ନୂଆଦିଲ୍ଲୀ,୨୨।୩: କରୋନା ସଂକ୍ରମଣକୁ ଦୃଷ୍ଟିରେ ରଖି ଭାରତ ସରକାରଙ୍କ ପକ୍ଷରୁ ଦେଶବ୍ୟାପି ଲୋକଙ୍କ ମଧ୍ୟରେ ସଚେତନତା ବାର୍ତ୍ତା ପ୍ରସାରଣ ଜାରି ରଖିଛନ୍ତି। କରୋନାଠାରୁ ଦୂରେଇ ରହିବା ପାଇଁ ସାନିଟାଇଜେଶନ୍ ଜରୁରୀ। ଘର ଏବଂ କାର୍ଯ୍ୟାଳୟର ପରିମଳ ବ୍ୟବସ୍ଥା ବଜାୟ ରଖିଲେ ଏହି ଭୂତାଣୁଠାରୁ ସହଜରେ ରକ୍ଷା ମିଳିପାରିବ ବୋଲି ବିଶ୍ୱ ସ୍ବାସ୍ଥ୍ୟ ସଂଗଠନ ପକ୍ଷରୁ କୁହାଯାଇଛି। ସମ୍ପ୍ରତି ସାନିଟାଇଜର ବଜାରରେ ପର୍ଯ୍ୟାପ୍ତ ମିଳୁ ନ ଥିବାରୁ ଘରେ ବ୍ଲିଚିଂ ପାଉଡ଼ରରୁ କିଭଳି ସହଜରେ ସାନିଟାଇଜର ପ୍ରସ୍ତୁତ କରିହେବ ସେ ନେଇ ନୋଏଡ଼ାର ଗୌତମବୁଦ୍ଧ ନଗରର ସ୍ବାସ୍ଥ୍ୟ ବିଭାଗ ପକ୍ଷରୁ ଲୋକଙ୍କୁ ସଚେତନ କରାଯାଇଛି। ୧୦ ଲିଟର ପାଣିରେ ୧୦୦ ଗ୍ରାମ୍ ବ୍ଲିଚିଂ ପାଉଡ଼ର ପକାଇ ଏହାକୁ ଭଲ ଭାବେ ଘାଣ୍ଟିବା ପରେ ଏଥିରେ ଘର ଅବା କାର୍ଯ୍ୟାଳୟକୁ ଦିନରେ ୨ରୁ ୩ଥର ପୋଛିଲେ ଚଟାଣରେ ଥିବା ଭୂତାଣୁ ନଷ୍ଟ ହୋଇଯାଇଥାଏ। ଏହି ପାଣିରେ ଝରକା ରେଲିଂ, ଡୋର୍ ନବ୍ ଆଦିକୁ ପୋଛିଲେ ବାୟୁମଣ୍ଡଳରୁ ଆସି ଏସବୁ ସ୍ଥାନରେ ଲାଗିଥିବା ଭୂତାଣୁ ନଷ୍ଟ ହୋଇଯାଇଥାନ୍ତି ବୋଲି ଗୌତମବୁଦ୍ଧ ନଗରର ସ୍ବାସ୍ଥ୍ୟ ବିଭାଗର ୨୦୦ ଟିମ୍ ଘରକୁ ଘର ବୁଲି ଲୋକଙ୍କୁ ସଚେତନ କରୁଛନ୍ତି।
