ଛେଣ୍ଡିପଦା,୨ା୬(ଡି.ଏନ.ଏ.)- ଜରାଜୀର୍ଣ୍ଣ ଅବସ୍ଥାରେ ପଡିରହିଛି ଅନୁଗୋଳ ଜିଲା ଛେଣ୍ଡିପଦା ତହସିଲ ତଥା ଜରପଡା ରାଜସ୍ବ ସର୍କଲର ଦୁର୍ଗାପୁର ଗ୍ରାମସ୍ଥିତ ବ୍ରିଟିଶ ଅମଳର ଏକ ବ୍ରିଟିଶ ବଙ୍ଗଳା। ରାଜସ୍ବ ବିଭାଗ ତଥା ଜିଲା ପ୍ରଶାସନ ପକ୍ଷରୁ ଆବଶ୍ୟକ ରକ୍ଷଣାବେକ୍ଷଣ ତଥା ମରାମତି ଅଭାବ ଯୋଗୁ ଏହି ବଙ୍ଗଳା ଭୂତକୋଠିରେ ପରିଣତ ହେଲାଣି। ବହୁବାର ଦାବି ସତ୍ତ୍ୱେ ଏହାର ପୁନରୁଦ୍ଧାର କରାଯାଉ ନ ଥିବା ଅଞ୍ଚଳବାସୀ ଅଭିଯୋଗ କରିଛନ୍ତି।
ଜିଲାର ତତ୍କାଳୀନ ତିନିଦେଶ ପ୍ରଗଣା ଅଞ୍ଚଳରେ ବ୍ରିଟିଶ ଶାସନ ବ୍ୟବସ୍ଥା ସୁପରିଚାଳନା, ତଦାରଖ ତଥା କର, ଖଜଣା, ମାହାସୁଲ ଆଦି ଆଦାୟ କରାଯିବା ସାଙ୍ଗକୁ ବ୍ରିଟିଶ ସରକାରଙ୍କ ଲାଟ ସାହେବଙ୍କ ରହଣି ଆଦି ପାଇଁ ଦୁର୍ଗାପୁର ଗ୍ରାମଠାରେ ଏହି ବଙ୍ଗଳା ନିର୍ମାଣ କରାଯାଇଥିଲା। ପୋଡା ଇଟା ଓ ଚୂନ ଅଠା ମାଧ୍ୟମରେ ଏହି କୋଠା ତିଆରି ହୋଇଥିଲା। ଏହାସହ କାରୁକାର୍ଯ୍ୟ ପୂର୍ଣ୍ଣ ପାନିଆରି କବାଟ ଏବଂ କାଠରେ ତିଆରି ଝରକା ମଧ୍ୟ ଖଞ୍ଜା ଯାଇଥିଲା। ହେଲେ ଏହାର ଅବସ୍ଥା ଏବେ ଶୋଚନୀୟ ହୋଇପଡିଛି। ବଙ୍ଗଳାର ଛାତ ଭୁସୁଡି ପଡିଥିବା ବେଳେ କେବଳ ୧୫/୨୦ ଇଞ୍ଚ ଓସାରିଆ କାନ୍ଥ ରହିଛି। ଏହା ଚାରିପାଖରେ ସରକାରୀ ଜାଗା ମଧ୍ୟ ରହିଛି।
ସ୍ବାଧୀନତା ଆନ୍ଦୋଳନ ତଥା ଓଡ଼ିଶା ରାଜନୈତିକ ଇତିହାସ କ୍ଷେତ୍ରରେ ଏହି ଅଞ୍ଚଳ ସ୍ମାରକୀ ବହନ କରୁଛି। ତେଣୁ ଏଠାରେ ଥିବା ବହୁ ପୁରାତନ ବଙ୍ଗଳା ପୁନରୁଦ୍ଧାର କରାଗଲେ ଆଗାମୀ ଦିନରେ ଏହା ଦର୍ଶନୀୟ ସ୍ଥାନ ଭାବେ ପରିଗଣିତ ହୋଇପାରିବ ବୋଲି ବିଭିନ୍ନ ମହଲରେ ମତ ପ୍ରକାଶ ପାଇଛି। ଏଥିପ୍ରତି ଜିଲା ପ୍ରଶାସନ ତଥା ରାଜସ୍ବ ବିଭାଗ ପକ୍ଷରୁ ସ୍ବତନ୍ତ୍ର ପଦକ୍ଷେପ ନିଆଯିବାକୁ ସାଧାରଣରେ ଦାବି ହୋଇଛି। ଏ ସମ୍ପର୍କରେ ଛେଣ୍ଡିପଦା ତହସିଲଦାର ଡାନିଏଲ ଏକ୍କା କୁହନ୍ତି, ରାଜସ୍ବ ବିଭାଗ ଅଧୀନରେ ଏହି ବଙ୍ଗଳା ରହିଛି। ଉକ୍ତ ବଙ୍ଗଳା ପରିଦର୍ଶନ କରିବା ସହ ସମ୍ପୂର୍ଣ୍ଣ ତଦାରଖ କରାଯିବା ପରେ ପରବର୍ତ୍ତୀ ପଦକ୍ଷେପ ନିଆଯିବ ଏବଂ ଜିଲା ପ୍ରଶାସନକୁ ଅବଗତ କରାଯିବ।
