ଅନୁଗୋଳ ଅଫିସ, ୩୧।୭-ଆବଶ୍ୟକ ବର୍ଷା ହେଉ ନ ଥିବାରୁ ମରୁଡ଼ି ନେଇ ଅନୁଗୋଳ ଜିଲାର ଚାଷୀମାନେ ଚିନ୍ତିତ ହୋଇପଡ଼ିଛନ୍ତି। ତେଣୁ ମରୁଡ଼ି ଜନିତ ଫସଲ କ୍ଷତିରୁ ତ୍ରାହି ପାଇବା ପାଇଁ ସେମାନେ ପ୍ରଧାନମନ୍ତ୍ରୀ ଫସଲ ବୀମା ଯୋଜନାର ସାହାରା ନେଉଛନ୍ତି। ଆସନ୍ତା ବୁଧବାର ପ୍ରଧାନମନ୍ତ୍ରୀ ଫସଲ ବୀମା ଯୋଜନାରେ ପଞ୍ଜୀକରଣ କରିବାର ଶେଷ ତାରିଖ ଥିବାବେଳେ ମଙ୍ଗଳବାର ସୁଦ୍ଧା ଜିଲାର ୪୫ ହଜାର ୪୭୩ ଜଣ ଚାଷୀ ପଞ୍ଜୀକୃତ ହୋଇଥିବା ଜିଲା କୃଷି ଉପନିର୍ଦ୍ଦେଶକ କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି। ବନ୍ୟା, ବାତ୍ୟା, ଧୋଇ ଓ ମରୁଡ଼ିରେ କ୍ଷତିଗ୍ରସ୍ତ ଚାଷୀଙ୍କୁ ସହାୟତା ଯୋଗାଇ ଦେବା ଉଦ୍ଦେଶ୍ୟରେ କେନ୍ଦ୍ର ସରକାରଙ୍କ ପକ୍ଷରୁ ପ୍ରଧାନମନ୍ତ୍ରୀ ଫସଲ ବୀମା ଯୋଜନା ଆରମ୍ଭ କରାଯାଇଥିଲା। କିନ୍ତୁ ଯୋଜନା ଆରମ୍ଭ ଦିନଠାରୁ ଅନୁଗୋଳ ଜିଲାର ଚାଷୀମାନେ ଏଥିପ୍ରତି ଆଗ୍ରହ ପ୍ରକାଶ କରି ନ ଥିବା ଦେଖିବାକୁ ମିଳିଥିଲା। ଏହି ଯୋଜନାରେ ସାମିଲ ହେବା ପାଇଁ ଜିଲା ଉପ କୃଷି ନିର୍ଦ୍ଦେଶାଳୟ ଠାରୁ ଆରମ୍ଭ କରି ବ୍ଲକ କୃଷି କାର୍ଯ୍ୟାଳୟର ଅଧିକାରୀମାନେ ଚାଷୀମାନଙ୍କୁ ବୁଝାଇ ବୁଝାଇ ନୟାନ୍ତ ହେଉଥିଲେ। ହେଲେ ଗତବର୍ଷ ଜିଲାର ବିଭିନ୍ନ ବ୍ଲକ ଅଧିକାରୀଙ୍କ ଉପରେ ଚାପ ପଡ଼ିବାରୁ ମାତ୍ର ୪ ହଜାର ୫୪୨ ଜଣ ଚାଷୀ ନିଜ ନାମ ପ୍ରଧାନମନ୍ତ୍ରୀ ଫସଲ ବୀମା ଯୋଜନାରେ ପଞ୍ଜୀକରଣ କରିଥିଲେ। ଚଳିତ ବର୍ଷ ଜିଲାରେ ୧୫ ହଜାର ଚାଷୀଙ୍କ ନାମ ବୀମା ଯୋଜନାରେ ସାମିଲ କରିବାକୁ ଜିଲା କୃଷି ଉପନିର୍ଦ୍ଦେଶାଳୟ ପକ୍ଷରୁ ଧାର୍ଯ୍ୟ କରାଯାଇଥିଲା। କିନ୍ତୁ ମରୁଡ଼ି ଚିନ୍ତା ଯୋଗୁ ଉକ୍ତ ଟାର୍ଗେଟ ପୂରଣ ହୋଇ ପଞ୍ଜୀକରଣ ସଂଖ୍ୟା ୩ଗୁଣ ଅର୍ଥାତ୍ ୫୦ ହଜାର ଛୁଇଁବାକୁ ବସିଲାଣି। ବୁଧବାର ପଞ୍ଜୀକରଣର ଶେଷ ତାରିଖ ଥିବାବେଳେ ଆହୁରି ଅନେକ ଚାଷୀ ଏଥିରେ ସାମିଲ ହେବାକୁ ଆବେଦନ କରିବେ ବୋଲି ସୂଚନା ମିଳିଛି। ଏପରି ସ୍ଥିତି ଜିଲାରେ ପ୍ରଥମ ଥର ବୋଲି ଜିଲା କୃଷି ଉପନିର୍ଦ୍ଦେଶକଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି।
