ଖଣ୍ଡପଡ଼ା,୨୦ା୫(ସ୍ବ.ପ୍ର) : ସମ୍ପ୍ରତି ଗ୍ରୀଷ୍ମ ପ୍ରବାହ ବଢୁଛି। ଏ ସମୟରେ ବିଦ୍ୟୁତ୍ କାଟ ଓ ଲୋ ଭୋଲ୍ଟେଜ୍ ଲୋକଙ୍କ ପାଇଁ ମୁଖ୍ୟ ସମସ୍ୟା ପାଲଟିଛି। ଲୋ ଭୋଲଟେଜ୍ ଯୋଗୁ ଘରେ ଫ୍ୟାନ୍ ଆଦି ବିଦ୍ୟୁତ୍ ଚାଳିତ ଯନ୍ତ୍ରଗୁଡ଼ିକ କାର୍ଯ୍ୟକ୍ଷମ ହୋଇପାରୁ ନ ଥିବାବେଳେ ମୋଟର ପମ୍ପଗୁଡିକ ପୋଡ଼ି ଯାଉଛି। ଗତ ୩ ଦିନ ହେଲା କଣ୍ଟିଲୋ ପମ୍ପ ହାଉସ୍ରେ ଥିବା ଦୁଇଟି ମୋଟର ପମ୍ପ ଲୋ ଭୋଲଟେଜ ଯୋଗୁ ପୋଡ଼ିଯାଇଛି। ଫଳରେ ସ୍ଥାନୀୟ ଅଞ୍ଚଳକୁ ପାନୀୟ ଜଳ ଯୋଗାଣ ବାଧାପ୍ରାପ୍ତ ହୋଇଛି। ତେଣୁ ଟ୍ୟାଙ୍କର୍ ଯୋଗେ ପାନୀୟଜଳ ଯୋଗାଇବାକୁ ସାଧାରଣରେ ଦାବି ହେଉଛି। ସୂଚନାଯୋଗ୍ୟ, ୬୦ ବର୍ଷରୁ ଊର୍ଦ୍ଧ୍ୱ କାଳ ୧୫ ହଜାରରୁ ଅଧିକ ଜନସଂଖ୍ୟା ବିଶିଷ୍ଟ କଣ୍ଟିଲୋ ଗ୍ରାମ ପଞ୍ଚାୟତବାସୀଙ୍କ ପାଇଁ ପାନୀୟ ଜଳର ଆବଶ୍ୟକତାକୁ ପୂରଣ କରିବା ପାଇଁ ଏକ ଜଳ ଯୋଗାଣ ପ୍ରକଳ୍ପ ସ୍ଥାପନ କରାଯାଇଛି। ମହାନଦୀ ପାଣିକୁ ୨ଟି ୪୦ ଅଶ୍ୱଶକ୍ତି ବିଶିଷ୍ଟ ମୋଟର ପମ୍ପ ସାହାଯ୍ୟରେ ପାହାଡ଼ସ୍ଥିତ ଟାଙ୍କିରେ ସଂଗ୍ରହ କରି ପରେ ବିଶୋଧିତ ଜଳକୁ ଲୋକମାନଙ୍କୁ ପାଇପ୍ ମାଧ୍ୟମରେ ଯୋଗାଇ ଦିଆଯାଇଥାଏ। ତେବେ ପ୍ରତି ମାସରେ ଯେ କୌଣସି କାରଣରୁ ୫ ରୁ ୭ ଦିନ ଜଳଯୋଗାଣ ବନ୍ଦ ରହୁଥିବାରୁ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଉଛି। ଏହାର ସ୍ଥାୟୀ ପ୍ରତିକାର ନିମନ୍ତେ ବାରମ୍ବାର ଅଭିଯୋଗ ହେଉଥିଲେ ମଧ୍ୟ ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉ ନ ଥିବାରୁ ସାଧାରଣରେ ଅସନ୍ତୋଷ ଦେଖାଦେଇଛି। ସୂଚନାଯୋଗ୍ୟ , ପୁରୁଣା ମୋଟରକୁ ବାରମ୍ବାର ମରାମତି କରି ପ୍ରତ୍ୟହ ଲଗାତର ଭାବେ ୧୫ରୁ ୧୮ ଘଣ୍ଟା ଚାଲୁ କରାଯାଉଛି। ତେବେ ଲୋ ଭୋଲଟେଜ୍ ଯୋଗୁ ଅଧିକାଂଶ ସମୟ ମୋଟରଟି ଖରାପ ହୋଇଯାଉଛି। ଏ ପରିପ୍ରେକ୍ଷୀରେ ନୂଆ ମୋଟର ବସାଇବା ନେଇ ବିଭିନ୍ନ ମହଲରେ ଦାବି ହେଲେ ସୁଦ୍ଧା ଏଥିପ୍ରତି ବିଭାଗୀୟ ଉଚ୍ଚ କର୍ତ୍ତୃପକ୍ଷ କର୍ଣ୍ଣପାତ କରୁ ନ ଥିବା ଅଭିଯୋଗ ହେଉଛି। କଣ୍ଟିଲୋ ଗ୍ରାମ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ବିଜୟ କୁମାର ନନ୍ଦଙ୍କୁ ଏ ସମସ୍ୟା ନେଇ ପଚାରିବାରୁ ଲୋ ଭୋଲ୍ଟେଜ ଯୋଗୁ ମୋଟରଟି ପୋଡ଼ିଯାଇଛି ବୋଲି ସେ କହିଥିଲେ। ତୁରନ୍ତ ମରାମତି ପରେ ଦିନେ ୨ ଦିନ ମଧ୍ୟରେ ପାନୀୟ ଜଳଯୋଗାଣ ସ୍ବାଭାବିକ କରାଯିବ ବୋଲି ସେ କହିଥିଲେ। ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ ନିର୍ବାହୀ ଯନ୍ତ୍ରୀ ରାଜୀବ କୁମାର ପାଣିଗ୍ରାହୀଙ୍କ ସହ ଏ ନେଇ ଯୋଗାଯୋଗ କରିବାରୁ ସେ ଫନୀ ଦାୟିତ୍ୱରେ ରହିଥିବା ଜଣାପଡ଼ିଥିଲା। ତେବେ ତୁରନ୍ତ ୪୦ ଅଶ୍ୱଶକ୍ତି ବିଶିଷ୍ଟ ମୋଟର କ୍ରୟ ନିମନ୍ତେ ବ୍ୟବସ୍ଥା କରିବା ସହ ସୋମବାର ସେ ସମ୍ପୃକ୍ତ ପ୍ରକଳ୍ପ ପରିଦର୍ଶନରେ ଆସିବେ ବୋଲି କହିଥିଲେ। ବିଭାଗୀୟ କନିଷ୍ଠ ଯନ୍ତ୍ରୀ ଜୟନ୍ତ ସେଠ ସୋମବାର ସକାଳଠାରୁ ଗ୍ରାମବାସୀଙ୍କୁ ପାଣି ଯୋଗାଇ ଦିଆଯିବ ବୋଲି ସୂଚନା ଦେଇଥିଲେ।
