ସିଡନୀ,୨୧।୪ (ପି.ଟି.)- ଚଳିତ ବର୍ଷ ଶେଷ ଆଡକୁ ଭାରତ ବିପକ୍ଷରେ ଅଷ୍ଟ୍ରେଲିଆ ଘରୋଇ ପରିବେଶରେ ୪ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଖେଳିବାର କାର୍ଯ୍ୟକ୍ରମ ରହିଛି। ତେବେ ଏହି ସିରିଜକୁ ୫ ମ୍ୟାଚ୍ ବିଶିଷ୍ଟ କରିବା ପାଇଁ କ୍ରିକେଟ ଅଷ୍ଟ୍ରେଲିଆ ଚିନ୍ତା କରୁଛି। କୋଭିଡ-୧୯ ମହାମାରୀ କାରଣରୁ ହୋଇଥିବା ଆର୍ଥିକ କ୍ଷତିର ଭରଣା ପାଇଁ କ୍ରିକେଟ ଅଷ୍ଟ୍ରେଲିଆ ଏଭଳି ଦିଗ ବିଷୟରେ ଚିନ୍ତା କରିବା ଆରମ୍ଭ କରିଛି। ଅକ୍ଟୋବରରେ ଏକ ଟି୨୦ ସିରିଜ ଖେଳିବା ପରେ ଭାରତର ଆଷ୍ଟ୍ରେଲିଆ ଗସ୍ତ ଆରମ୍ଭ ହେବ ଓ ଡିସେମ୍ବରରେ ୪ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଶେଷ ହେବାର କାର୍ଯ୍ୟକ୍ରମ ରହିଛି। ଏହ ମଧ୍ୟରେ ଟି୨୦ ବିଶ୍ୱକପ୍ ମଧ୍ୟ ଆୟୋଜନ ହେବ ଓ ଏହି ମେଗା ଇଭେଣ୍ଟ ଅକ୍ଟୋବର ୧୮ ତାରିଖରେ ଆରମ୍ଭ ହେବ। ଏବେ କରୋନା ଭାଇରସ ସଂକ୍ରମଣ କାରଣରୁ ଟି୨୦ ବିଶ୍ୱକପ୍ ଆୟୋଜନ ହେବା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
କ୍ରିକେଟ ଅଷ୍ଟ୍ରେଲିଆ ଏବେ ଆର୍ଥିକ ସଙ୍କଟ ଦେଇ ଗତି କରୁଥିବାରୁ ଭାରତ ବିପକ୍ଷରେ ଆଉ ଏକ ଟେଷ୍ଟ ଖେଳିବାର ଯୋଜନା କରୁଛି ବୋଲି କ୍ରିକେଟ ଅଷ୍ଟ୍ରେଲିଆ ମୁଖ୍ୟ କାର୍ଯ୍ୟନିର୍ବାହୀ କେଭିନ ରବଟର୍ସ କହିଛନ୍ତି। ସୌଭାଗ୍ୟ ବଶତଃ ଆମ ପାଖରେ ଏ ନେଇ ଆବଶ୍ୟକ ସମୟ ରହିଛି। ତେବେ ଯେକୌଣସି ପ୍ରକାର ସମ୍ଭାବନାକୁ ଏଡାଇ ଦିଆଯାଇ ନ ପାରେ ବୋଲି ସେ କହିଛନ୍ତି। ଦର୍ଶକଙ୍କ ବିନା ରୁଦ୍ଧଦ୍ୱାରରେ ଟି୨୦ ବିଶ୍ୱକପ୍ ଆୟୋଜନ କରିବାକୁ କ୍ରିକେଟ ଅଷ୍ଟ୍ରେଲିଆ ମଧ୍ୟ ଆଲୋଚନା ଜାରି ରଖିଛି। ଯେକୌଣସି ପ୍ରକାର ପରିସ୍ଥିତିରେ ଟି୨୦ ବିଶ୍ୱକପ୍ ଆୟୋଜନ କରିବାକୁ ଅଷ୍ଟ୍ରେଲିଆ ବଦ୍ଧପରିକର ବୋଲି ସେ କହିଛନ୍ତି।
