ନୂଆଦିଲ୍ଲୀ/ଲକ୍ଷ୍ନୌ,୯।୬: ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ନେଇ ସୋସିଆଲ ମିଡିଆରେ ଆପତ୍ତିଜନକ ଟିପ୍ପଣୀ ଦେବା ଏବେ ମହଙ୍ଗା ପଡିଛି ଜଣେ ଖବରଦାତାଙ୍କୁ। ଏହି ଅଭିଯୋଗରେ ଉତ୍ତର ପ୍ରଦେଶ ପୋଲିସ ଉକ୍ତ ଖବରଦାତାଙ୍କୁ ଶନିବାର ଗିରଫ କରିଥିବା ଜଣାପଡିଛି। ସେହିପରି ଆଉ ଏକ ନ୍ୟୁଜ ଚ୍ୟାନେଲର ମୁଖ୍ୟ ଓ ଏହାର ସମ୍ପାଦକଙ୍କୁ ମଧ୍ୟ ଯୋଗୀ ଆଦିତ୍ୟନାଥଙ୍କୁ ନେଇ ମାନହାନୀ ହେଲାଭଳି ବିଷୟବସ୍ତୁ ପ୍ରସାରଣ କରିଥିବାରୁ ନଏଡାରୁ ପୋଲିସ ଏମାନଙ୍କୁ ଗିରଫ କରିଛି। ପ୍ରଶାନ୍ତ କନୋଜିଆ ନାମକ ଉକ୍ତ ଖବରଦାତା ଜଣକ ଯୋଗୀଙ୍କ ଛବିକୁ ଖରାପ କରିବାକୁ ଚେଷ୍ଟା କରିଥିବା ଅଭିଯୋଗରେ ପୋଲିସ ତାଙ୍କୁ ଗିରଫ କରିଛି। ସୂଚନାଯୋଗ୍ୟ, କନୋଜିଆ ଫେସବୁକ୍ ଓ ଟୁଇଟରରେ ଜଣେ ମହିଳଙ୍କର ଏକ ଭିଡିଓ ପୋଷ୍ଟ କରିଥିଲେ ଯେଉଁଥିରେ ମହିଳା ଜଣକ କହୁଥିଲେ କି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ତାଙ୍କୁ ବିବାହ କରିବାକୁ ପ୍ରସ୍ତାବ ଦେଇଥିଲେ। ଏହା ଭାଇରାଲ ହେବା ପରେ ପୋଲିସ ଉକ୍ତ ଖବରଦାତାଙ୍କୁ ଗିରଫ କରିଥିବା ସୂଚନା ମିଳିଛି।
