ବ୍ରହ୍ମପୁର ଅଫିସ୍,୧୦ା୬-ଖଲ୍ଲିକୋଟ କଲେଜ ଷ୍ଟାଡିୟମ୍ରେ ରବିବାର ନବମ ବିଜୁ ପଟ୍ଟନାୟକ ସ୍ମାରକୀ କ୍ରିକେଟ ଟୁର୍ନାମେଣ୍ଟ ଉଦ୍ଘାଟିତ ହୋଇଯାଇଛି। ଆସନ୍ତା ୧୩ତାରିଖ ପର୍ଯ୍ୟନ୍ତ ଚାଲିବାକୁ ଥିବା ଏହି ଟୁର୍ନାମେଣ୍ଟରେ ୮ ଦଳ ଭାଗ ନେଇଛନ୍ତି। ଗ୍ରୁପ୍ -ଏ’ରେ ୪ଟି ଦଳ ଯଥା ୟୁ ଆଣ୍ଡ ମି ବାଲେଶ୍ୱର, ଖଲ୍ଲିକୋଟ ଉଇଜାର୍ଡ଼, ଭୁବନେଶ୍ୱର ରାମେଶ୍ୱର କ୍ରିକେଟ କ୍ଲବ ଏବଂ ବ୍ରହ୍ମପୁର ରାମେଶ୍ୱର ସ୍ପୋର୍ଟିଂ କ୍ଲବ ରହିଛି। ସେହିଭଳି ଗ୍ରୁପ୍-ବି’ରେ ୪ଟି ଦଳ ଯଥା ଭୁବନେଶ୍ୱର କ୍ରାଉନ୍ ସ୍ପୋର୍ଟିଂ କ୍ଲବ, ବ୍ରହ୍ମପୁର ୟୁନିୟନ୍ କ୍ରିକେଟ କ୍ଲବ, ନବରଙ୍ଗପୁର କ୍ରିକେଟ କ୍ଲବ ଏବଂ ବ୍ରହ୍ମପୁର ଆଲ୍ଫା ସ୍ପୋର୍ଟିଂ କ୍ଲବ ରହିଛି । ରବିବାର ପ୍ରଥମ ମ୍ୟାଚ୍ ୟୁ ଆଣ୍ଡ ମି ବାଲେଶ୍ୱର ଏବଂ ଖଲ୍ଲିକୋଟ ଉଇଜାର୍ଡ଼ ମଧ୍ୟରେ ଖେଳାଯାଇଥିଲା। ପ୍ରଥମେ ବ୍ୟାଟିଂ କରିଥିବା ବାଲେଶ୍ୱର ଦଳ ୧୮୫ରନ୍ କରିଥିଲା । ଦଳ ତରଫରୁ ଦିବ୍ୟଶକ୍ତି ଚକ୍ରବର୍ତ୍ତୀ ସର୍ବାଧିକ ୮୫ରନ୍ ଏବଂ ଜାମିଲା ଭଞ୍ଜନ ମହାପାତ୍ର ୪୯ରନ୍ କରିଥିଲେ। ଜବାବରେ ଖଲ୍ଲିକୋଟ ଦଳ ମାତ୍ର ୧୩୩ରନ୍ କରି ପରାସ୍ତ ହୋଇଥିଲା। ବାଲେଶ୍ୱର ତରଫରୁ ଜାମିଲା ଭଞ୍ଜନ ମହାପାତ୍ର ୨ଉଇକେଟ୍ ନେଇଥିଲେ। ତାଙ୍କର ଅଲ୍ରାଉଣ୍ଡ ପ୍ରଦର୍ଶନ ପାଇଁ ମ୍ୟାନ୍ ଅଫ୍ ଦି ମ୍ୟାଚ୍ ପ୍ରଦାନ କରାଯାଇଥିଲା। ଆମ୍ପାୟର୍ ଭାବେ ଡି. ସାଇ ଏବଂ ସୁଶାନ୍ତ ପଣ୍ଡା ଖେଳ ପରିଚାଳନା କରିଥିଲେ। ସନ୍ଧ୍ୟାରେ ଦ୍ୱିତୀୟ ମ୍ୟାଚ୍ ଭୁବନେଶ୍ୱର କ୍ରାଉନ୍ ସ୍ପୋର୍ଟିଂ କ୍ଲବ ଏବଂ ବ୍ରହ୍ମପୁର ୟୁନିୟନ୍ କ୍ରିକେଟ କ୍ଲବ ମଧ୍ୟରେ ଖେଳାଯାଇଥିଲା। ଆୟୋଜିତ ଉଦ୍ଘାଟନ ଉତ୍ସବରେ ଜିଲା ଯୋଜନା କମିଟି ଅଧ୍ୟକ୍ଷ ଡା. ରମେଶ ଚନ୍ଦ୍ର ଚ୍ୟାଉପଟ୍ଟନାୟକ ମୁଖ୍ୟଅତିଥି ଭାବେ ଯୋଗଦେଇଥିବା ବେଳେ ସମ୍ମାନିତ ଅତିଥି ଭାବେ ବିଧାୟକ ବିକ୍ରମ କୁମାର ପଣ୍ଡା, ବିଡ଼ିଏ ଅଧ୍ୟକ୍ଷ ସୁବାସ ଚନ୍ଦ୍ର ମହାରଣା, ଆଇନଜୀବୀ ସଞ୍ଜିତ କୁମାର ପାଣିଗ୍ରାହୀ ପ୍ରମୁଖ ଯୋଗ ଦେଇଥିଲେ ।
ଆୟୋଜକ ଆଲ୍ଫା ସ୍ପୋର୍ଟିଂ କ୍ଲବ ସମ୍ପାଦକ ବିଜୟ ଭାସ୍କର ସିଂ ସାମନ୍ତ, ସଂଯୋଜକ ଜଗନ୍ନାଥ ମିଶ୍ର, ଆୟୋଜନ ସମ୍ପାଦକ ସୁରେନ୍ଦ୍ର କୁମାର ମହାରଣାଙ୍କ ସମେତ ସହରର ବହୁ ମାନ୍ୟଗଣ୍ୟ ବ୍ୟକ୍ତି ଯୋଗ ଦେଇଥିଲେ ।
