ବାଳକାଟୀ,୨୮।୧୦(ଡି.ଏନ.ଏ.)- ରାଜଧାନୀ ଉପକଣ୍ଠ ବାଳକାଟୀ ଫାଣ୍ଡି ଅଞ୍ଚଳରେ ରବିବାର ବାଣ ଫୁଟାଉଥିବାବେଳେ ୭ଜଣ ଆହତ ହୋଇଛନ୍ତି। ସେମାନେ ହେଲେ ନୂଆପାଟଣା ଗ୍ରାମର ସୁଶୀଲ ଖଟେଇ(୩୦), ରିଙ୍କୁ ବେହେରା(୨୦), ବିଠଲ(୧୪), ସୂର୍ଯ୍ୟମଣି ବେହେରା(୨୬), ସନ୍ତୋଷ ବେହେରା(୧୬), ସଞ୍ଜୟ ବେହେରା(୧୬) ଏବଂ ପ୍ରଭାତି ବେହେରା। ଏମାନଙ୍କୁ ଚିକିତ୍ସା ଲାଗି ବାଳକାଟୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିବାବେଳେ ସୁଶୀଲଙ୍କ ଅବସ୍ଥା ଗୁରୁତର ହେବାରୁ କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ସୂଚନା ମୁତାବକ, ଦୀପାବଳି ଉପଲକ୍ଷେ ନୂଆପାଟଣା ଗ୍ରାମର ସୁଶୀଲ ରାତି ସାଢ଼େ ୧୦ଟାରେ ବାଣ କିଣି ଫୁଟାଇବା ଲାଗି ଗଁାରେ ପହଞ୍ଚତ୍ଥିଲେ। ଏହାଦେଖି ତାଙ୍କ ସାଙ୍ଗମାନେ ବାଣ ଭର୍ତ୍ତି ବ୍ୟାଗକୁ ଟଣାଓଟରା କରୁଥିବାବେଳେ ସୁଶୀଲଙ୍କ ହାତରୁ ବ୍ୟାଗଟି ଖସି ତଳେ ପଡିଥିଲା। ଫଳରେ ବ୍ୟାଗ ଭିତରେ ଥିବା ଶୂନଫୁଟକା ବାଣଟି ଫୁଟିବାରୁ ଅନ୍ୟ ବାଣଗୁଡ଼ିକ ମଧ୍ୟ ଏକା ସାଙ୍ଗରେ ବିସ୍ଫୋରଣ ହୋଇଥିଲା। ଚାରିଆଡ଼େ ନିଆଁ ସହ ଶୂନଫୁଟକାରୁ ଗୋଡ଼ି ବାହାରି ପାଖରେ ଥିବା ସମସ୍ତଙ୍କ ଦେହରେ ବାଜିଥିଲା। ସ୍ଥାନୀୟ ଲୋକେ ୭ଜଣଙ୍କୁ ଉଦ୍ଧାର କରି ଚିକିତ୍ସା ପାଇଁ ପଠାଇଥିଲେ।
