ସୋରଡା,୧ା୧୨(ଡି.ଏନ୍.ଏ.)- ପୁରୀ ଜିଲା ପିପିଲି ଅଞ୍ଚଳର ଏକ ସରକାରୀ ବିଦ୍ୟାଳୟର ଅଷ୍ଟମ ଶ୍ରେଣୀ ଛାତ୍ରୀ ୨ ମାସ ହେଲା ସ୍କୁଲକୁ ଆସୁ ନଥିଲେ। ଶିକ୍ଷୟିତ୍ରୀ ଜାଣିଲେ ଯେ, ତାଙ୍କର ଗଞ୍ଜାମ ଜିଲା ସୋରଡା ବ୍ଲକ ବଡଗଡ ଥାନା ଅଞ୍ଚଳରେ ବିବାହ ହୋଇଯାଇଛି। ଏନେଇ ସେ ଗଞ୍ଜାମ ଜିଲାପାଳଙ୍କୁ ଟୁଇଟ୍ କରି ଜଣାଇଥିଲେ। ଜିଲାପାଳ ବିଜୟ ଅମୃତା କୁଲାଙ୍ଗେଙ୍କ ନିର୍ଦ୍ଦେଶକ୍ରମେ ପୋଲିସ ଓ ସିଡିପିଓ ଅଫିସ କର୍ମଚାରୀ ଶୁକ୍ରବାର ନାବାଳିକାଙ୍କୁ ଶାଶୁଘରୁ ଉଦ୍ଧାର କରିଛନ୍ତି।
ପ୍ରକାଶ ଯେ, ସମ୍ପୃକ୍ତା ନାବାଳିକାଙ୍କ ଘର ସୋରଡା ବ୍ଲକ ବଡଗଡ଼ ଥାନା ଅଞ୍ଚଳରେ। ସେ ତାଙ୍କ ବାପାଙ୍କ ସହ ପିପିଲିରେ ରହି ପାଠ ପଢନ୍ତି। ୨ ମାସ ତଳେ ମୁଡେସକୁପା ଗ୍ରାମସ୍ଥିତ ତାଙ୍କ ମାମୁ ପୁଅଙ୍କ ସହ ନାବାଳିକାଙ୍କ ବିବାହ ହୋଇଥିଲା। ବିଦ୍ୟାଳୟକୁ ନ ଆସିବାରୁ ଶିକ୍ଷୟିତ୍ରୀ ଜଣକ ତାଙ୍କ ସହପାଠୀମାନଙ୍କୁ ପଚାରି ଜାଣିବାକୁ ପାଇଲେ ଯେ, ଗଞ୍ଜାମ ଜିଲାରେ ନାବାଳିକାଙ୍କର ବିବାହ ହୋଇଯାଇଛି। ଏନେଇ ସେ ଗଞ୍ଜାମ ଜିଲାପାଳଙ୍କୁ ଟୁଇଟ୍ କରି ଜଣାଇଥିଲେ। ଶୁକ୍ରବାର ଜିଲାପାଳ ବଡଗଡ ଥାନା ଓ ସୋରଡା ସିଡିପିଓଙ୍କୁ ସମ୍ପୃକ୍ତା ନାବାଳିକାଙ୍କୁ ଉଦ୍ଧାର ପାଇଁ ନିର୍ଦ୍ଦେଶ ଦେଇଥିଲେ। ପୋଲିସ ଓ ସିଡିପିଓ ଅଫିସ କର୍ମଚାରୀ ପହଞ୍ଚତ୍ ନାବାଳିକାଙ୍କୁ ଉଦ୍ଧାର କରିଥିଲେ। ଉଭୟ ପକ୍ଷଙ୍କ ସହମତିରେ ବିବାହ ହୋଇଥିବା ପୁଅଙ୍କ ବାପା କହିଛନ୍ତି। ବ୍ରହ୍ମପୁର ବଡ ମେଡିକାଲରେ ପ୍ରାଥମିକ ଚିକିତ୍ସା ପରେ ନାବାଳିକାଙ୍କୁ ଚାଇଲ୍ଡ ଲାଇନକୁ ହସ୍ତାନ୍ତର କରାଯାଇଛି। ଏନେଇ ସୋରଡା ସିଡିପିଓ କହିଛନ୍ତି, ଛାତ୍ରୀଙ୍କର ପଢିବାକୁ ବହୁତ ଆଗ୍ରହ ରହିଛି। ତାଙ୍କ ଅନିଚ୍ଛା ସତ୍ତ୍ୱେ ଉଭୟ ପରିବାର ଲୋକେ ଜୋରଜବରଦସ୍ତି ବିବାହ କରିଛନ୍ତି। ତାଙ୍କୁ ପିପିଲିରୁ ଗଁ। କୁ ଡାକି ଆଣି ମାମୁପୁଅ ଭାଇ ସହିତ ବିବାହ କରିଛନ୍ତି। ଆହୁରି ଆଗରୁ ତାଙ୍କୁ ଉଦ୍ଧାର କରିଥିଲେ ଭଲ ହୋଇଥାନ୍ତା ବୋଲି ନାବାଳିକା ଜଣକ କହିଛନ୍ତି।
