କୋଲକାତା,୧୦ ।୯: ପଶ୍ଚିମବଙ୍ଗର ହାଇ ପ୍ରୋଫାଇଲ ବିଧାନସଭା ଆସନ ଭବାନିପୁର ପାଇଁ ସେପ୍ଟେମ୍ବର ୩୦ରେ ଉପନିର୍ବାଚନ ଅନୁଷ୍ଠିତ ହେବ । ତୃଣମୂଳ କଂଗ୍ରେସ ମୁଖ୍ୟ ତଥା ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଶୁକ୍ରବାର ଏହି ଆସନ ପାଇଁ ପ୍ରାର୍ଥିପତ୍ର ଦାଖଲ କରିଛନ୍ତି । ଏହି ଆସନରୁ ପୂର୍ବରୁ ସେ ଦୁଇଥର ବିଜୟୀ ହୋଇ ସାରିଛନ୍ତି । ମୁଖ୍ୟମନ୍ତ୍ରୀ ତାଙ୍କ ଆସନ ବଞ୍ଚାଇବାକୁ ଏହି ଆସନରୁ ବିଜୟୀ ହେବା ଜରୁରୀ । ମେ’ ୨ରେ ପଶ୍ଚିମବଙ୍ଗ ବିଧାନସଭା ନିର୍ବାଚନର ଫଳାଫଳ ଅନୁଯାୟୀ ମମତା ନନ୍ଦିଗ୍ରାମ ଆସନରୁ ହାରି ଯାଇଥିଲେ । ଏହାପରେ ବି ମମତା ମୁଖ୍ୟମନ୍ତ୍ରୀ ଆସନରେ ବସିଥିଲେ । ବର୍ତ୍ତମାନ ସେ ବିଧାନସଭାର ସଦସ୍ୟ ନୁହଁନ୍ତି । ଏହାସହ ମୁଖ୍ୟମନ୍ତ୍ରୀ ହେବାର ୬ମାସ ମଧ୍ୟରେ ତାଙ୍କୁ ସଦସ୍ୟତା ହାସଲ କରିବା ଜରୁରୀ । ଏପଟେ ଭାବନିପୁରର ବିଧାୟକ ଥିବା ଶୋଭନ ଦେବ ଚଟୋପାଧ୍ୟାୟ ଏବେ ଖରଦାହା ବିଧାନସଭା ଆସନରୁ ନିର୍ବାଚନ ଲଢିବେ । ଯେ କି ମମତାଙ୍କ ନିର୍ବାଚନ ଲଢିବା ପାଇଁ ଭବାନିପୁର ଆସନରୁ ଇସ୍ତଫା ଦେଇଥିଲେ । ଏହା ପୂର୍ବରୁ ମମତା ଦୁଇଥର ଭବାନିପୁର ଆସନରୁ ବିଜୟୀ ହୋଇଛନ୍ତି । ଭବାନିପୁର ବ୍ୟତୀତ ସେପ୍ଟେମ୍ବର ୩୦ରେ ଶମଶେରଗଞ୍ଜ ଓ ଜଙ୍ଗିପୁର ବିଧାନସଭା ଆସନ ପାଇଁ ଭୋଟିଂ ହେବ । ମତଗଣନା ୩ ଅକ୍ଟୋବରରେ ହେବ । ଏହି ଆସନରେ ମମତାଙ୍କୁ ଟକ୍କର ଦେବେ ଭାରତୀୟ ଜନତା ପାର୍ଟି(ଭଜପା)ର ପ୍ରିୟଙ୍କା ଟେବରିୱାଲ ।
