ନୂଆଦିଲ୍ଲୀ, ୧୬ା୭: ବାବ୍ରୀ ମସ୍ଜିଦ ଭଙ୍ଗ ମାମଲାର ଶୁଣାଣି କରୁଥିବା ସ୍ବତନ୍ତ୍ର ବିଚାରପତି ଏସ୍.କେ. ଯାଦବ ଶୁଣାଣି ଶେଷ କରିବା ଲାଗି ସୁପ୍ରିମକୋର୍ଟଙ୍କୁ ଅଧିକ ସମୟ ମାଗିଛନ୍ତି। ଏହି ମାମଲାରେ ଭାଜପାର ବରିଷ୍ଠ ନେତା ଏଲ୍.କେ. ଆଡଭାନୀ, ମୁରଲୀ ମନୋହର ଜୋଷୀ, କଲ୍ୟାଣ ସିଂ ପ୍ରମୁଖ ଅଛନ୍ତି। ଗତ ମେ’ରେ ଲେଖିଥିବା ଚିଠିରେ ସେ ଦର୍ଶାଇଛନ୍ତି ଯେ, ସେପ୍ଟେମ୍ବର ୩୦ରେ ତାଙ୍କ କାର୍ଯ୍ୟକାଳ ଶେଷ ହେଉଛି। ଗତ ୨ ବର୍ଷ ହେଲା ସେ ଏହି ମାମଲାର ଦୈନଦିନ ଶୁଣାଣି କରିଆସୁଛନ୍ତି। ଶୁଣାଣି ଶେଷ ଲାଗି ଆଉ ୬ ମାସ ସମୟ ଲାଗିବ। ଜଷ୍ଟିସ ଆର୍.ଏଫ୍. ନରିମାନଙ୍କ ନେତୃତ୍ୱରେ ଗଠିତ ଦୁଇଜଣିଆ ଖଣ୍ଡପୀଠଙ୍କ ନିକଟକୁ ମାମଲା ଆସିବା ପରେ ସୋମବାର ଏ ସମ୍ପର୍କରେ ଜଣାପଡ଼ିଛି। ବିଚାରପତି ଏସ୍.କେ. ଯାଦବଙ୍କ କାର୍ଯ୍ୟକାଳ ବୃଦ୍ଧି ନେଇ ଉତ୍ତରପ୍ରଦେଶ ସରକାରଙ୍କଠାରୁ ମତାମତ ମଗାଯାଇଛି। ମାମଲାର ପରବର୍ତ୍ତୀ ଶୁଣାଣି ଜୁଲାଇ ୧୯ ତାରିଖରେ କରାଯିବ ବୋଲି ଖଣ୍ଡପୀଠ କହିଛନ୍ତି। ପ୍ରକାଶଥାଉ କି, ୨୦୧୭ ଏପ୍ରିଲରେ ସୁପ୍ରିମକୋର୍ଟ ୨ ବର୍ଷ ମଧ୍ୟରେ ଶୁଣାଣି ଶେଷ କରିବାକୁ ସ୍ବତନ୍ତ୍ର ବିଚାରପତିଙ୍କୁ କହିଥିଲେ। ଏଠାରେ ସୂଚନାଯୋଗ୍ୟ ଯେ, ଅଯୋଧ୍ୟାରେ ଥିବା ବାବ୍ରୀ ମସ୍ଜିଦକୁ ୧୯୯୨ ଡିସେମ୍ବର ୬ରେ ଭଙ୍ଗାଯାଇଥିଲା।
