(ମନୋଜ କୁମାର ପ୍ରଧାନ) ମାଧପୁର, ୯ା୯: ଅନୁଗୋଳ ଜିଲା ଆଠମଲ୍ଲିକଠାରେ ଘଟିଥିବା ମହାରାଜା ବସ୍ ଦୁର୍ଘଟଣାକୁ ପୂରିଛି ୩ ବର୍ଷ। ୨୦୧୬ ସେପ୍ଟେମ୍ବର ୯ରେ ପୁରୁଣାମାଣତ୍ରୀ ପୋଲ ତଳକୁ ଏହି ବସ୍ ଖସି ୧୯ ଜଣଙ୍କ ଜୀବନ ଦୀପ ଲିଭିଯାଇଥିଲା। ବର୍ଷ ପରେ ବର୍ଷ ବିତିଯାଇଥିଲେ ବି ଏହି ଦୁର୍ଘଟଣା ଏବେ ବି ଆଠମଲ୍ଲିକବାସୀଙ୍କ ମନରେ ତାଜାହୋଇ ରହିଛି। ଚାଳକଙ୍କ ବେପରୁଆ ଗାଡ଼ିଚାଳନା, ଓଭରଲୋଡିଂ ଯୋଗୁ ଅକାଳରେ ଏତେ ସଂଖ୍ୟକ ଲୋକଙ୍କ ପ୍ରାଣହାନି ସେତେବେଳେ ପ୍ରଶାସନର ଅପାରଗତାକୁ ପଦାରେ ପକାଇ ଦେଇଥିଲା। ତେବେ ଦୁର୍ଘଟଣା ପରେ ଚେଇଁ ଉଠିଥିବା ପ୍ରଶାସନ, ପରିବହନ ବିଭାଗ ପକ୍ଷରୁ ହଠାତ୍ ସମସ୍ତ ନିୟମକୁ କଡ଼ାକଡ଼ି କରାଯାଇଥିଲା। ଆଗକୁ ଏପରି ଦୁର୍ଘଟଣା ଯେପରି ନ ଘଟେ ସେଥିପାଇଁ ସମସ୍ତ ପଦକ୍ଷେପ ନିଆଯିବ ବୋଲି ପରିବହନ ବିଭାଗ ସହ ପ୍ରଶାସନ ପକ୍ଷରୁ ବଡ଼ ବଡ଼ ପ୍ରତିଶ୍ରୁତି ମିଳିଥିଲା। ହେଲେ କେବଳ ସମୟ ବିତିଛି ସିନା ଯାନବାହନ ଚଳାଚଳଜନିତ ସମସ୍ୟା ଏବେ ବି ସୁଧୁରିପାରି ନ ଥିବା ନେଇ କ୍ଷୋଭ ପ୍ରକାଶ କରିଛନ୍ତି ଆଠମଲ୍ଲିକବାସୀ।
ଅସୁରକ୍ଷିତ ଛାତ୍ରୀଛାତ୍ର
ମହାରାଜା ବସ୍ରେ କଲେଜ ଯାଉଥିବାବେଳେ ଦୁର୍ଘଟଣା ଘଟିଥିଲା। ଏଥିରେ ମୋ ହାତ ଭାଙ୍ଗି ଯାଇଥିଲା। ବସ୍ରେ ନିର୍ଦ୍ଧାରିତ ଯାତ୍ରୀଙ୍କଠାରୁ ଅଧିକ ଲୋକଙ୍କୁ ପରିବହନ କରାଯିବା ଦୁର୍ଘଟଣାର ଅନ୍ୟତମ ମୁଖ୍ୟ କାରଣ ଥିଲା। ଏହା ପରେ ବି କିଛି ସୁଧୁରିନି। ହାତଗଣତି ବସ୍ରେ ମାଧପୁର, କିଆକଟା, ବିନିକେୟୀ ଅଞ୍ଚଳରୁ ଛାତ୍ରୀଛାତ୍ରମାନେ ଅସୁରକ୍ଷିତ ଭାବେ ଦୈନିକ ଆଠମଲ୍ଲିକ କଲେଜ ଆସୁଛନ୍ତି। ଓଭରଲୋଡିଂ ନ ହେବା ଦିଗରେ ପ୍ରଶାସନ ଦୃଷ୍ଟି ଦେବା ଜରୁରୀ।
-ଅମର ପ୍ରଧାନ,କୁନ୍ଦନାଳୀ
ମରାମତି ହେଉନି ରାସ୍ତା
ଚାଳକଙ୍କ ବେପରୁଆ ଗାଡ଼ିଚାଳନା ଯୋଗୁ ଏତେବଡ ଦୁର୍ଘଟଣା ଘଟିଗଲା। ପ୍ରାଣ ହରାଇଥିବା ୧୯ ଲୋକଙ୍କ ମଧ୍ୟରେ ବାପା ବି ଥିଲେ। କ୍ଷତିପୂରଣ ପାଇଁ ପ୍ରଶାସନ ଦେଇଥିବା ପ୍ରତିଶ୍ରୁତି ଏଯାଏ ପୂରଣ ହୋଇନାହିଁ। ଆଜି ପର୍ଯ୍ୟନ୍ତ ବୀମା ଟଙ୍କା ମିଳିପାରୁନାହିଁ। ଏବେ ବି ଅନେକ ବସ୍ ବେଆଇନ ଭାବେ ଚଳାଚଳ କରୁଛି। ରାସ୍ତା ଅବସ୍ଥା ଖରାପ ଥିଲେ ବି ତାହାର ସମାଧାନ କରାଯାଉ ନାହିଁ।
-ଭୀମସେନ ମହାକୁଡ଼
ଯାଞ୍ଚ କଡ଼ାକଡି ହେଉ
ମହାରାଜା ବସ୍ ଦୁର୍ଘଟଣାରେ ୧୯ ଲୋକଙ୍କ ଜୀବନ ଚାଲିଗଲା। ସେତେବେଳେ ପ୍ରଶାସନ ବେଶ୍ ତତ୍ପରତା ଦେଖାଇଥିଲା। ହେଲେ ସମୟ କ୍ରମେ ପୁଣି ଅବ୍ୟବସ୍ଥା ଜାରି ରହିଛି। ବିପଦସଙ୍କୁଳ ଅବସ୍ଥାରେ ଯାତ୍ରୀମାନେ ଯା’ଆସ କରୁଛନ୍ତି। ତେଣୁ ସବୁ ରାସ୍ତାରେ ପୋଲିସ ଓ ପରିବହନ କର୍ମଚାରୀ ଜଗି ରହି ବସ୍ଗୁଡିକର ଯାଞ୍ଚ କଡ଼ାକଡ଼ି କରିବା ଦରକାର।
-ଅମରେଶ ଷଡ଼ଙ୍ଗୀ, ମାଧପୁର/ରମେଶ ପ୍ରଧାନ, ପୁରୁଣାମାଣତ୍ରୀ
ଅଧିକ ବସ୍ର ସୁବିଧା କରାଯାଉ
ଅଳ୍ପ ସଂଖ୍ୟକ ବସ୍ ଥିବାରୁ ଅଧିକ ସଂଖ୍ୟାରେ ଯାତ୍ରୀ ସେଥିରେ ଯିବାଆସିବା କରୁଛନ୍ତି। ଫଳରେ ଅନେକ ସମୟରେ ଓଭରଲୋଡିଂ ଦୁର୍ଘଟଣାର କାରଣ ହେଉଛି। ବିଭାଗ ତଥା ସରକାରଙ୍କ ପକ୍ଷରୁ ଏ ଦିଗରେ ଦୃଷ୍ଟି ଦିଆଯାଇ ଆଠମଲ୍ଲିକରେ ଅଧିକ ସଂଖ୍ୟକ ବସ୍ ଚଳାଚଳର ସୁବିଧା କରାଯାଉ।
-ଇଂ. ଆଭାସ କୁମାର କ୍ଷେତୀ, ଆଠମଲ୍ଲିକ
-ଦେବେନ୍ଦ୍ର ପ୍ରଧାନ, ସଭାପତି, କୃଷକ ମହାସଂଘ ଆଠମଲ୍ଲିକ ଶାଖା
