ଖଇରା, ୧୭।୧୧(ଡି.ଏନ.ଏ.)-ସେଦିନ ଥିଲା ୧୯୯୮ ନଭେମ୍ବର ୧୭ତାରିଖ ା ବାଲେଶ୍ୱର ଜିଲା ଖଇରା ହାଇସ୍କୁଲରେ ବ୍ଲକସ୍ତରୀୟ ବିଜ୍ଞାନମେଳାର ଆୟୋଜନ କରାଯାଇଥିଲା। ବିଭିନ୍ନ ବିଦ୍ୟାଳୟରୁ ପିଲାମାନଙ୍କର ସୁଅ ଖଇରା ସରକାରୀ ହାଇସ୍କୁଲକୁ ଛୁଟିଥିଲା ା କେହି ବସରେ ତ କେହି ଟ୍ରେକରରେ ଆସିଥିଲେ। କୁପାରୀ ଅଞ୍ଚଳର ଗଡପୋଖରୀ, ବାଉଁଶଗଡିଆ, ବଗେଇପୁର, ହରିପୁରଠାରେ ଥିବା ବିଦ୍ୟାଳୟରୁ ପିଲାମାନେ ବିଜ୍ଞାନ ମେଳା ଦେଖିବାକୁ କୁପାରୀ ବସ୍ଷ୍ଟାଣ୍ଡକୁ ଆସିଥିଲେ। କୌଣସି ଯାତ୍ରୀବାହୀ ଗାଡି ଆସୁ ନ ଥିବାରୁ ସେମାନେ ବହୁ ସମୟ ଅପେକ୍ଷା କରିଥିଲେ। ଏହି ସମୟରେ ଆନନ୍ଦପୁରରୁ ବାଲି ବୋଝେଇ କରି ଖଇରା ଅଭିମୁଖେ ଯାଉଥିବା ଏକ ଟ୍ରକ(ନଂ.ଓଆର-୦୧-୫୧୮୫) ଡାଲାରେ ପିଲାମାନଙ୍କ ଦାୟିତ୍ୱରେ ଥିବା ଶିକ୍ଷକମାନେ ପ୍ରାୟ ୫୦ଜଣ ପିଲାଙ୍କୁ ବସାଇ ବିଜ୍ଞାନମେଳା ବୁଲାଇବାକୁ ନେଉଥିଲେ ା ଅର୍ଜୁନପୁର ଛକ ନିକଟରେ ବିପରୀତ ଦିଗରୁ ଆସୁଥିବା ଏକ ଟ୍ରେକରକୁ ସାଇଡ ଦେବା ବେଳେ ଟ୍ରକଟି ଭାରସାମ୍ୟ ହରାଇ ରାସ୍ତାକଡ ନୟନଯୋରି ଏବଂ ଏହା ସଂଲଗ୍ନ ଧାନଜମିକୁ ଓଲଟି ପଡିଥିଲା ା ଅଧିକାଂଶ ପିଲା ଟ୍ରକ ଡାଲା ବାଲି ତଳେ ଚାପି ହୋଇ ରହିଯାଇଥିଲେ। ନିକଟ ବିଲରେ କାମ କରୁଥିବା ଚାଷୀ, ସ୍ଥାନୀୟ ବ୍ୟବସାୟୀ ଧାଇଁ ଆସି ବାଲି ଟ୍ରକ ତଳୁ ପିଲାଙ୍କୁ ଉଦ୍ଧାର କରିବା ସହ ଆମ୍ବୁଲାନ୍ସ ଏବଂ ଖଇରା ପୋଲିସକୁ ଖବର ଦେଇଥିଲେ ା ହେଲେ ଏହି ମର୍ମନ୍ତୁଦ ଦୁର୍ଘଟଣାରେ ୮ଜଣ ଶିଶୁଙ୍କ ଜୀବନଦୀପ ଲିଭିଯାଇଥିଲା। ଏଭଳି ଦୁର୍ଘଟଣା ଖବର ସ୍ଥାନୀୟ ଅଞ୍ଚଳବାସୀଙ୍କୁ ସ୍ତବ୍ଧ କରିଦେଇଥିଲା। ଏହା ମଧ୍ୟରେ ୨୧ବର୍ଷ ବିତିଗଲାଣି। ଏଭଳି ଦୁଃଖ ଓ ଛାତିଥରା କାହାଣୀକୁ ମୃତ ପିଲାଙ୍କ ପରିବାର ଓ ଅଞ୍ଚଳବାସୀ ଏଯାଏ ଭୁଲି ପାରିନାହାନ୍ତି। ପ୍ରତିବର୍ଷ ଅଞ୍ଚଳବାସୀ ସେହି ସ୍ମୃତିକୁ ମନେପକାଇ ଝୁରି ହେଉଛନ୍ତି। ଗଡ଼ପୋଖରୀ ସ୍କୁଲରେ ୨ ପିଲାଙ୍କ ସ୍ମୃତିରେ ପ୍ରତିମୂର୍ତ୍ତି ନିର୍ମାଣ କରି ୧୭ତାରିଖରେ ସ୍ମୃତିଚାରଣ କରାଯାଉଛି।
