ବଡ଼ବିଲ,୨୫।୨(ସ୍ବ.ପ୍ର.)- କେନ୍ଦୁଝର ଜିଲା ବଡ଼ବିଲସ୍ଥିତ ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟରେ ମଙ୍ଗଳବାର ଭିଜିଲାନ୍ସ ବିଭାଗ ପକ୍ଷରୁ ଚଢ଼ାଉ କରାଯାଇଛି। କାରାକୋହ୍ଲ ଅଞ୍ଚଳର ଜାକ୍ରିଏସ କିସପଟା ନାମକ ବ୍ୟକ୍ତିଙ୍କ ଜମି ଚିହ୍ନଟ ପାଇଁ ଏଆର୍ଆଇ(ସହକାରୀ ରାଜସ୍ବ ନିରୀକ୍ଷକ) ରାମେଶ୍ୱର ମାରାଣ୍ଡି ୩ ହଜାର ଟଙ୍କା ଲାଞ୍ଚ ନେବାବେଳେ ଭିଜିଲାନ୍ସ ହାତରେ ଧରାପଡ଼ିଛି।
ସୂଚନାନୁଯାୟୀ, ଜାକ୍ରିଏସଙ୍କ ଜମି ଚିହ୍ନଟ ପାଇଁ ବଡ଼ବିଲ ତହସିଲ କାର୍ଯ୍ୟାଳୟରେ ଆବେଦନ କରିଥିଲେ। ତହସିଲଦାରଙ୍କ ପକ୍ଷରୁ ଜମି ଚିହ୍ନଟ ପାଇଁ ଆଦେଶ ମଧ୍ୟ ହୋଇଥିଲା। ତେବେ ଏଆର୍ଆଇ ରାମେଶ୍ୱର ବିଭିନ୍ନ ଆଳ ଦେଖାଇ ଶୀଘ୍ର ଜମି ଚିହ୍ନଟ ହୋଇପାରିବ ନାହିଁ ଓ ୫ ହଜାର ଟଙ୍କା ଦେଲେ ସଙ୍ଗେସଙ୍ଗେ ଜମି ଚିହ୍ନଟ କରାଇଦେବେ ବୋଲି କହିଥିଲେ। ଏହାପରେ ଗତ ୨୦ ତାରିଖରେ ୩ ହଜାର ଟଙ୍କାରେ କଥା ଛିଡ଼ିଥିଲା। ଏନେଇ ଜାକ୍ରିଏସ କେନ୍ଦୁଝର ଭିଜିଲାନ୍ସକୁ ଜଣାଇଥିଲେ। ଶେଷରେ ପୂର୍ବ ଯୋଜନା ମୁତାବକ ମଙ୍ଗଳବାର ଆରଆଇ ଅଫିସରେ ଜାକ୍ରିଏସଙ୍କ ଠାରୁ ୩ ହଜାର ଟଙ୍କା ଲାଞ୍ଚ ନେବା ସମୟରେ ଭିଜିଲାନ୍ସ ଟିମ ଚଢ଼ାଉକରି ଏଆର୍ଆଇଙ୍କୁ ଧରିଥିଲା। ପରେ ଭିଜିଲାନ୍ସ ତାଙ୍କୁ ଗିରଫ କରିଥିବା ଜଣାପଡ଼ିଛି । ତେବେ ଏଆର୍ଆଇ ଲାଞ୍ଚ ନେବା କଥାକୁ ଅସ୍ବୀକାର କରିଛନ୍ତି। ଏନେଇ ପଚରାଯିବାରେ କେନ୍ଦୁଝର ଭିଜିଲାନ୍ସ ଡିଏସପି ଦେବଦତ୍ତ ସେଠୀ କହିଛନ୍ତି ଯେ, ଜାକ୍ରିଏସଙ୍କ ଅଭିଯୋଗ ପରେ ଯୋଜନା କରାଯାଇ ଏଆର୍ଆଇ ରାମେଶ୍ୱର ଲାଞ୍ଚ ନେଉଥିବା ବେଳେ ଚଢ଼ାଉ କରି ରେଡ ହ୍ୟାଣ୍ଡ ଧରାଯାଇଛି।
