ଏହା ସହ ପାରମ୍ପାରିକ ବାଦ୍ୟରେ ଭସାଣି ଉତ୍ସବ ଅନୁଷ୍ଠିତ ହେବ।
