ବଇଣ୍ଡା,୧୪।୩(ଡି.ଏନ.ଏ.)
ଅନୁଗୋଳ ଜିଲା ଆଠମଲ୍ଲିକ ବ୍ଲକ ଠାକୁରଗଡ଼ ଥାନା ପିତାବଳୀବାହାଳ ଛକ(କନ୍ତପଡ଼ା)ଠାରୁ ବିପ୍ରଡିହ ପର୍ଯ୍ୟନ୍ତ ଦୀର୍ଘ ୧୨ କିମି ମାଟି ରାସ୍ତାକୁ ମୁଖ୍ୟମନ୍ତ୍ରୀ ସଡ଼କ ଯୋଜନା ପକ୍କା ରାସ୍ତା ନିର୍ମାଣ କରାଯାଉଛି। ହେଲେ ଉକ୍ତ ରାସ୍ତା ଠିକାଦାର-ବିଭାଗୀୟ ଯନ୍ତ୍ରୀଙ୍କ ମଧ୍ୟରେ ସଲାସୁତୁରା ଯୋଗୁ ଅତି ନିମ୍ନମାନର ହେଉଥିବା ନେଇ ବୁଧବାର ଗୋପୀନାଥପୁର, ବିପ୍ରଡିହ, ପିତାବଳୀବାହାଳ, କେଞ୍ଚୁଆନାଳୀ ଗ୍ରାମବାସୀ ଅନୁଗୋଳ ଜିଲାପାଳଙ୍କଠାରେ ଭିଜିଲାନ୍ସ ତଦନ୍ତ କରିବା ପାଇଁ ଅଭିଯୋଗ କରିଥିଲେ। ଶୁକ୍ରବାର ଗ୍ରାମ୍ୟ ଉନ୍ନୟନ ବିଭାଗର ନିର୍ବାହୀ ଯନ୍ତ୍ରୀ ବୈକୁଣ୍ଠନାଥ ଷଡଙ୍ଗୀ, କନିଷ୍ଠ ଯନ୍ତ୍ରୀ ବସନ୍ତ କୁମାର ବସ୍ତିଆଙ୍କ ସହ ଏକ ଟିମ ଉକ୍ତ ଗ୍ରାମକୁ ଯାଇ ତଦନ୍ତ ଆରମ୍ଭ କରିଛନ୍ତି। କନ୍ତପଡ଼ା ସମିତିସଭ୍ୟ ଯଦୁମଣି ସାହୁ, ଅଜିତ କୁମାର ପ୍ରଧାନ, ଅଶ୍ୱିନୀ ପ୍ରଧାନ, ପ୍ରଦୀପ କୁମାର ପ୍ରଧାନ, ନବକୃଷ୍ଣ ସାହୁ, ବାବାଜୀ ବେହେରା, ସୁମତି ଗଡ଼ନାୟକ, ମଞ୍ଜରୀ ପ୍ରଧାନ, ବୃଷଭ ବେହେରାଙ୍କ ଉପସ୍ଥିତରେ ବିଭାଗୀୟ ଅଧିକାରୀମାନେ ତଦନ୍ତ ଆରମ୍ଭ କରିଥିଲେ। ନିର୍ମାଣ ହୋଇଥିବା ମେଣ୍ଟାଲିଂ ରାସ୍ତାକୁ ଖୋଳାଯାଇ ଭାଗ ମାପ ସମ୍ପର୍କରେ ତଦନ୍ତ କରାଯିବାସହ ଧୋଇ ହୋଇଯାଇଥିବା ରାସ୍ତାର ପୁନଃନିର୍ମାଣ ପାଇଁ ବିଭାଗୀୟ ଅଧିକାରୀମାନେ ଠିକାଦାରଙ୍କୁ ନିର୍ଦ୍ଦେଶ ଦେଇଥିଲେ। ଏଥିସହ ଗ୍ରାମବାସୀମାନେ ନିର୍ମାଣ ହୋଇଥିବା ପୋଲ ଗୁଡ଼ିକ ମଧ୍ୟ ନିମ୍ନମାନର କରାଯାଇଥିବା ବିଭାଗୀୟ ଅଧିକାରୀଙ୍କଠାରେ ଅଭିଯୋଗ କରିଥିଲେ। ଏ ନେଇ ମଧ୍ୟ ତଦନ୍ତ କରାଯିବ ବୋଲି ଅଧିକାରୀମାନେ ଗ୍ରାମବାସୀଙ୍କୁ ପ୍ରତିଶ୍ରୁତି ଦେଇଥିଲେ। ଜଙ୍ଗଲ ଅଧ୍ୟୁଷିତ ଅଞ୍ଚଳରେ ଏହି ରାସ୍ତା ହୋଇଥିବା ଯୋଗୁ ଅତି କଦର୍ଯ୍ୟ ସହ ନିମ୍ନମାନର କରାଯାଇ ଅର୍ଥକୁ ବାଟମାରଣା କରିବା ପାଇଁ ଯୋଜନା କରାଯାଉଥିବା ଗ୍ରାମବାସୀ ଅଭିଯୋଗ କରିଛନ୍ତି।
