ପୁରୁଣା ଭୁବନେଶ୍ୱର,୨୨।୨(ଡି.ଏନ୍.ଏ.): ମହାଶିବରାତ୍ରି ଉପଲକ୍ଷେ ଶ୍ରୀଲିଙ୍ଗରାଜ ମନ୍ଦିର ନିକଟ ଅସ୍ଥାୟୀ ଭଜନ ମଣ୍ଡପରେ ଏକାମ୍ର ସାଂସ୍କୃତିକ ପ୍ରକାଶନୀ ଅନୁଷ୍ଠାନ ପକ୍ଷରୁ ଅହୋରାତ୍ର ଆଧ୍ୟାତ୍ମିକ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ପ୍ରାତଃରୁ ଶଙ୍ଖଧ୍ୱନି, ବେଦପାଠ, ଶିବ ଚେତନା, ଗୀତାପାଠ ପରେ ଅପରାହ୍ନରେ ଡ. ରଜନୀ ରଞ୍ଜନ ଦାଶଙ୍କ ଗ୍ରୁପ୍ ପ୍ରବଚନରେ ଶିବ ମାହାତ୍ମ୍ୟ ବୁଝାଇଥିଲେ। ସା ୭ଟା ୪୦ରେ ଜାତୀୟସ୍ତରୀୟ ଭଜନ କାର୍ଯ୍ୟକ୍ରମ ଆରମ୍ଭ ହୋଇଥିଲା। କେନ୍ଦ୍ର ପେଟ୍ରୋଲିୟମ୍ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମୁଖ୍ୟଅତିଥି ଭାବେ ଯୋଗଦେଇ କାର୍ଯ୍ୟକ୍ରମକୁ ଉଦ୍ଘାଟନ କରିଥିଲେ। ସଙ୍ଗୀତଜ୍ଞ ମନ୍ମଥ ମିଶ୍ରଙ୍କ “ତୁମେ ହିଁ ସାକାର, ତୁମେ ନିରାକାର, ସତ୍ୟ ଶିବ ସୁନ୍ଦର…” ଭଜନରୁ ଭଜନ ସା ଆରମ୍ଭ ହୋଇଥିଲା। ପରେ ସୁନାମଧନ୍ୟା ଗାୟିକା ଅନୁରାଧା ପଡ଼ଓ୍ବାଲ୍ଙ୍କ କଣ୍ଠରୁ “କେରି କେରି ସୁନାଦୂବ ଲୋ ସଜନୀ” ଶୁଣିବାକୁ ମିଳିଥିଲା। ପରେ ପରେ ବାପି ଲାହିରିଙ୍କ ବୋଲ ହର ହର ମହାଦେବ.., ଗୁରୁ ବ୍ରହ୍ମା ଗୁରୁ ବିଷ୍ଣୁ ଗୁରୁ ଦେବ ମହେଶ୍ୱର… ଗୀତ ଶ୍ରୋତାଙ୍କ ମନ ଛୁଇଁଥିଲା। ଆରତି ମୁଖାର୍ଜୀଙ୍କ ଗାୟନ ଶ୍ରୋତାଙ୍କୁ ମନ୍ତ୍ରମୁଗ୍ଧ କରିିଥିଲା।
ସୂଚନା ଯେ, ଚଳିତଥର ଅନୁଷ୍ଠାନ ପକ୍ଷରୁ ୫-ଟି ସଚିବ ଭି.କେ. ପାଣ୍ଡିଆନଙ୍କୁ ‘ଏକାମ୍ର ଶ୍ରୀ’ ସମ୍ମାନ ପ୍ରଦାନ କରାଯିବାକୁ ନାମ ଡକାଯାଇଥିଲା। କିନ୍ତୁ ସେ ଅନୁପସ୍ଥିତ ଥିଲେ। ଅନ୍ୟପକ୍ଷରେ ବିଶିଷ୍ଟ କଣ୍ଠଶିଳ୍ପୀ ଅନୁରାଧା ପଡ଼ଓ୍ବାଲ୍, ଆରତି ମୁଖାର୍ଜୀ, ବାପି ଲାହିରି, ଦୀପକ ମହାନ୍ତିଙ୍କ ଭଳି ୧୦ କଳାକାରଙ୍କୁ ମଧ୍ୟ ଏହି ସମ୍ମାନରେ ସମ୍ମାନିତ କରାଯାଇଥିଲା। ଅନୁଷ୍ଠାନର ସଭାପତି ତଥା ଜଟଣୀ ବିଧାୟକ ସୁରେଶ କୁମାର ରାଉତରାୟ କାର୍ଯ୍ୟକ୍ରମରେ ସଭାପତିତ୍ୱ କରିଥିଲେ। ଅନୁଷ୍ଠାନର ସମ୍ପାଦକ ସନତ ମିଶ୍ର ଧନ୍ୟବାଦ ଦେଇଥିବାବେଳେ ବିଶ୍ୱନାଥ ମହାପାତ୍ର, କପିଳ ପଣ୍ଡା, ରତିକାନ୍ତ ମହାସୁଆର, ସତ୍ୟନାରାୟଣ ସାହୁ, ତପନ ମହାସୁଆର, ଚକ୍ରଧର ବେହେରା ପ୍ରମୁଖ କାର୍ଯ୍ୟକ୍ରମ ପରିଚାଳନା କରିଥିଲେ। ଅନ୍ୟତମ ଅତିଥି ଭାବେ ଭାଜପା ନେତା ବାବୁ ସିଂ, ଭାଜପା ରାଜ୍ୟ ସଭାପତି ସମୀର ମହାନ୍ତି, ଗ୍ରାମ୍ୟ ଖଦି ଉଦ୍ୟୋଗ ବୋର୍ଡ ସଭାପତି ସଂଗ୍ରାମ କେଶରୀ ପାଇକରାୟ ପ୍ରମୁଖ ଉପସ୍ଥିତ ଥିଲେ।
