ନବି ମୁମ୍ବାଇ, ୨୫ା୨ (ପି.ଟି.)-ଭାରତର ପୂର୍ବତନ ବାମହାତୀ ଓଡ଼ିଆ ସ୍ପିନର ପ୍ରଜ୍ଞାନ ଓଝା ବିଦେଶରେ ଟି୨୦ ଲିଗ୍ ଖେଳିବା ଲାଗି ଆଗ୍ରହ ପ୍ରକାଶ କରିଛନ୍ତି। ଏଥିପାଇଁ ସେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)ର ଅନୁମତି ନେବେ ବୋଲି କହିଛନ୍ତି। ଓଝା ଗତ ସପ୍ତାହରେ ଅନ୍ତର୍ଜାତୀୟ ଓ ପ୍ରଥମ ଶ୍ରେଣୀ କ୍ରିକେଟରୁ ଅବସର ଘୋଷଣା କରିଛନ୍ତି। ଅବସର ପରେ ମୁଁ କ’ଣ କରିବି ସେ ନେଇ କେତେକ କଥା ମୋ ମନରେ ରହିଛି। ପ୍ରଥମତଃ ମୁଁ ବିସିସିଆଇ ସହିତ ରହିବି। କମେଣ୍ଟ୍ରି କରିବା ପାଇଁ ମଧ୍ୟ ମୋର ଆଗ୍ରହ ରହିଛି। ଭାରତ ବାହାରେ ବିଦେଶରେ କେତେକ ଲିଗ୍ରେ ଖେଳିବା ଲାଗି ମୋର ଇଚ୍ଛା ରହିଛି। ତେବେ ବିସିସିଆଇ ଯଦି ଅନୁମତି ଦିଏ। ଏଠାରେ ଡିଓ୍ବାଇ ପାଟିଲ ଟି୨୦ କପ୍ ଟୁର୍ନାମେଣ୍ଟ ଦେଖିବା ଲାଗି ଆସିଥିବା ବେଳେ ଖବରଦାତାଙ୍କ ଦ୍ୱାରା ପଚରାଯାଇଥିବା କେତୋଟି ପ୍ରଶ୍ନର ଉତ୍ତରରେ ସେ ଏକଥା କହିଛନ୍ତି। ଓଝା କରିତକର୍ମା ମହେନ୍ଦ୍ର ସିଂ ଧୋନୀଙ୍କ ଅଧୀନରେ ଖେଳିଛନ୍ତି। ପୂର୍ବତନ ଅଧିନାୟକଙ୍କୁ ସେ ‘ବୋଲର୍ସ କ୍ୟାପଟେନ୍’ ବୋଲି ଆଖ୍ୟା ଦେଇଛନ୍ତି। ଧୋନୀ ଏଭଳି ଜଣେ ଅଧିନାୟକ ସେ ବୋଲରଙ୍କ ମନ କଥା ବୁଝିପାରନ୍ତି ଏବଂ ଆବଶ୍ୟକ ଟିପ୍ସ ମଧ୍ୟ ଦେଇଥାନ୍ତି। ବୋଲିଂକୁ ଚାହିଁ ଫିଲ୍ଡିଂ ସଜାଇଥାନ୍ତି। ଓଝା ମୁମ୍ବାଇ ଇଣ୍ଡିଆନ୍ସ ଅଧିନାୟକ ରୋହିତ ଶର୍ମାଙ୍କର ମଧ୍ୟ ଉଚ୍ଚ ପ୍ରଶଂସା କରିଛନ୍ତି।
