ମସ୍କୋ,୩୧।୩: ରୁଷ ରାଷ୍ଟ୍ରପତି ଭ୍ଲାଦିମର ପୁଟିନଙ୍କ ଆଦେଶ କ୍ରମେ କରୋନା ସଂକ୍ରମଣକୁ ଦୃଷ୍ଟିରେ ରଖି ସୋମବାରଠାରୁ ରାଜଧାନୀ ମସ୍କୋରେ ଲକ୍ଡାଉନ୍ ପାଳନ କରାଯାଇଛି। ହେଲେ ରୁଷକୁ ଲାଗିଥିବା ଏକ ଦେଶ ବେଲାରୁସ୍ କିନ୍ତୁ କରୋନା ସଂକ୍ରମଣକୁ ଖୁବ୍ ହାଲ୍କା ଭାବେ ନେଇଛି। ବେଲାରୁସ୍ ରାଷ୍ଟ୍ରପତି ଆଲେକଜାଣ୍ଡର ଲୁକାସେନକୋ ଲକ୍ଡାଉନ୍ ପାଳନ ନ କରିବା ସହ କହିଛନ୍ତି ଭୋଡ୍କା ପିଇଲେ ଓ ହକି ଖେଳିଲେ କରୋନା ହେବ ନାହିଁ। ସିଏନ୍ଏନ୍ର ରିପୋର୍ଟ ଅନୁଯାୟୀ, ସୋମବାର ରାଷ୍ଟ୍ରପତି ଏକ ଜନସଭାକୁ ଉଦ୍ବୋଧନ ଦେବା ସମୟରେ କହିଛନ୍ତି କରୋନାକୁ ନେଇ ଭୟଭୀତ ହେବାର କୌଣସି କାରଣ ନାହିଁ। ଭୋଡ୍କା ପିଅନ୍ତୁ ଓ ହକି ଖେଳନ୍ତୁ ଅର୍ଥାତ୍ ଦେହରୁ ଝାଳ ବୁହାନ୍ତୁ ଓ ପାରମ୍ପରିକ ସୋନା ବାଥ୍ ନିଅନ୍ତୁ ତେବେ ଯାଇ କରୋନା ଦୂରେଇ ଯିବ। ସୂଚନାଯୋଗ୍ୟ,ବେଲାରୁସରେ ଏପର୍ଯ୍ୟନ୍ତ ପାଖାପାଖି ୧୫୨ ଜଣ କରୋନାରେ ସଂକ୍ରମିତ ହୋଇଥିବା ବେଳେ ସେଠାରେ ଲକ୍ଡାଉନ୍ ଘୋଷଣା କରା ନ ଯିବା ଏବେ ଅନ୍ୟମାନଙ୍କ ପାଇଁ ଚିନ୍ତାର କାରଣ ପାଲଟିଛି। ଏହାସହ ରାଷ୍ଟ୍ରପତିଙ୍କ ଏଭଳି ମନ୍ତବ୍ୟ ଅନେକଙ୍କର ଭୃକୁଞ୍ଚନ ସୃଷ୍ଟି କରିଛି।
