ତିହିଡ଼ି, ୧୯।୭ (ଡି.ଏନ.ଏ.) – ଭଦ୍ରକ ଜିଲା ତିହିଡ଼ି ବ୍ଲକ ଅଧୀନ ପାଳିଆବିନ୍ଧାସ୍ଥିତ ବିରଞ୍ଚିନାରାୟଣ ମାଧବ ଅର୍ଜୁନ(ବିଏନ୍ଏମ୍ଏ) କଲେଜର ଭିତ୍ତିଭୂମି ବିକାଶ ପାଇଁ ବିଶ୍ୱବ୍ୟାଙ୍କ ପକ୍ଷରୁ ୧୦ କୋଟି ଟଙ୍କାର ସହାୟତା ରାଶି ମଞ୍ଜୁର ହୋଇଥିଲା। ଏହି ଅନୁଦାନ ଅର୍ଥ ମିଳିବାରେ ଅହେତୁକ ବିଳମ୍ବ ଘଟିଛି। ଫଳରେ କଲେଜର ଭିତ୍ତିଭୂମି ବିକାଶ ହୋଇପାରୁ ନାହିଁ। ଦୁଇମାସ ପୂର୍ବେ କଲେଜର ଅଧ୍ୟକ୍ଷ ଡ. ଅଜିଜୁର ରହେମାନ ଓଏମ୍ୟୁରେ ସ୍ବାକ୍ଷର କରିସାରିଥିଲେ ମଧ୍ୟ ଅନୁଦାନ ଅର୍ଥ ମଳିପାରି ନାହିଁ ବୋଲି ଜଣାଯାଇଛି।
ଉଲ୍ଲେଖନୀୟ ଯେ, ୨୦୧୭ରେ ରାଜ୍ୟ ସରକାରଙ୍କ ଜରିଆରେ ଅର୍ଥ ସହାୟତା ସକାଶେ କଲେଜ ପକ୍ଷରୁ ଆବେଦନ କରାଯାଇଥିଲା। ଏହାକୁ ଦୃଷ୍ଟିରେ ରଖି ରାଜ୍ୟ ସରକାରଙ୍କ ଉଚ୍ଚ ଶିକ୍ଷା ବିଭାଗ ଚିଠି ନମ୍ବର ୬୬୩/୨।୩।୧୯ ଅନୁଯାୟୀ କଲେଜକୁ ୧୦କୋଟି ଟଙ୍କା ମଞ୍ଜୁର ହୋଇଛି। ଏହି ଟଙ୍କାରେ ଅନୁସୂଚିତ ଜାତି ଓ ଜନଜାତି ଛାତ୍ରୀଛାତ୍ରଙ୍କ ନିମନ୍ତେ ହଷ୍ଟେଲ ନିର୍ମାଣ, ଆବଶ୍ୟକ ଶ୍ରେଣୀଗୃହ, ଅତ୍ୟାଧୁନିକ ପାନୀୟଜଳ ବ୍ୟବସ୍ଥା ଓ ଶୌଚାଳୟ, ଲାବୋରେଟୋରି, ପାଠାଗାର ଓ କମ୍ପ୍ୟୁଟର ଗୃହ, ସ୍ବତନ୍ତ୍ର ବିଭାଗ ପ୍ରକୋଷ୍ଠ ନିର୍ମାଣ ଓ ସ୍ବତନ୍ତ୍ର ବିଦ୍ୟୁତ୍ ସଂଯୋଗ ବ୍ୟବସ୍ଥା ହେବା ସହ କଲେଜରେ ଥିବା ବିଭିନ୍ନ ସମସ୍ୟାର ଦୂରୀକରଣ ହୋଇପାରିବ ବୋଲି କୁହାଯାଇଥିଲା। ୟୁଜିସି ନାକ୍ ମାନ୍ୟତାପ୍ରାପ୍ତ ଜିଲାର ଏହି ପୁରାତନ ଶିକ୍ଷାନୁଷ୍ଠାନର ନବୀକରଣ ପାଇଁ ଉଦ୍ଦିଷ୍ଟ ଏହି ସହାୟତା ରାଶି ମିଳିବାରେ ବିଳମ୍ବ ହୋଇଛି। ପୂର୍ବତନ ଅଧ୍ୟକ୍ଷ ପ୍ରାଧ୍ୟାପକ କମଳାକାନ୍ତ ବିଶ୍ୱାଳଙ୍କ ଉଦ୍ୟମକ୍ରମେ ମଞ୍ଜୁର ହୋଇଥିବା ଅନୁଦାନ ତୁରନ୍ତ ମିଳିବା ଲାଗି ବର୍ତ୍ତମାନର ଅଧ୍ୟକ୍ଷ ଡ. ରହେମାନ ଉଦ୍ୟମ କରୁଥିଲେ ମଧ୍ୟ ଏଥିରେ ଅହେତୁକ ବିଳମ୍ବ ଘଟିଛି। ଏ ସମ୍ପର୍କରେ ଅଧ୍ୟକ୍ଷ ଡ. ରହେମାନ ବିଶ୍ୱବ୍ୟାଙ୍କ ଅର୍ଥରାଶି ପାଇଁ ସେ ତତ୍ପରତା ପ୍ରକାଶ କରିଛନ୍ତି। ଏପରିକି ଦୁଇମାସ ପୂର୍ବେ ଓଏମୟୁରେ ସ୍ବାକ୍ଷର କରିଥିଲେ ମଧ୍ୟ ସହାୟତା ରାଶି ମିଳିବାରେ ବିଳମ୍ବ ହେବା ପରିତାପର ବିଷୟ ବୋଲି ସେ କହିଛନ୍ତି।
