ଆନନ୍ଦପୁର,୨୩।୯(ସ୍ବ.ପ୍ର.): କେନ୍ଦୁଝର ଜିଲା ଘସିପୁରା ବ୍ଲକ କୋଚିଆନେଣ୍ଡି ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟ କମିଟି ପକ୍ଷରୁ ପ୍ରଧାନ ଶିକ୍ଷୟିତ୍ରୀ ପୁଷ୍ପଲତା ପଟ୍ଟନାୟକଙ୍କ ବିରୋଧରେ ଗତ ଶନିବାର ଏକ ଅଭିଯୋଗପତ୍ର ଦାଖଲ କରାଯାଇଥିଲା। ଅଭିଯୋଗକୁ ଆଧାର କରି ସୋମବାର ବ୍ଲକ ଶିକ୍ଷାଧିକାରୀ କ୍ଷେତ୍ରମୋହନ ହାଁସଦା, ସିଆର୍ସିସି ଅନାମ ଚରଣ ମାଝି ବିଦ୍ୟାଳୟରେ ପହଞ୍ଚି ପରିଚାଳନା କମିଟି ସଦସ୍ୟଙ୍କ ସହିତ ଆଲୋଚନା କରିଛନ୍ତି। ଏହା ସହିତ ବିଦ୍ୟାଳୟକୁ ଆସୁଥିବା କମ୍ପୋଜିଟ୍ ଫଣ୍ଡ ସମ୍ପର୍କରେ ମଧ୍ୟ ଆଲୋଚନା କରିଛନ୍ତି। ଏହି ଅର୍ଥରେ ବିଦ୍ୟାଳୟର ପାଠ୍ୟ ପୁସ୍ତକ, ବିଦ୍ୟାଳୟର ସାମୁହିକ ମରାମତି, ପାନୀୟ ଜଳର ବ୍ୟବସ୍ଥା, ଖେଳ ଉପକରଣ ଆଦିରେ ବିନିଯୋଗ ହେବ ବୋଲି ସେ ଅବଗତ କରାଇଛନ୍ତି। ଏହି ଅର୍ଥ ରିଜୋଲ୍ୟୁଶନ୍ କରାଯାଇ ବ୍ୟୟ କରାଯିବ ବୋଲି ସେ କହିଛନ୍ତି। ପରେ ବିଦ୍ୟାଳୟ ପରିଚାଳନା କମିଟି ସଦସ୍ୟ ଓ ଅଭିଭାବକମାନେ ପ୍ରଧାନ ଶିକ୍ଷୟିତ୍ରୀଙ୍କ ବଦଳି ଦାବିକରି ବିଦ୍ୟାଳୟର ହୋଇଥିବା ଅନିୟମିତତା ସମ୍ପର୍କରେ ଦେଇଥିବା ଅଭିଯୋଗ ପତ୍ର ସମ୍ପର୍କରେ ଆଲୋଚନା କରିଥିଲେ। ପରିଚାଳନା କମିଟି କରିଥିବା ଅଭିଯୋଗ ସମ୍ପୂର୍ଣ୍ଣ ତଥ୍ୟ ସମ୍ବଳିତ ଏବଂ ଏହା ତଦନ୍ତସାପେକ୍ଷ ବୋଲି ହାଁସଦା କହିଛନ୍ତି। ଏଥିଲାଗି ଚଳିତ ମାସ ୨୬ ଓ ୨୭ ତାରିଖରେ ୩ ଜଣ ଏବିଇଓ, ଆକାଉଟାଣ୍ଟଙ୍କ ଦ୍ୱାରା ତଦନ୍ତ କାର୍ଯ୍ୟ ତ୍ୱରାନ୍ବିତ କରାଯିବ ବୋଲି ସେ କହିଛନ୍ତି। ତଦନ୍ତ ପରେ ଯାହା କିଛି ନିଷ୍ପତ୍ତି ନିଆଯିବ ବୋଲି ବିଇଓ କମିଟିର ସଦସ୍ୟ ଓ ଅଭିଭାବକମାନଙ୍କୁ ଜଣାଇଛନ୍ତି।
ସୂଚନାଯୋଗ୍ୟ, ବିଦ୍ୟାଳୟର ଅପରିଷ୍କାର ପରିବେଶ, ମଧ୍ୟାହ୍ନଭୋଜନ, ପାନୀୟ ଜଳ ସମସ୍ୟା, ଖେଳ ଉପକରଣ କିଣା ନ ଯିବା ଆଦିରେ ଅନିୟମିତତା ନେଇ ଅଭିଭାବକମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା। ଫଳରେ ଅଭିଭାବକ ଶ୍ରେଣୀ ଗୃହରୁ ଛାତ୍ରୀଛାତ୍ରଙ୍କୁ ବାହାରକୁ ବାହାର କରି ତାଲା ପକାଇଦେଇଥିଲେ। ଏପରିକି ପ୍ରଧାନ ଶିକ୍ଷୟିତ୍ରୀଙ୍କୁ ତୁରନ୍ତ ବିଦ୍ୟାଳୟରୁ ଅନ୍ୟତ୍ର ସ୍ଥାନାନ୍ତର ପାଇଁ ଦାବି କରିଥିଲେ।
