ଶେରଗଡ଼/ଧରାକୋଟ,୨୯ା୧୦ (ଡି.ଏନ୍.ଏ.)- ଶେରଗଡ ବ୍ଲକ ଧରାକୋଟ ଥାନା ବାଦଗଡ ଗ୍ରାମରେ ଗତ ୨୩ ତାରିଖରେ ଖଣ୍ଡାରେ ହାଣି ବାବୁ ପ୍ରଧାନଙ୍କୁ ହତ୍ୟା କରାଯାଇଥିଲା। ହତ୍ୟାକାଣ୍ଡର ପର୍ଦ୍ଦାଫାଶ କରିଛି ଧରାକୋଟ ପୋଲିସ। ଘଟଣାରେ ସମ୍ପୃକ୍ତ ୪ ଜଣଙ୍କୁ ଗିରଫ କରି ମଙ୍ଗଳବାର ଶେରଗଡ କୋର୍ଟକୁ ଚାଲାଣ କରିଛି। ସେମାନେ ହେଲେ ବାଦଗଡର ଗଙ୍ଗା ସାହୁ, ରୋହିତ ସାହୁ, କୁନା ସାହୁ, ଡାକ ସାହୁ। ଏନେଇ ଧରାକୋଟ ଥାନାରେ ନଂ.୧୫୭/୨୦୧୯ରେ ହତ୍ୟା ମାମଲା ରୁଜୁ ହୋଇଥିଲା। ଅନ୍ୟ ଦୁଇ ଅଭିଯୁକ୍ତ ଫେରାର ଅଛନ୍ତି। ବାଦଗଡ ଗ୍ରାମରୁ ଅଭିଯୁକ୍ତ ମାନେ ବ୍ୟବହାର କରିଥିବା ୩ ବାଇକ, ଦୁଇଟି କାତି, ଗୋଟିଏ ଖଣ୍ଡା ଜବତ ହୋଇଛି। ହତ୍ୟାର ପ୍ରତିଶୋଧ ନେବାକୁ ଯାଇ ଆଉ ଏକ ହତ୍ୟାକାଣ୍ଡ ଘଟିଥିବା ଧରାକୋଟ ପୋଲିସ କହିଛି। ସୁବାସ ହତ୍ୟାର ପ୍ରତିଶୋଧ ନେବାକୁ ଯାଇ ବାବୁଙ୍କୁ ହତ୍ୟା କରାଯାଇଥିବା ଧରାକୋଟ ଥାନାରେ ଅନୁଷ୍ଠିତ ଖବରଦାତା ସମ୍ମିଳନୀରେ ପୋଲିସ କହିଛି।
ପ୍ରକାଶ ଯେ, ଗତ ୨୦୧୭ ନିର୍ବାଚନରେ କୁଲାଗଡ ପଞ୍ଚାୟତ ବାଦଗଡ ଗ୍ରାମର ସୁବାସ ସାହୁଙ୍କ ଭାଇବୋହୁ ଓ ବାବୁଙ୍କ ସ୍ତ୍ରୀ ସମିତିସଭ୍ୟା ପ୍ରାର୍ଥୀ ହୋଇଥିଲେ। ବାବୁଙ୍କ ସ୍ତ୍ରୀ ପରାଜିତ ହୋଇଥିଲେ। ଏହାର ପ୍ରତିଶୋଧ ନେବାକୁ ବାବୁ ସୁବାସଙ୍କୁ ହତ୍ୟା କରିବାକୁ ଷଡ଼ଯନ୍ତ୍ର କରିଥିଲା। ୨୫ଜୁନ୍ ୨୦୧୭ରେ ସୁବାସଙ୍କୁ ହତ୍ୟା କରାଯାଇଥିଲା। ଏହି ଘଟଣାରେ ବାବୁ ଗିରଫ ହୋଇଥିଲେ। କିଛିଦିନ ତଳେ ସେ ଜାମିନରେ ଆସି କୋରାପୁଟ ସେମିଳିଗୁଡାରେ ରହି ଗଞ୍ଜେଇ ଚୋରା ଚାଲାଣ କରୁଥିଲେ। ମା’ଙ୍କ ମୃତ୍ୟୁପରେ ଅନ୍ତ୍ୟେଷ୍ଟି କ୍ରିୟାରେ ଯୋଗଦେବାକୁ ବାଦଗଡ ଆସିଥିଲେ। ୨୩ ତାରିଖ ରାତିରେ ଗଁା ପୋଖରୀକୁ ଗାଧୋଇ ଯାଇଥିବାବେଳେ ପୂର୍ବରୁ ଲୁଚି ରହିଥିବା ଗଙ୍ଗା, କୁନା, ରୋହିତ, ଦିଲୁ, ଗଣେଶ, ଡାକ ତାଙ୍କୁ ଖଣ୍ଡା କାତିରେ ହାଣି ହତ୍ୟା କରିଥିଲେ।
